ಪತ್ರಕರ್ತ ರವೀಶ್‌ಕುಮಾರ್‌ಗೆ ರೆಮೊನ್‌ ಮ್ಯಾಗ್ಸೆಸ್ಸೆ ಪ್ರಶಸ್ತಿ

Team Udayavani, Aug 3, 2019, 5:18 AM IST

ಮನಿಲಾ: ಪ್ರಸಕ್ತ ಸಾಲಿನ ರೆಮೊನ್‌ ಮ್ಯಾಗ್ಸೆಸ್ಸೆ ಪ್ರಶಸ್ತಿಗೆ ಹಿರಿಯ ಪತ್ರಕರ್ತ ರವೀಶ್‌ ಕುಮಾರ್‌ (44) ಭಾಜನ ರಾಗಿದ್ದಾರೆ. ಅವರ ಜತೆಗೆ ಮ್ಯಾನ್ಮಾರ್‌ನ ಕೋ ಸೆ ವಿನ್‌, ಥಾಯ್ಲೆಂಡ್‌ನ‌ ಆಂಗ್‌ಖನ ನೀಲಪೈಜಿತ್‌, ಫಿಲಿಪ್ಪೀನ್ಸ್‌ನ ರೆಮುಂಡೋ ಪುಜಂತೆ ಕಯಬ್ಯೂ, ದಕ್ಷಿಣ ಕೊರಿಯಾದ ಕಿಮ್‌ ಜಾಂಗ್‌ ಕಿ ಅವರಿಗೂ ‘ಏಷ್ಯಾದ ನೊಬೆಲ್’ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿರುವ ಈ ಪ್ರಶಸ್ತಿ ಲಭಿಸಿದೆ.

‘ಎನ್‌ಡಿಟಿವಿ ಇಂಡಿಯಾ’ ಹಿಂದಿ ಸುದ್ದಿವಾಹಿನಿಯಲ್ಲಿ ಹಿರಿಯ ಕಾರ್ಯನಿರ್ವಾಹಕ ಸಂಪಾದಕರಾಗಿರುವ ರವೀಶ್‌ ಕುಮಾರ್‌ ಅವರು ನಡೆಸಿಕೊಡುವ ‘ಪ್ರೈಮ್‌ ಟೈಮ್‌’ ಎಂಬ ಕಾರ್ಯಕ್ರಮಕ್ಕಾಗಿ ಈ ಗೌರವ ಸಂದಿದೆ. ‘ಜನಸಾಮಾನ್ಯರು ಎದುರಿಸುತ್ತಿರುವ ಸಮಸ್ಯೆಗಳನ್ನು ವರದಿ ಮಾಡುವ ಅವರು, ಜನರ ಸಮಸ್ಯೆಗಳಿಗೆ ಧ್ವನಿಯಾಗುವ ನೈಜ ಪತ್ರಕರ್ತ’ ಎಂದು ಪ್ರಶಸ್ತಿ ಆಯ್ಕೆ ಮಂಡಳಿ ಹೇಳಿದೆ. ಆ.31 ರಂದು ನಡೆಯುವ ಮನಿಲಾದಲ್ಲಿ ನಡೆಯುವ ಕಾರ್ಯ ಕ್ರಮದಲ್ಲಿ ಪ್ರಶಸ್ತಿ ನೀಡಿ ಗೌರವಿಸಲಾಗುತ್ತದೆ. 1957ರಲ್ಲಿ ಈ ಪ್ರಶಸ್ತಿ ಸ್ಥಾಪಿಸಲಾಗಿತ್ತು.