ರೈಲುಗಳ ಮುಖಾಮುಖಿ ಢಿಕ್ಕಿ: ಭೀಕರ ಅಪಘಾತದಲ್ಲಿ 26 ಮಂದಿಯ ದಾರುಣ ಅಂತ್ಯ

Team Udayavani, Mar 1, 2023, 9:07 AM IST

ಅಥೆನ್ಸ್‌: ರೈಲುಗಳ ನಡುವೆ ಮುಖಾಮುಖಿ ಢಿಕ್ಕಿ ಸಂಭವಿಸಿ ಕನಿಷ್ಠ 26 ಮಂದಿ ಮೃತಪಟ್ಟು,85 ಕ್ಕೂ ಅಧಿಕ ಮಂದಿ ಗಾಯಗೊಂಡಿರುವ ಘಟನೆ ಗ್ರೀಸ್‌ ನಲ್ಲಿ ಮಂಗಳವಾರ ತಡರಾತ್ರಿ (ಫೆ.28 ರಂದು) ನಡೆದಿರುವುದು ವರದಿಯಾಗಿದೆ.

ಅಥೆನ್ಸ್‌ನ ಉತ್ತರ ನಗರವಾದ ಥೆಸಲೋನಿಕಿಗೆ ಪ್ರಯಾಣಿಸುತ್ತಿದ್ದ ಪ್ಯಾಸೆಂಜರ್ ರೈಲು ಮಧ್ಯ ಗ್ರೀಸ್‌ನ ಲಾರಿಸ್ಸಾ ನಗರದಿಂದ ಬರುತ್ತಿದ್ದ ಸರಕು ತುಂಬಿದ (ಕಾರ್ಗೋ) ರೈಲಿಗೆ ಢಿಕ್ಕಿ ಹೊಡೆದ ಪರಿಣಾಮ ಪ್ಯಾಸೆಂಜರ್ ರೈಲಿನ ಮೊದಲ ನಾಲ್ಕು ಬೋಗಿಗಳು ಹಳಿ ತಪ್ಪಿದೆ. ಆ ಬಳಿಕ ಮೊದಲ ಎರಡು ಬೋಗಿಗಳಿಗೆ ಬೆಂಕಿ ಹೊತ್ತಿಕೊಂಡಿದೆ ಎಂದು ಥೆಸಲಿ ಪ್ರದೇಶದ ಗವರ್ನರ್ ಕಾನ್ಸ್ಟಾಂಟಿನೋಸ್ ಅಗೋರಾಸ್ಟೋಸ್ ಹೇಳಿದ್ದಾರೆ.

ರೈಲಿನಲ್ಲಿ 350 ಮಂದಿ ಪ್ರಯಾಣಿಸುತ್ತಿದ್ದರು, ಇದರಲ್ಲಿ 250 ಮಂದಿಯನ್ನು ಸುರಕ್ಷಿತವಾಗಿ ಹೊರ ತೆಗೆಯಲಾಗಿದೆ. 26 ಮಂದಿ ಮೃತಪಟ್ಟಿದ್ದು, ಇನ್ನುಳಿದ 85 ಮಂದಿ ಘಟನೆಯಲ್ಲಿ ಗಾಯಗೊಂಡಿದ್ದಾರೆ ಎಂದು ಗವರ್ನರ್ ಕಾನ್ಸ್ಟಾಂಟಿನೋಸ್ ಅಗೋರಾಸ್ಟೋಸ್ ಹೇಳಿದ್ದಾರೆ.

ರೈಲುಗಳು ಢಿಕ್ಕಿ ಹೊಡೆದಾಗ ನಮಗೆ ಭೂಕಂಪನದ ಅನುಭವವಾಯಿತೆಂದು ಪ್ರಯಾಣಿಕರೊಬ್ಬರು ಹೇಳಿದ್ದಾರೆ.

ರಕ್ಷಣಾ ಕಾರ್ಯಚರಣೆ ಮುಂದುವರೆದಿದ್ದು, ಸಾವು – ನೋವಿನ ಪ್ರಮಾಣ ಹೆಚ್ಚಾಗುವ ಸಾಧ್ಯತೆಯಿದೆ ಎಂದು ವರದಿ ತಿಳಿಸಿದೆ.