ಚೀನೀ ನಾಯಕರ ಮೆದುಳಲ್ಲಿ ಕೆಲ ಭಾಗ ಕಾಣೆ: ದಲಾಯಿ

Team Udayavani, Mar 8, 2017, 3:45 AM IST

ವಾಷಿಂಗ್ಟನ್‌: ಚೀನಾದ ಕಮ್ಯುನಿಸ್ಟ್‌ ನಾಯಕರ ಕಣ್ಣು ಕೆಂಪಾಗಿಸುವಂಥ ಮಾತನ್ನಾಡಿದ್ದಾರೆ ಬೌದ್ಧ ಧರ್ಮಗುರು ದಲಾಯಿ ಲಾಮಾ. ಅಮೆರಿಕದ ಟಾಕ್‌ ಶೋ ಹೋಸ್ಟ್‌ ಜಾನ್‌ ಆಲಿವರ್‌ಗೆ ನೀಡಿದ ಸಂದರ್ಶನದಲ್ಲಿ ಅವರು “ಚೀನಾದ ನಾಯಕರ ಮೆದುಳಲ್ಲಿ ಕೆಲ ಭಾಗ ಕಾಣೆಯಾಗಿದೆ!’ ಎಂದಿದ್ದಾರೆ. “ಚೀನಾ ತನ್ನದೇ ದಲಾಯಿ ಲಾಮಾರನ್ನು ನೇಮಕ ಮಾಡಬಹುದೆಂದು ಕಳವಳಗೊಂಡಿದ್ದೀರಾ?’ ಎಂಬ ಆಲಿವರ್‌ ಪ್ರಶ್ನೆಗೆ ಉತ್ತರಿಸಿದ ಅವರು “ಅದು ಮೂರ್ಖತನವಾಗುತ್ತದಷ್ಟೆ. ನಮ್ಮ ಮೆದುಳಿಗೆ ಸಾಮಾನ್ಯ ಜ್ಞಾನ ಸೃಷ್ಟಿಸುವ ಸಾಮರ್ಥಯವಿರುತ್ತದೆ. ಚೀನಾದ ಬಿಗಿನೀತಿಗಾರರಲ್ಲಿ ಈ ಭಾಗ ಕಾಣೆಯಾಗಿದೆ’ ಎಂದು ಕಾಲೆಳೆದಿದ್ದಾರೆ.  

1959ರಲ್ಲಿ ಟಿಬೆಟ್‌ನಲ್ಲಿ ಚೀನಿ ಆಡಳಿತದ ವಿರುದ್ಧದ ಹೋರಾಟ ವಿಫ‌ಲವಾದಾಗ ದಲಾಯಿ ಲಾಮಾ ಭಾರತಕ್ಕೆ ಬಂದಿದ್ದರು. ಇಂದಿಗೂ ಅವರನ್ನು ಚೀನಾ ಅಪಾಯಕಾರಿ ಪ್ರತ್ಯೇಕತಾವಾದಿ ಎಂಬಂತೆಯೇ ನೋಡುತ್ತದೆ. ಸದ್ಯಕ್ಕೆ ಲಾಮಾರ ಕಮೆಂಟ್‌ಗೆ ಚೀನಿ ನಾಯಕರು ಇನ್ನೂ ತುಟಿ ಪಿಟಕ್‌ ಎಂದಿಲ್ಲ.