ಅರುಣಾಚಲ ಗಡಿ ಸಮೀಪ ಚೀನ ರೈಲು!

Team Udayavani, Nov 2, 2020, 12:04 PM IST

ಬೀಜಿಂಗ್‌: ಲಡಾಖ್‌ ಭಾಗದಲ್ಲಿ ತನ್ನ ದುಸ್ಸಾಹಸಕ್ಕೆ ಕಿಮ್ಮತ್ತು ಕಾಣದ ಚೀನ, ಅರುಣಾಚಲ ಪ್ರದೇಶ ದತ್ತ ವಕ್ರದೃಷ್ಟಿ ನೆಟ್ಟಿದೆ. ಭಾರತದ ಗಡಿಗೆ
ಹೊಂದಿಕೊಂಡಂತೆ ರೈಲ್ವೇ ಮಾರ್ಗ ನಿರ್ಮಾಣದ ತಂಟೆ ಆರಂಭಿಸಿದೆ.

ನೈಋತ್ಯ ಸಿಚುವಾನ್‌ ಪ್ರಾಂತ್ಯದಿಂದ ಟಿಬೆಟ್‌ನ ಲಿನ್ಹಿ ನಡುವೆ ರೈಲ್ವೇ ಮಾರ್ಗ ತೆರೆಯಲು ಚೀನ ಪಿತೂರಿ ರೂಪಿಸಿದೆ. ಅರುಣಾಚಲ ಪ್ರದೇಶದ ಗಡಿಗೆ ಲಿನ್ಹಿ ಬಹಳ ಹತ್ತಿರವಿದ್ದು, ಕಾಮಗಾರಿ ಶೀಘ್ರವೇ ಆರಂಭಗೊಳ್ಳಲಿದೆ. ಯೋಜನೆಗೆ ಅಗತ್ಯವಿರುವ ವಿದ್ಯುತ್‌ ಪೂರೈಕೆಗೆ ವ್ಯವಸ್ಥೆ ಕಲ್ಪಿಸಲು ವೇದಿಕೆ ಸಿದ್ಧವಾಗಿದೆ.

ಇಲ್ಲಿಯ ತನಕ ಲಿನ್ಹಿ ಭಾಗದ ಜನ ಚೆಂಗ್ಡುನಿಂದ ಲಾಸಾಗೆ 48 ಗಂಟೆಗಳಲ್ಲಿ ತಲುಪುತ್ತಿದ್ದರು. ಉದ್ದೇಶಿತ ಯೋಜನೆ ಪ್ರಯಾಣದ ಕಾಲಾವಧಿಯನ್ನು ಅರ್ಧಕ್ಕೆ ಇಳಿಸಲಿದೆ. 26 ನಿಲ್ದಾಣಗಳನ್ನೊಳಗೊಂಡ ಯೋಜನೆಗೆ 47.8 ಶತಕೋಟಿ ಡಾಲರ್‌ ಗಳನ್ನು ಬೀಜಿಂಗ್‌ ಮೀಸಲಿಟ್ಟಿದೆ. ಹಿಮಾಲಯ
ಶ್ರೇಣಿಯಲ್ಲಿ 5 ವಿಮಾನ ನಿಲ್ದಾಣ ನಿರ್ಮಿಸಿರುವ ಚೀನ, ಲಿನ್ಹಿಯಲ್ಲೂ ಏರ್‌ಪೋರ್ಟ್‌ ಹೊಂದಿದೆ.

2027ಕ್ಕೆ ಅಮೆರಿಕ ಸೇನೆಗೆ ಸಮನಾಗಿ ಪಿಎಲ್‌ಎ
2027ರ ವೇಳೆಗೆ ಅಮೆರಿಕ ಸೇನೆಗೆ ಎಲ್ಲ ರೀತಿಯಲ್ಲೂ ಸಡ್ಡು ಹೊಡೆಯವಂತೆ ಪೀಪಲ್ಸ್‌ ಲಿಬರೇಷನ್‌ ಆರ್ಮಿಯನ್ನು ಸುಸಜ್ಜಿತ ಅತ್ಯಾಧುನಿಕವಾಗಿ ಕಟ್ಟಲು ಚೀನ ನಿರ್ಧರಿಸಿದೆ.

ಇತ್ತೀಚೆಗಷ್ಟೇ ಮುಕ್ತಾಯ ಕಂಡ ಆಡಳಿತ ಪಕ್ಷ ಕಮ್ಯುನಿಸ್ಟ್‌ ಪಾರ್ಟಿ ಆಫ್ ಚೀನದ ಪ್ರಧಾನ ಸಮಾವೇಶದಲ್ಲಿ ಈ ಸಂಕಲ್ಪ ತೊಟ್ಟಿದೆ ಎಂದು ಚೀನ ಮಾಧ್ಯಮಗಳು ವರದಿ ಮಾಡಿವೆ.