ಗಿಫ್ಟ್ ನೀಡಿದ್ದೇ ಮುಳ್ಳಾಯಿತೆ?

Team Udayavani, Nov 23, 2018, 6:00 AM IST

ಪೋರ್ಟ್‌ ಬ್ಲೇರ್‌: ಇದೇ ತಿಂಗಳ ನ.14 ರಂದು ಅಂಡಮಾನ್‌ ಸಮೀಪದ ಸೆಂಟಿನೆಲ್‌ ದ್ವೀಪದಲ್ಲಿನ ಅನಾಗರಿಕ ಬುಡಕಟ್ಟು ಜನಾಂಗವನ್ನು ಕ್ರೈಸ್ತ ಧರ್ಮಕ್ಕೆ ಮತಾಂತರಿಸುವ ಪ್ರಯತ್ನದೊಂದಿಗೆ ಅಲ್ಲಿಗೆ ಹೋಗಿದ್ದ ಅಮೆರಿಕದ ಧರ್ಮ ಪ್ರಚಾರಕ ಜಾನ್‌ ಅಲೆನ್‌ ಚೌ ಅವರನ್ನು ಅಲ್ಲಿನ ಆದಿವಾಸಿಗಳು ಎರಡು ದಿನಗಳ ಕಾಲ ಬಂಧಿಯಾಗಿಟ್ಟುಕೊಂಡು, ನ.17 ರಂದು ಹತ್ಯೆಗೈದಿದ್ದಾರೆಂದು ಅಂಡ ಮಾನ್‌ ಮತ್ತು ನಿಕೋಬಾರ್‌ನ ಡಿಜಿಪಿ ದೀಪೇಂದ್ರ ಪಾಠಕ್‌ ತಿಳಿಸಿದ್ದಾರೆ. 

ಆದಿವಾಸಿಗಳ ಸ್ನೇಹ ಬೆಳೆಸಲು ತಂದಿದ್ದ ವೈದ್ಯಕೀಯ ಕಿಟ್‌, ಮೀನು ಹಿಡಿಯುವ ಸಲಕರಣೆ, ಫ‌ುಟ್ಬಾಲ್‌, ಕತ್ತರಿ ಮುಂತಾದುವನ್ನು ಅವರಿಗೆ ಜಾನ್‌ ನೀಡಲು ಮುಂದಾದಾಗ ಅನುಮಾನಿಸಿ ಕೊಲ್ಲಲಾಗಿದೆ ಎಂದಿದ್ದಾರೆ ಪಾಠಕ್‌. ನಿಷೇಧದ ಪ್ರದೇಶಕ್ಕೆ ಜಾನ್‌ ನೀಡಿದ 25 ಸಾವಿರ ರೂ. ಆಮಿಷಕ್ಕೆ ಬಲಿಯಾಗಿ ಸರಕಾರದ ಅನುಮತಿ ಪಡೆಯದೇ ಅವರನ್ನು ಅಲ್ಲಿಗೆ ಕೊಂಡೊಯ್ದಿದ್ದಕ್ಕಾಗಿ 7 ಮೀನುಗಾರರನ್ನು ಬಂಧಿಸಲಾಗಿದೆ ಎಂದಿದ್ದಾರೆ. ಅತ್ತ, ಅಮೆರಿಕದಲ್ಲಿನ ಜಾನ್‌ ಕುಟುಂಬ, “ಜಾನ್‌ ಪ್ರೀತಿಸುತ್ತಿದ್ದ ಆದಿವಾಸಿಗಳನ್ನು ನಾವು ಕ್ಷಮಿಸುತ್ತೇವೆ, ನೀವೂ ಕ್ಷಮಿಸ ಬೇಕು. ಜಾನ್‌ನ ಆತ್ಮೀಯರಾಗಿದ್ದ ಮೀನುಗಾರರನ್ನು ಬಿಡುಗಡೆ ಮಾಡಬೇಕು’ ಎಂದು ಇನ್‌ಸ್ಟಾಗ್ರಾಂ ಮೂಲಕ ಕೋರಿದೆ. ಏತನ್ಮಧ್ಯೆ, ರಾಷ್ಟ್ರೀಯ ಪರಿಶಿಷ್ಟ ವರ್ಗಗಳ ಆಯೋಗ (ಎನ್‌ಸಿಎಸ್‌ಟಿ) ಪ್ರಕರಣದ ಬಗ್ಗೆ ವರದಿಸಲ್ಲಿಸುವಂತೆ ಕೇಂದ್ರ ಗೃಹ ಇಲಾಖೆಗೆ ಸೂಚಿಸಿದೆ.