ಕೋವಿಡ್19 ಲಸಿಕೆಯ ಸಂಶೋಧನಾ ಡೇಟಾ ಕದಿಯಲು ಯತ್ನಿಸುತ್ತಿರುವ ಚೀನಾ ಹ್ಯಾಕರ್ಸ್: ಅಮೆರಿಕ ಆರೋಪ

Team Udayavani, May 12, 2020, 8:55 AM IST

ವಾಷಿಂಗ್ಟನ್: ಕೋವಿಡ್-19ಗೆ ಹಲವು ರಾಷ್ಟ್ರಗಳು ಲಸಿಕೆ ಅಭಿವೃದ್ಧಿಪಡಿಸುವ ಕಾಯಕದಲ್ಲಿ ನಿರತವಾಗಿದೆ. ಏತನ್ಮಧ‍್ಯೆ ಅಮೆರಿಕಾದ ಫೆಡರಲ್ ಬ್ಯೂರೋ ಆಫ್ ಇನ್ವೆಸ್ಟಿಗೇಷನ್ (ಸಂಯುಕ್ತ ತನಿಖಾ ದಳ) ಮತ್ತು ಸೈಬರ್ ಸೆಕ್ಯೂರಿಟಿ ತಜ್ಞರು, ಚೈನಾದ ಹ್ಯಾಕರ್ ಗಳು ಕೋವಿಡ್-19 ಲಸಿಕೆ ಅಭಿವೃದ್ಧಿಪಡಿಸುವ  ಸಂಶೋಧನೆಯ ಡಾಟಾವನ್ನು ಕದಿಯಲು ಯತ್ನಿಸುತ್ತಿದ್ದಾರೆ ಎಂಬ ಅನುಮಾನವನ್ನು ವ್ಯಕ್ತಪಡಿಸಿದೆ.

ಸೋಮವಾರ ಅಮೆರಿಕಾದ 2 ಪ್ರಮುಖ ಪತ್ರಿಕೆಗಳಾದ ವಾಲ್ ಸ್ಟ್ರೀಟ್ ಜರ್ನಲ್ ಮತ್ತು ನ್ಯೂಯಾರ್ಕ್ ಟೈಮ್ಸ್  ಈ ವರದಿಯನ್ನು ಪ್ರಕಟಿಸಿದ್ದು, ಕೋವಿಡ್-19ಗೆ ಲಸಿಕೆ ಅಭಿವೃದ್ಧಿಪಡಿಸಲು ಸರ್ಕಾರಗಳು ಮತ್ತು ಖಾಸಗಿ ಸಂಸ್ಥೆಗಳು ಸ್ಪರ್ಧಿಸುತ್ತಿರುವುದರಿಂದ ಎಫ್‌ಬಿಐ ಮತ್ತು  ಸೈಬರ್ ಸೆಕ್ಯುರಿಟಿ ಇಲಾಖೆ ಚೀನಾದ ಹ್ಯಾಕಿಂಗ್ ಬಗ್ಗೆ ಎಚ್ಚರಿಕೆ ನೀಡಿವೆ.

ಕೋವಿಡ್-19ಗಾಗಿ ಮಾಡಲಾಗುತ್ತಿರುವ ಚಿಕಿತ್ಸೆಗಳು ಮತ್ತು ಪರೀಕ್ಷೆಗಳ ಕುರಿತು ಮಾಹಿತಿಗಳನ್ನು ಹ್ಯಾಕರ್ಸ್ ಗಳು ಗುರಿಯಾಗಿಸಿಕೊಂಡಿದ್ದಾರೆ. ಮಾತ್ರವಲ್ಲದೆ ಈ ಹ್ಯಾಕರ್ ಗಳು ಚೀನಾದ ಸರ್ಕಾರದೊಂದಿಗೆ ಸಂಪರ್ಕದಲ್ಲಿದ್ದಾರೆ ಎಂದು ಅಮೆರಿಕದ ಅಧಿಕಾರಿಗಳು ಆರೋಪಿಸಿದ್ದಾರೆ ಎಂದು ವರದಿಗಳು ತಿಳಿಸಿವೆ.

ಆದರೇ ಬೀಜಿಂಗ್ ವಿದೇಶಾಂಗ ಸಚಿವಾಲಯದ ವಕ್ತಾರ ಝಾವೋ ಲಿಜಿಯಾನ್ ಈ ಆರೋಪವನ್ನು ನಿರಾಕರಿಸಿದ್ದು ಮತ್ತು ಚೀನಾ ಸೈಬರ್ ದಾಳಿಯನ್ನು ದೃಢವಾಗಿ ವಿರೋಧಿಸುತ್ತದೆ ಎಂದು ಸ್ಪಷ್ಟನೆ ನೀಡಿದ್ದಾರೆ. ಮಾತ್ರವಲ್ಲದೆ ಚೀನಾ ಲಸಿಕೆ ಅಭಿವೃದ್ಧಿ ಪಡಿಸುವ ದೇಶಗಳಲ್ಲೇ ಮುಂಚೂಣಿಯಲ್ಲಿದ್ದು, ಪುರಾವೆಗಳಿಲ್ಲದೆ ಚೀನಾವನ್ನು ನಿಂದನೆಗೆ ಒಳಪಡಿಸಲಾಗುತ್ತಿದೆ ಎಂದು ದೂರಿದ್ದಾರೆ.