ಬೆಂಗಳೂರು – ಚೆನ್ನೈ ರೈಲ್ವೇ: ಚೀನದ ನೆರವು ಕೋರಿಕೆ

Team Udayavani, Apr 16, 2018, 10:00 AM IST

ಬೀಜಿಂಗ್‌: ಬೆಂಗಳೂರು – ಚೈನ್ನೈ ರೈಲ್ವೇ ಕಾರಿಡಾರ್‌ ವೇಗ ಹೆಚ್ಚಿಸಲು ಹಾಗೂ ಆಗ್ರಾ ಮತ್ತು ಝಾನ್ಸಿ ನಿಲ್ದಾಣಗಳ ಪುನರಾಭಿವೃದ್ಧಿಗೆ ಭಾರತವು ಚೀನದ ನೆರವು ಕೋರಿದೆ. ಉಭಯ ರಾಷ್ಟ್ರಗಳ ನಡುವೆ ನಡೆದ ಆರ್ಥಿಕ ದ್ವಿಪಕ್ಷೀಯ ಮಾತುಕತೆಯಲ್ಲಿ ಭಾರತ, ಈ ಕುರಿತ ಪ್ರಸ್ತಾವನೆಯನ್ನು ಚೀನ ಮುಂದಿಟ್ಟಿದೆ ಎಂದು ನೀತಿ ಆಯೋಗದ ಉಪಾಧ್ಯಕ್ಷ ರಾಜೀವ್‌ ಕುಮಾರ್‌ ಹೇಳಿದ್ದಾರೆ.

ಆಗ್ರಾ ಮತ್ತು ಝಾನ್ಸಿ ರೈಲ್ವೇ ನಿಲ್ದಾಣಗಳ ಪುನರಾಭಿವೃದ್ಧಿ ಕುರಿತ ಪ್ರಸ್ತಾವವನ್ನು ಈ ಹಿಂದೆಯೇ ಚೀನದ ಮುಂದಿಡಲಾಗಿತ್ತು. ಇದೀಗ ಮತ್ತೆ ಪ್ರಸ್ತಾಪಿಸಲಾಗಿದೆ. ರೈಲ್ವೇ ನಿಲ್ದಾಣಗಳ ಅಭಿವೃದ್ಧಿ ಒಂದು ದೊಡ್ಡ ಯೋಜನೆಯಾಗಿದೆ. ಸುಮಾರು 600 ರೈಲ್ವೇ ನಿಲ್ದಾಣಗಳನ್ನು ಅಭಿವೃದ್ಧಿಪಡಿಸಲಾಗುತ್ತಿದ್ದು, ಇದರಲ್ಲಿ ಯಾವುದಕ್ಕೆ ಬೇಕಾದರೂ ಚೀನ ಬಿಡ್‌ ಮಾಡಬಹುದು ಎಂದು ರಾಜೀವ್‌ ಕುಮಾರ್‌ ತಿಳಿಸಿದ್ದಾರೆ.