ವಿಶ್ವಸಂಸ್ಥೆಯ ಮಾನವ ಹಕ್ಕು ಕೌನ್ಸಿಲ್‌ಗೆ ಭಾರತ ಲಗ್ಗೆ

Team Udayavani, Oct 13, 2018, 10:22 AM IST

ವಿಶ್ವಸಂಸ್ಥೆ: ಭಾರತಕ್ಕೆ ವಿಶ್ವಸಂಸ್ಥೆಯ ಮಾನವ ಹಕ್ಕುಗಳ ಸಂರಕ್ಷಣಾ ಕೌನ್ಸಿಲ್‌ನ ಸದಸ್ಯತ್ವ ಸಿಕ್ಕಿದೆ. ಮೂರು ವರ್ಷಗಳ ಈ ಸದಸ್ಯತ್ವದ ಅವಧಿ 2019ರ ಜ. 1ರಿಂದ ಆರಂಭಗೊಳ್ಳಲಿದೆ. 193 ಸದಸ್ಯ ರಾಷ್ಟ್ರಗಳುಳ್ಳ ವಿಶ್ವಸಂಸ್ಥೆಯ ಸಾಮಾನ್ಯ ಸಭೆಯಲ್ಲಿ ಶುಕ್ರವಾರ ಕೌನ್ಸಿಲ್‌ಗೆ ನೂತನ ಸದಸ್ಯರನ್ನು ಆರಿಸಲು ಚುನಾವಣೆ ನಡೆಸಲಾಗಿತ್ತು. ಒಟ್ಟು 18 ಸದಸ್ಯ ಸ್ಥಾನಗಳಿಗಾಗಿ ನಡೆದ ಗೌಪ್ಯ ಮತದಾನದಲ್ಲಿ ಪ್ರತಿ ದೇಶಕ್ಕೆ ಕನಿಷ್ಠ 97 ಮತಗಳು ಬೇಕಿದ್ದವು. ಏಷ್ಯಾ ಪೆಸಿಫಿಕ್‌ ಪ್ರಾಂತ್ಯದ ಪ್ರಾತಿನಿಧ್ಯಕ್ಕಾಗಿ ಚುನಾವಣೆಗೆ ನಿಂತಿದ್ದ ಭಾರತ, ಎಲ್ಲರಿಗಿಂತ ಹೆಚ್ಚು ಅಂದರೆ 188 ಮತಗಳನ್ನು ಪಡೆದು ಕೌನ್ಸಿಲ್‌ಗೆ ಲಗ್ಗೆಯಿಟ್ಟಿತು. ಏಷ್ಯಾ ಪೆಸಿಫಿಕ್‌ ಭಾಗಕ್ಕೆ ಕೌನ್ಸಿಲ್‌ನಲ್ಲಿ ಐದು ಸ್ಥಾನಗಳಿದ್ದು, ಭಾರತದೊಂದಿಗೆ ಈ ಪ್ರಾಂತ್ಯದಿಂದ ಬಹರೇನ್‌, ಬಾಂಗ್ಲಾದೇಶ, ಫಿಜಿ ಮತ್ತು ಫಿಲಿಪ್ಪೀನ್ಸ್‌ ರಾಷ್ಟ್ರಗಳೂ ಆಯ್ಕೆಯಾಗಿವೆ.