ವಿಮಾನ ಪತನ: ಪಾಕ್‌ ಮತ್ತೆ ಸುಳ್ಳು 

Team Udayavani, Mar 7, 2019, 12:30 AM IST

ಇಸ್ಲಾಮಾಬಾದ್‌: ಇತ್ತೀಚೆಗೆ ಭಾರತ-ಪಾಕ್‌ ನಡುವೆ ನಡೆದ ಉದ್ವಿಗ್ನ ಸ್ಥಿತಿ, ಅನಂತರದ ಬೆಳವಣಿಗೆಗಳ ಕುರಿತು ಪದೇ ಪದೆ ಸುಳ್ಳು ಹೇಳುತ್ತಾ ಸಿಕ್ಕಿಬಿದ್ದಿರುವ ಪಾಕಿಸ್ಥಾನ, ಇದೀಗ ಮತ್ತೂಂದು ಸುಳ್ಳಿನ ಸರಮಾಲೆಯನ್ನು ಹೆಣೆದಿದೆ. ಭಾರತದ ಎರಡು ವಿಮಾನಗಳನ್ನು ಹೊಡೆದುರುಳಿಸಿದ್ದೇವೆ ಎಂದು ಮತ್ತೂಂದು ಸುಳ್ಳನ್ನು ಪಾಕಿಸ್ಥಾನ ಹೇಳಿದೆ. ಅಲ್ಲಿನ ಸಂಸತ್‌ನ ಕೆಳ ಮನೆ ನ್ಯಾಷನಲ್‌ ಅಸೆಂಬ್ಲಿಯಲ್ಲಿ ಬುಧವಾರ ಮಾತನಾಡಿದ ವಿದೇಶಾಂಗ ಸಚಿವ ಶಾ ಮೆಹಮೂದ್‌ ಖುರೇಶಿ ಫೆ. 14ರ ಅನಂತರದ ಘಟನೆ ಬಳಿಕ ಭಾರತ ಪ್ರತಿರೋಧ ಕ್ರಮಗಳನ್ನು ಕೈಗೊಂಡ ವೇಳೆ ಪಾಕಿಸ್ಥಾನದ ವಾಯುಪಡೆ ಐಎಎಫ್ನ 2 ವಿಮಾನಗಳನ್ನು ಹೊಡೆದು ಉರುಳಿಸಿದೆ. ಭಾರತದ ವಿಮಾನಗಳು ಪಾಕಿಸ್ಥಾನದ ವಾಯು ಪ್ರದೇಶವನ್ನು ಅಕ್ರಮವಾಗಿ ಪ್ರವೇಶಿಸಿದ್ದಕ್ಕೇ ಈ ಕ್ರಮ ಕೈಗೊಳ್ಳಲಾಗಿದೆ ಎಂದಿದ್ದಾರೆ.

ಉಗ್ರರ ಮೃತದೇಹ ತೋರಿಸಿ: ಪುಲ್ವಾಮಾ ದಾಳಿಯಲ್ಲಿ ಅಸುನೀಗಿದ ಇಬ್ಬರು ಯೋಧರ ಕುಟುಂಬ ಸದಸ್ಯರು, ಐಎಎಫ್ ಬಾಲಾಕೋಟ್‌ನಲ್ಲಿ ನಡೆಸಿದ ದಾಳಿಯ ಬಗ್ಗೆ ಸಾಕ್ಷ್ಯ ನೀಡುವಂತೆ ಒತ್ತಾಯಿಸಿದ್ದಾರೆ. “ಯೋಧರ ಛಿದ್ರಗೊಂಡ ದೇಹದ ಭಾಗಗಳನ್ನು ನೋಡಿದ್ದೇವೆ.  ಉಗ್ರರ ಮೃತದೇಹ ನೋಡಿದರಷ್ಟೇ ನಮಗೆ ಸಮಾಧಾನವಾಗುತ್ತದೆ’ ಎಂದಿದ್ದಾರೆ.

ಕೇಸು ದಾಖಲಿಸಿ: ಪುಲ್ವಾಮಾ ಘಟನೆ ಕುರಿತ ಟ್ವೀಟ್‌ಗೆ ಬಿಜೆಪಿ ನಾಯಕರಿಂದ ಟೀಕೆಗೆ ಗುರಿಯಾಗಿರುವ ಕಾಂಗ್ರೆಸ್‌ ನಾಯಕ ದಿಗ್ವಿಜಯ ಸಿಂಗ್‌ ತಮ್ಮ ವಿರುದ್ಧ ಕೇಸು ದಾಖಲಿಸುವಂತೆ ಪ್ರಧಾನಿ ನರೇಂದ್ರ ಮೋದಿಯವರಿಗೆ ಸವಾಲು ಹಾಕಿದ್ದಾರೆ.  

ಪಾಕ್‌ ಶೆಲ್‌ ದಾಳಿ: ಜಮ್ಮು- ಕಾಶ್ಮೀರದ ರಜೌರಿ ಹಾಗೂ ಪೂಂಛ… ಜಿಲ್ಲೆಯ ಎಲ್‌ಒಸಿಯಲ್ಲಿ ಪಾಕಿಸ್ಥಾನದ ದಾಳಿ ಮುಂದುವರಿದಿದೆ.

ಮುಂದುವರಿದ “ಕಠಿನ ಕ್ರಮ’: ಉಗ್ರ ಸಂಘಟನೆಗಳ ವಿರುದ್ಧ “ಕಠಿನ ಕ್ರಮ’ ಮುಂದುವರಿಸಿರುವ ಪಾಕಿಸ್ಥಾನ ಬುಧ ವಾರ ಜಮಾತ್‌-ಉದ್‌-ದಾವಾ, ಅದರ ಸಹ ಸಂಸ್ಥೆ ಫ‌ಲಾಹ್‌-ಇ-ಇನ್ಸಾನಿಯತ್‌ ಫೌಂಡೇಷನ್‌ ಸಹಿತ ಹಲವು ಉಗ್ರ ಸಂಘಟನೆಗಳಿಗೆ ಸೇರಿದ ಸೆಮಿನರಿಗಳು, ಆಸ್ತಿಗಳನ್ನು ವಶಪಡಿಸಿಕೊಂಡಿದೆ. 

ಹೆಚ್ಚುವರಿ ಸೇನೆ ಜಮಾವಣೆ
ಭಾರತ ಮತ್ತು ಪಾಕಿಸ್ಥಾನದ ನಡುವೆ ಸಮರದ ವಾತಾವರಣ ತಲೆದೋರಿರುವ ಬೆನ್ನಲ್ಲೇ, ಪಾಕಿಸ್ಥಾನವು ಕಾಶ್ಮೀರದ ಬಳಿಯಿರುವ ತನ್ನ ಗಡಿ ನಿಯಂತ್ರಣ ರೇಖೆಯುದ್ದಕ್ಕೂ (ಎಲ್‌ಒಸಿ) ಹೆಚ್ಚುವರಿ ಸೈನ್ಯವನ್ನು ಹಾಗೂ ಯುದ್ಧ ಸಲಕರಣೆಗಳನ್ನು ಜಮೆ ಮಾಡುತ್ತಿರುವ ಮಾಹಿತಿ ಲಭ್ಯವಾಗಿವೆ. ಈ ಹಿನ್ನೆಲೆಯಲ್ಲಿ, ಭಾರತೀಯ ಸೇನೆಯು ಪಾಕಿಸ್ಥಾನವು ಕದನ ವಿರಾಮ ಉಲ್ಲಂಘನೆ ನಡೆಸಿದರೆ ತಕ್ಕ ಶಾಸ್ತಿ ಮಾಡುವುದಾಗಿ ಎಚ್ಚರಿಕೆ ನೀಡಿದೆ. ಪಾಕಿಸ್ಥಾನ- ಆಫ್ಘಾನಿಸ್ಥಾನದ ಗಡಿಯಲ್ಲಿ ಜಮೆಗೊಂಡಿದ್ದ ಪಾಕಿಸ್ಥಾನದ ಹೆಚ್ಚುವರಿ ಸೈನ್ಯ ಹಾಗೂ ಯುದ್ಧ ಸಲಕರಣೆಗಳನ್ನು ಎಲ್‌ಒಸಿ ಬಳಿಯ ನೌಶೇರಾ ಪ್ರಾಂತ್ಯದ ಕಡೆಗೆ ರವಾನಿಸಲಾಗುತ್ತಿದೆ ಎಂದು ಮೂಲಗಳು ತಿಳಿಸಿವೆ.

ಸೊಳ್ಳೆ ಹೊಡೆದ ಅನಂತರ ಲೆಕ್ಕ ಮಾಡುವುದಿಲ್ಲ
ಬಾಲಾಕೋಟ್‌ನಲ್ಲಿ ಭಾರತ ದಾಳಿ ನಡೆಸಿದ ಅನಂತರ ಅಲ್ಲಿ ಸತ್ತವರ ಸಂಖ್ಯೆಯೆಷ್ಟು ಎಂಬ ಬಗ್ಗೆ ಸಾಕ್ಷ್ಯ ನೀಡಿ ಎಂದು ವಿಪಕ್ಷಗಳು ಕೇಳುತ್ತಿರುವುದಕ್ಕೆ ಕೇಂದ್ರ ಸಚಿವ ವಿ.ಕೆ. ಸಿಂಗ್‌ ತೀಕ್ಷ್ಣ ಪ್ರತಿಕ್ರಿಯೆ ನೀಡಿದ್ದಾರೆ. ಸೊಳ್ಳೆಗಳನ್ನು ಸಾಯಿಸಿದ ಅನಂತರ ಅವುಗಳನ್ನು ಲೆಕ್ಕ ಮಾಡುತ್ತ ಕೂರುವುದಿಲ್ಲ. ಬದಲಿಗೆ ನೆಮ್ಮದಿಯಿಂದ ನಿದ್ರೆ ಮಾಡುತ್ತೇವೆಟ ಎಂದು ಟ್ವೀಟ್‌ನಲ್ಲಿ ಅವರು ಹೇಳಿದ್ದಾರೆ. ಅಷ್ಟೇ ಅಲ್ಲ, ಇನ್ನೊಂದೆಡೆ ಮುಂದಿನ ಬಾರಿ ಇಂಥ ದಾಳಿ ನಡೆಸುವಾಗ ಈ ರೀತಿ ಪ್ರಶ್ನೆ ಕೇಳುವವರನ್ನು ಕರೆದುಕೊಂಡು ಹೋಗಿ ಎಸೆಯ ಬೇಕು. ಎಷ್ಟು ಜನರು ಸತ್ತಿದ್ದಾರೆ ಎಂಬುದನ್ನು ನೋಡಿಕೊಂಡು ಬರಲಿ ಎಂದಿದ್ದಾರೆ.