ದೋಸ್ತಿ ನೆಪದಲ್ಲಿ ನೇಪಾಲ ಬೆನ್ನಿಗೆ ಚೂರಿ

Team Udayavani, Jun 25, 2020, 7:46 AM IST

ಕಠ್ಮಂಡು: ಚೀನ ಈಗ ನೇಪಾಲದ ಬೆನ್ನಿಗೂ ಚೂರಿ ಹಾಕಿದೆ. ಗಡಿರಸ್ತೆಗಳ ನಿರ್ಮಾಣದ ನೆಪದಲ್ಲಿ 10 ಹಳ್ಳಿ ಗಳನ್ನುಚೀನ ಕಬಳಿಸಿದ್ದು, ಇದರಿಂದಾಗಿ ನೇಪಾಲದ 33 ಹೆಕ್ಟೇರ್‌ ಭೂಪ್ರದೇಶ ಡ್ರ್ಯಾಗನ್‌ ಪಾಲಾಗಿದೆ. ಚೀನದ ತಾಳಕ್ಕೆ ತಕ್ಕಂತೆ ಕುಣಿಯುತ್ತಿದ್ದ ನೇಪಾಲ ಈಗ ತಾನೇ ತೋಡಿಕೊಂಡ ಕೂಪದಲ್ಲಿ ಬೀಳುತ್ತಿದೆ. “ಟಿಬೆಟ್‌ ಗಡಿಯ ರಸ್ತೆ ನಿರ್ಮಾಣದ ಹೆಸರಿನಲ್ಲಿಚೀನ 10 ಹಳ್ಳಿಗಳನ್ನು ಅತಿಕ್ರಮಿಸಿದೆ. ನೇಪಾಲದ ಈ ಜಾಗದಲ್ಲಿ ಚೀನ ಗಡಿಪೋಸ್ಟ್‌ ನಿರ್ಮಿಸುವ ಸಾಧ್ಯತೆ ಇದೆ’ ಎಂದು ನೇಪಾಲದ ಕೃಷಿ ಇಲಾಖೆಯು ಸರಕಾರಕ್ಕೆ ಎಚ್ಚರಿಸಿದೆ.

ನದಿಗಳನ್ನೂ ತಿರುಗಿಸಿದೆ!: ಚೀನ ತನ್ನ ಭೂವ್ಯಾಪ್ತಿ ಹೆಚ್ಚಿಸಲು ನದಿಗಳ ದಿಕ್ಕನ್ನೇ ಬದಲಿಸುತ್ತಿದೆ. ಚೀನದ ನಿರ್ಮಾಣ ಕಾರ್ಯಗಳಿಂದಾಗಿ ಬಾಗ್ಧಾರೆ ಖೋಲಾ ಹಾಗೂ ಕರ್ನಾಲಿ ನದಿಗಳು ನೇಪಾಲದ ಹಳ್ಳಿಗಳತ್ತ ತಿರುಗಿವೆ. ಹೀಗೇ ಬಿಟ್ಟರೆ ಈ ಮಳೆಗಾಲದಲ್ಲಿನೇಪಾಲದ ಹಳ್ಳಿಗಳು ನೀರಿನಲ್ಲಿ ಕೊಚ್ಚಿಹೋಗುವ ಸಾಧ್ಯತೆ ಇದೆ ಎಂದು ಇಲಾಖೆ ತನ್ನ ಸಮೀಕ್ಷಾ ವರದಿಯಲ್ಲಿ ಆತಂಕ ವ್ಯಕ್ತಪಡಿಸಿದೆ.

ಗುಳುಂ ಗುಳುಂ: ನೇಪಾಲದ ಒಟ್ಟು 11 ಹಳ್ಳಿಗಳ ಮೇಲೆ ಚೀನ ಕಣ್ಣು ಹಾಕಿದ್ದು, 10 ಪ್ರದೇಶಗಳನ್ನು ಸ್ವಾಧೀನ ಪಡಿಸಿಕೊಂಡಿದೆ. ರಸೂವಾ ಜಿಲ್ಲೆಯಲ್ಲಿ 6 ಹೆಕ್ಟೇರ್‌, ಹಮ್ಲಾ ಜಿಲ್ಲೆಯಲ್ಲಿ 10 ಹೆ. ಭೂಭಾಗ ಚೀನದ ತೆಕ್ಕೆಗೆ ಸೇರಿದೆ. ಸಿಂಜೆನ್‌, ಭುರ್ಜುಕ್‌ ಹಾಗೂ ಜಂಬು ಖೋಲಾ ಪ್ರದೇಶಗಳ ಗುರುತೇ ಸಿಗದಂತಾಗಿದೆ. ದೋಸ್ತಿ ಎಂದು ಕೊಂಡೇ ಚೀನ, ನೇಪಾಲಕ್ಕೆ ದ್ರೋಹ ಬಗೆಯುತ್ತಿದೆ.

ಗಡಿಯ ಹಳ್ಳಿ ಜನರಿಗೆ ಮತ್ತೆ ನೇಪಾಲ ಕಿರಿಕ್‌
ಭಾರತದ ಗಡಿಯ ಹಳ್ಳಿ ಜನರೊಂದಿಗೆ ನೇಪಾಲ ಮತ್ತೆ ವಿನಾಕಾರಣ ಜಗಳಕ್ಕಿಳಿಯುತ್ತಿದೆ. ಉತ್ತರ ಪ್ರದೇಶ, ಬಿಹಾರದ ಅಂಚಿನ ಹಳ್ಳಿಗಳಲ್ಲಿ ಜನರಿಗೆ ಒಡ್ಡು, ಡ್ಯಾಮ್‌ ಹಾಗೂ ಕೃಷಿ ಸಂಬಂಧಿತ ಕಾರ್ಯ ನಡೆಸಲು ನೇಪಾಲ ಅವಕಾಶ ನೀಡುತ್ತಿಲ್ಲ. ಅಲ್ಲದೆ, ಭಾರತೀಯ ಭದ್ರತಾ ಸಿಬಂದಿಯ ಮೇಲೂ ನೇಪಾಲ ಮತಿಗೇಡಿಯಂತೆ ವರ್ತಿಸುತ್ತಿದೆ. “ನೇಪಾಳ ಕಡೆಯಿಂದ 3-4 ಪೊಲೀಸರು ಪ್ರವೇಶಿಸಿ ನಮ್ಮ ಅಧಿಕಾರಿಯನ್ನು ಎಳೆದಾಡಿದ್ದಾರೆ. ನಾವೆಲ್ಲ ಹೋಗಿನೇಪಾಲ ಪೊಲೀಸರ ಸಂಚನ್ನು ವಿಫ‌ಲಗೊಳಿಸಿದೆವು’ ಎಂದು ಬಿಹಾರದ ಬಲ್ಬಾ ಗ್ರಾಮದ ನಿವಾಸಿ “ರಿಪಬ್ಲಿಕ್‌ ಟಿವಿ’ಗೆ ಮಾಹಿತಿ ನೀಡಿದ್ದಾರೆ.