London; ಉನ್ನತ ವ್ಯಾಸಂಗಕ್ಕಾಗಿ ಲಂಡನ್​​ಗೆ ತೆರಳಿದ್ದ ಹೈದರಬಾದ್‌ ಮಹಿಳೆ ಕೊಲೆ

Team Udayavani, Jun 15, 2023, 7:20 AM IST

ಲಂಡನ್‌/ಹೈದರಾಬಾದ್‌:ಲಂಡನ್‌ನಲ್ಲಿ ಹೈದರಬಾದ್‌ನ 27 ವರ್ಷದ ಮಹಿಳೆಯನ್ನು ಚೂರಿಯಲ್ಲಿ ಇರಿದು ಕೊಲೆ ಮಾಡಲಾಗಿದೆ.

ಉನ್ನತ ಶಿಕ್ಷಣಕ್ಕಾಗಿ ಕೊಂತಂ ತೇಜಸ್ವಿನಿ ಕಳೆದ ವರ್ಷ ಮಾರ್ಚ್‌ನಲ್ಲಿ ಲಂಡನ್‌ಗೆ ತೆರಳಿದ್ದರು. ಅಲ್ಲಿನ ವೆಂಬ್ಲಿಯ ವಸತಿ ಪ್ರದೇಶ ನೀಲ್ಡ್‌ ಕ್ರೆಸೆಂಟ್‌ನಲ್ಲಿ ಮಂಗಳವಾರ ಬೆಳಗ್ಗೆ 10 ಗಂಟೆ ಸುಮಾರಿಗೆ ಬ್ರೆಜಿಲಿಯನ್‌ ವ್ಯಕ್ತಿ ತೇಜಸ್ವಿನಿ ಮೇಲೆ ದಾಳಿ ನಡೆಸಿದ್ದಾನೆ.

ತೀವ್ರವಾಗಿ ಗಾಯಗೊಂಡ ಅವರು ಸ್ಥಳದಲ್ಲೇ ಮೃತಪಟ್ಟಿದ್ದಾರೆ. 28 ವರ್ಷದ ಮತ್ತೊಬ್ಬ ಮಹಿಳೆಗೆ ಗಾಯಗಳಾಗಿದ್ದು, ಸ್ಥಳೀಯ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ.

ದಾಳಿ ನಡೆಸಿದ ವ್ಯಕ್ತಿ ಕೂಡ ತೇಜಸ್ವಿನಿ ಮತ್ತು ಅವರ ಸ್ನೇಹಿತರು ಇದ್ದ ವಸತಿ ಗೃಹದಲ್ಲಿ ಒಂದು ವಾರದಿಂದ ಜತಗೆ ವಾಸಿಸುತ್ತಿದ್ದ. ಘಟನೆ ನಡೆದ ಕೆಲವೇ ಗಂಟೆಗಳಲ್ಲಿ ಕೃತ್ಯವೆಸಗಿದ ವ್ಯಕ್ತಿಯನ್ನು ಬಂಧಿಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.