ಮಿಸ್ಸಿಸ್ಸಿಪ್ಪಿ ಗುಂಡಿನ ದಾಳಿ: 8 ಮಂದಿ ಸಾವು

Team Udayavani, May 29, 2017, 1:08 PM IST

ಜಾಕ್ಸನ್‌: ಅಮೆರಿಕದ ಮಿಸ್ಸಿಸ್ಸಿಪ್ಪಿಯಲ್ಲಿ ರವಿವಾರ ಮೂರು ಮನೆಗಳಲ್ಲಿ ಗುಂಡಿನ ದಾಳಿ ನಡೆದಿದ್ದು, ನ್ಯಾಯಾಂಗದ ಉನ್ನತ ಅಧಿಕಾರಿ ಸೇರಿದಂತೆ 8 ಮಂದಿ ಮೃತಪಟ್ಟಿದ್ದಾರೆ. ಪ್ರಕರಣ ಸಂಬಂಧ ಶಂಕಿತನೊಬ್ಬನನ್ನು ಪೊಲೀಸರು ವಶಕ್ಕೆ ಪಡೆದಿದ್ದಾರೆ. ಗ್ರಾಮೀಣ ಪ್ರದೇಶವಾದ ಲಿಂಕನ್‌ ಕೌಂಟಿಯಲ್ಲಿ ಈ ಘಟನೆ ನಡೆದಿದೆ. ಇದು ರಾಜಧಾನಿ ಜಾಕ್ಸನ್‌ನಿಂದ 60 ಮೈಲುಗಳಷ್ಟು ದೂರದಲ್ಲಿದೆ. ಮೂರು ಪ್ರತ್ಯೇಕ ಮನೆಗಳಲ್ಲಿ ಬಂದೂಕುಧಾರಿ ವ್ಯಕ್ತಿಯೊಬ್ಬ ಏಕಾಏಕಿ ಗುಂಡಿನ ಮಳೆಗರೆದ ಪರಿಣಾಮ 8 ಮಂದಿ ಸಾವಿಗೀಡಾಗಿದ್ದಾರೆ. ಈ ಪೈಕಿ ಶೆರಿಫ್ಡೆ ಪ್ಯುಟಿ (ನ್ಯಾಯಾಂಗದ ಅಧಿಕಾರಿ) ಕೂಡ ಸೇರಿದ್ದಾರೆ. ಆದರೆ, ಈ ದಾಳಿಗೆ ನಿಖರ ಕಾರಣ ತಿಳಿದುಬಂದಿಲ್ಲ. ಅಲ್ಲದೆ ಆರೋಪಿಯು ಸಂತ್ರಸ್ತರನ್ನು ಮೊದಲೇ ಬಲ್ಲವನೇ ಎಂಬುದೂ ತಿಳಿದುಬಂದಿಲ್ಲ.

ಇದೇ ವೇಳೆ, ಪೊಲೀಸರ ವಶಕ್ಕೆ ಸಿಕ್ಕಿದ ಬಳಿಕ ಶಂಕಿತನನ್ನು ಕೋರಿ ಗಾಡ್‌ಬೋಲ್ಟ್ ಎಂದು ಗುರುತಿಸಲಾಗಿದೆ. ಈತನು ಬಂಧನಕ್ಕೊಳಗಾದ ಬಳಿಕ ರಸ್ತೆಯಲ್ಲೇ ವರದಿಗಾರರ ಜತೆ ಮಾತನಾಡಿದ್ದು, ‘ನಾನು ಇಂಥ ಕೆಲಸ ಮಾಡಿದ ಬಳಿಕ ನನಗೆ ಬದುಕುವ ಅರ್ಹತೆಯೇ ಇಲ್ಲ’ ಎಂದು ಹೇಳುತ್ತಿದ್ದ ಎಂದು ಸ್ಥಳೀಯ ಮಾಧ್ಯಮಗಳು ವರದಿ ಮಾಡಿವೆ.