ಚೀನಾ ನೆರವಿನಿಂದ ಕ್ಷಿಪಣಿ ನಿರ್ಮಿಸುತ್ತಿದೆ ಸೌದಿ ಅರೇಬಿಯಾ!

Team Udayavani, Dec 24, 2021, 9:15 PM IST

ಕತಾರ್‌: ಸೌದಿ ಅರೇಬಿಯಾವು ರಹಸ್ಯ ಸ್ಥಳವೊಂದರಲ್ಲಿ ಚೀನಾದ ನೆರವಿನೊಂದಿಗೆ ಖಂಡಾಂತರ ಕ್ಷಿಪಣಿಗಳನ್ನು ನಿರ್ಮಿಸುತ್ತಿರುವ ವಿಚಾರ ಈಗ ಬೆಳಕಿಗೆ ಬಂದಿದೆ.

ಸೌದಿಯು ತನ್ನದೇ ಆದ ಶಸ್ತ್ರಾಸ್ತ್ರಗಳನ್ನು ಅಭಿವೃದ್ಧಿ ಪಡಿಸುತ್ತಿರುವ ಬಗ್ಗೆ ಗುಪ್ತಚರ ವರದಿಗಳು ಹಾಗೂ ಉಪಗ್ರಹ ಚಿತ್ರಗಳನ್ನು ಉಲ್ಲೇಖಿಸಿ”ಸಿಎನ್‌ಎನ್‌’ ವರದಿ ಮಾಡಿದೆ.

ಇರಾನ್‌ನೊಂದಿಗೆ ಮಧ್ಯಪ್ರಾಚ್ಯ ದೇಶಗಳ ಶೀತಲ ಸಮರ ಮುಂದುವರಿದಿರುವಂತೆಯೇ ಈ ಬೆಳವಣಿಗೆ ನಡೆದಿದೆ.

ಈ ಹಿಂದೆ ಸೌದಿ ಅರೇಬಿಯಾವು ಚೀನಾದಿಂದ ಖಂಡಾಂತರ ಕ್ಷಿಪಣಿಗಳನ್ನು ಖರೀದಿಸಿತ್ತಾದರೂ, ಗಲ್ಫ್ ರಾಷ್ಟ್ರವು ತಾನಾಗಿಯೇ ಅವುಗಳನ್ನು ನಿರ್ಮಿಸುತ್ತಿರುವುದು ಇದೇ ಮೊದಲು ಎಂದು ಹೇಳಲಾಗಿದೆ.

ಅ.26ರಿಂದ ನ. 6ರ ನಡುವಿನ ಉಪಗ್ರಹ ಚಿತ್ರಗಳಲ್ಲಿ, ಸೌದಿಯ ದವಾದ್ಮಿಯ ಸಮೀಪ ಖಂಡಾಂತರ ಕ್ಷಿಪಣಿ ಅಭಿವೃದ್ಧಿಪಡಿಸಲಾಗುತ್ತಿರುವ ನೆಲೆಯು ಸೆರೆಹಿಡಿಯಲ್ಪಟ್ಟಿದೆ.

ಇದನ್ನೂ ಓದಿ:ಕೋವಿಡ್: ರಾಜ್ಯದಲ್ಲಿಂದು 405 ಪಾಸಿಟಿವ್‌ ಪತ್ತೆ; ನಾಲ್ವರ ಸಾವು

ಚೀನಾದ ಸಹಾಯದಿಂದಲೇ ಈ ನೆಲೆಯನ್ನೂ ಸ್ಥಾಪಿಸಲಾಗಿದ್ದು, ಅಲ್ಲಿ ಕ್ಷಿಪಣಿ ನಿರ್ಮಾಣಕ್ಕೆ ಬಳಸಲಾಗುವ ಸಾಲಿಡ್‌-ಪ್ರಾಪಲ್ಲೆಂಟ್‌ಗಳನ್ನು ವಿಲೇವಾರಿ ಮಾಡುವ “ಬರ್ನ್ ಪಿಟ್‌’ಗಳೂ ಕಂಡುಬಂದಿವೆ. ಚೀನಾವು ಸೌದಿ ಅರೇಬಿಯಾಗೆ ರಕ್ಷಣೆಗೆ ಸಂಬಂಧಿಸಿದ ಅನೇಕ ಸೂಕ್ಷ್ಮ ಮಾಹಿತಿಗಳನ್ನು ಹಂಚಿಕೊಂಡಿದೆ.