ರೋಗಿಗಳ ಕಣ್ಣಿಂದ ಬೆಳಕು! ; ಹ್ಯಾಂಪ್‌ಶೈರ್‌ನ ಆಸ್ಪತ್ರೆಯಲ್ಲಿ ಜರುಗಿದ ವಿದ್ಯಮಾನ

Team Udayavani, Jan 13, 2020, 7:56 AM IST

ನ್ಯೂಹ್ಯಾಂಪ್‌ಶೈರ್‌ (ಅಮೆರಿಕ): ಇಲ್ಲಿನ ನಾರಿಸ್‌ ಕಾಟನ್‌ ಕ್ಯಾನ್ಸರ್‌ ಸೆಂಟರ್‌ನಲ್ಲಿ (ಎನ್‌ಸಿಸಿಸಿ) ಕಣ್ಣಿನ ಕ್ಯಾನ್ಸರ್‌ಗಾಗಿ ರೇಡಿಯೋ ಥೆರಪಿ ಚಿಕಿತ್ಸೆ ಪಡೆಯುತ್ತಿದ್ದ ಕೆಲವು ರೋಗಿಗಳ ಕಣ್ಣಿನೊಳಗೆ ಬೆಳಕೊಂದು ಕಾಣಿಸಿಕೊಂಡು ಚಿಕಿತ್ಸೆ ನೀಡುತ್ತಿದ್ದ ವೈದ್ಯರನ್ನು ಚಕಿತಗೊಳಿಸಿದೆ. ಚಿಕಿತ್ಸೆ ಮುಗಿದ ಮರುಕ್ಷಣದಲ್ಲೇ ರೋಗಿಗಳ ಮುಚ್ಚಿದ ಕಣ್ಣಿನೊಳಗಿನಿಂದ ಕೆಲವು ಸೆಕೆಂಡ್‌ಗಳವರೆಗೆ ಮಂದವಾದ ಬೆಳಕಿನ ಸೆಲೆಯೊಂದು ಗೋಚರಿಸಿದೆ. ಅದರ ವೀಡಿಯೋ ತುಣುಕುಗಳನ್ನು ಮುಂದಿಟ್ಟು ಕೊಂಡು ವೈದ್ಯಲೋಕ ಆ ಬಗ್ಗೆ ಚರ್ಚೆಯಲ್ಲಿ ತೊಡಗಿಕೊಂಡಿದೆ.

ಇದು ಚೆರೆಂಕೊವ್‌ ರೇಡಿಯೇಷನ್‌: ಜಗತ್ತಿನ ಹಲವಾರು ತಜ್ಞರು ಈ ವಿಸ್ಮಯಕ್ಕೆ ಉತ್ತರ ಕೊಟ್ಟಿದ್ದಾರೆ. ಅವರ ಪ್ರಕಾರ, ಕಣ್ಣಿಗೆ ರೇಡಿಯೋ ತರಂಗಗಳನ್ನು ಹಾಯಿಸಿ ಚಿಕಿತ್ಸೆ ನೀಡುತ್ತಿದ್ದಾಗ, ಆ ತರಂಗಗಳಿಂದ ಶಕ್ತಿಯನ್ನು ಪಡೆದ ಕಣ್ಣಿನೊಳಗಿನ ‘ಅರೆ ಘನರೂಪದ ದ್ರಾವಣ’ (ಜೆಲ್‌) ಹೀರಿಕೊಳ್ಳುತ್ತದೆ. ಚಿಕಿತ್ಸೆ ಮುಗಿದ ಕೂಡಲೇ ಹೀರಿಕೊಂಡ ಶಕ್ತಿಯನ್ನು ವಿಕಿರಣದ ಮೂಲಕ ಹೊರಹಾಕುತ್ತದೆ. ಆ ವಿಕಿರಣವೇ ರೋಗಿಗಳ ಕಣ್ಣಲ್ಲಿ ಬೆಳಕಿನ ರೂಪದಲ್ಲಿ ಕಂಡುಬಂದಿದೆ ಎಂದಿದ್ದಾರೆ.

ಇದು ಮೂಲತಃ ಭೌತಶಾಸ್ತ್ರೀಯ ತತ್ವವಾಗಿದ್ದು, ಇದಕ್ಕೆ ‘ಚೆರೆಂಕೊವ್‌ ರೇಡಿಯೇಷನ್‌’ ಎನ್ನುತ್ತಾರೆ. ಸಾಮಾನ್ಯವಾಗಿ ಪರಮಾಣು ರಿಯಾಕ್ಟರ್‌ನಲ್ಲಿ ನಡೆಯುವ ಇಂಥ ವಿದ್ಯಮಾನದ ಹಿಂದಿನ ರಹಸ್ಯವನ್ನು ಸಮರ್ಥವಾಗಿ ವಿವರಿಸಿದ್ದ ರಷ್ಯಾದ ವಿಜ್ಞಾನಿ ಪಾವೆಲ್‌ ಚೆರೆಂಕೊವ್‌ ಸ್ಮರಣಾರ್ಥ ಈ ಬಗೆಯ ವಿಕಿರಣ ಸೂಸುವಿಕೆಗೆ ಅವರ ಹೆಸರನ್ನೇ ಇಡಲಾಗಿದೆ.