First Republic Bank; ಅಮೆರಿಕದಲ್ಲಿ ಮತ್ತೊಂದು ಬ್ಯಾಂಕ್‌ ಪತನ

Team Udayavani, May 2, 2023, 7:50 AM IST

ನ್ಯೂಯಾರ್ಕ್‌:ಅಮೆರಿಕದಲ್ಲಿ ಉಂಟಾಗುತ್ತಿರುವ ಬ್ಯಾಂಕಿಂಗ್‌ ಬಿಕ್ಕಟ್ಟಿಗೆ ಬ್ರೇಕ್‌ ಹಾಕುವ ಸಲುವಾಗಿ, ಬ್ಯಾಂಕಿಂಗ್‌ ನಿಯಂತ್ರಣ ಸಂಸ್ಥೆಯು ಸೋಮವಾರ, ಸಂಕಷ್ಟದಲ್ಲಿರುವ ಫ‌ಸ್ಟ್‌ ರಿಪಬ್ಲಿಕ್‌ ಬ್ಯಾಂಕ್‌ನ ಎಲ್ಲ ಠೇವಣಿಗಳು ಹಾಗೂ ಬಹುತೇಕ ಆಸ್ತಿಪಾಸ್ತಿಗಳನ್ನು ಜೆಪಿ ಮೋರ್ಗನ್‌ ಚೇಸ್‌ ಬ್ಯಾಂಕ್‌ಗೆ ಮಾರಾಟ ಮಾಡಿದೆ.

ಸ್ಯಾನ್‌ಫ್ರಾನ್ಸಿಸ್ಕೋ ಮೂಲದ ಫ‌ಸ್ಟ್‌ ರಿಪಬ್ಲಿಕ್‌ ಬ್ಯಾಂಕ್‌ ಅಮೆರಿಕದಲ್ಲಿ ಕೇವಲ 2 ತಿಂಗಳ ಅವಧಿಯಲ್ಲಿ ಪತನಗೊಂಡ ಮೂರನೇ ಬ್ಯಾಂಕ್‌ ಆಗಿದೆ. ಸಿಲಿಕಾನ್‌ ವ್ಯಾಲಿ ಬ್ಯಾಂಕ್‌ ಮತ್ತು ಸಿಗ್ನೇಚರ್‌ ಬ್ಯಾಂಕ್‌ ಪತನಗೊಂಡ ಬಳಿಕ ಫ‌ಸ್ಟ್‌ ರಿಪಬ್ಲಿಕ್‌ ಬ್ಯಾಂಕ್‌ ಕೂಡ ಮುಚ್ಚುವ ಹಂತ ತಲುಪಿತ್ತು. ಅತ್ಯಧಿಕ ಮೊತ್ತದ ವಿಮಾರಹಿತ ಠೇವಣಿಗಳನ್ನು ಬ್ಯಾಂಕ್‌ ಹೊಂದಿರುವ ಕಾರಣ ಅದರ ಅಳಿವು-ಉಳಿವಿನ ಬಗ್ಗೆ ಠೇವಣಿದಾರರು ಆತಂಕಕ್ಕೊಳಗಾಗಿದ್ದರು.

ಈಗ ಫ‌ಸ್ಟ್‌ ರಿಪಬ್ಲಿಕ್‌ ಬ್ಯಾಂಕ್‌ ಅನ್ನು ಜೆಪಿ ಮೋರ್ಗನ್‌ ಚೇಸ್‌ ಬ್ಯಾಂಕ್‌ ಖರೀದಿಸಿದ ಕಾರಣ, ಹೂಡಿಕೆದಾರರು ನಿಟ್ಟುಸಿರು ಬಿಡುವಂತಾಗಿದೆ. ಅಲ್ಲದೇ, ಸೋಮವಾರದಿಂದಲೇ 8 ಪ್ರಾಂತ್ಯಗಳಲ್ಲಿರುವ ಫ‌ಸ್ಟ್‌ ರಿಪಬ್ಲಿಕ್‌ ಬ್ಯಾಂಕ್‌ನ 84 ಶಾಖೆಗಳು ಜೆಪಿ ಮೋರ್ಗನ್‌ ಚೇಸ್‌ ಬ್ಯಾಂಕ್‌ನ ಶಾಖೆಗಳಾಗಿ ಕಾರ್ಯಾರಂಭಿಸಿವೆ.