ವಿಷಾನಿಲ ಪ್ರಯೋಗ ಆರೋಪ ಸುಳ್ಳು: ಅಸ್ಸಾದ್‌

Team Udayavani, Apr 14, 2017, 3:50 AM IST

ಡಮಾಸ್ಕಸ್‌/ವಿಶ್ವಸಂಸ್ಥೆ: ಸಿರಿಯಾದ ನಾಗರಿಕರ ಮೇಲೆ ವಿಷಾನಿಲ ಪ್ರಯೋಗ ಮಾಡಿದ ಆರೋಪವನ್ನು ಅಧ್ಯಕ್ಷ ಬಷರ್‌ ಅಲ್‌-ಅಸ್ಸಾದ್‌ ತಿರಸ್ಕರಿಸಿದ್ದಾರೆ. ಇದು ಶೇ.ನೂರಕ್ಕೆ ನೂರು ಸುಳ್ಳು ಎಂದಿದ್ದಾರೆ. ತಮ್ಮ ನೇತೃತ್ವದ ಸೇನೆಯ ಮೇಲೆ ಅಮೆರಿಕ ನಡೆಸಿದ ದಾಳಿ ಸಮರ್ಥಿಸಲು ಈ ವಾದ ಮುಂದಿಡಲಾಗುತ್ತದೆ ಎಂದಿದ್ದಾರೆ. ವರ್ಷಗಳ ಹಿಂದೆಯೇ ನಿಷೇಧಿತ ಶಸ್ತ್ರಾಸ್ತ್ರಗಳನ್ನು ನಾಶಪಡಿಸಲಾಗಿದೆ. ಹೀಗಿರುವಾಗ ಅವುಗಳನ್ನು ಬಳಸುವ ಮಾತೇ ಇಲ್ಲ ಎಂದಿದ್ದಾರೆ ಅಸ್ಸಾದ್‌. ಅಮೆರಿಕವೇ ರಹಸ್ಯವಾಗಿ ಉಗ್ರರಿಗೆ ಬೆಂಬಲ ನೀಡುತ್ತದೆ ಎಂದಿದ್ದಾರೆ.

ರಷ್ಯಾದ ವಿಟೋ: ಈ ನಡುವೆ ವಿಶ್ವಸಂಸ್ಥೆಯಲ್ಲಿ ಸಿರಿಯಾ ವಿರುದ್ಧ ಮಂಡಿಸಲಾದ ಖಂಡನಾ ನಿರ್ಣಯ ವಿರುದ್ಧ ರಷ್ಯಾ ವಿಟೋ ಅಧಿಕಾರ ಚಲಾಯಿಸಿದೆ.  ಈ ಮೂಲಕ ನಿರ್ಣಯವನ್ನು ವಿಫ‌ಲಗೊಳಿಸುವ, ಸಿರಿಯಾ ಸರ್ವಾಧಿಕಾರಿ ಬಶರ್‌ ಅಲ್‌ ಅಸ್ಸಾದ್‌ ಬೆನ್ನಿಗೆ ನಿಲ್ಲುವ ಕೆಲಸ ಮಾಡಿದೆ. ವಿಶ್ವಸಂಸ್ಥೆ ಭದ್ರತಾ ಮಂಡಳಿಯಲ್ಲಿ ಖಂಡನಾ ನಿರ್ಣಯ ಮತ್ತು ಘಟನೆ ಕುರಿತು ತನಿಖೆ ನಡೆಸುವ ನಿರ್ಣಯದ ಕರಡನ್ನು ಫ್ರಾನ್ಸ್‌ , ಅಮೆರಿಕ, ಬ್ರಿಟನ್‌ ಮಂಡಿಸಿದ್ದವು.