ಲಾಸ್ ಏಂಜಲೀಸ್: ತರಕಾರಿ ಅಂಗಡಿಗೆ ನುಗ್ಗಿದ ಮುಸುಕುಧಾರಿ- ಗುಂಡಿಟ್ಟು ಯುವಕನ ಹತ್ಯೆ

Team Udayavani, Feb 24, 2020, 1:10 PM IST

ವಾಷಿಂಗ್ಟನ್: ತರಕಾರಿ ಶಾಪ್ ಗೆ ನುಗ್ಗಿದ್ದ ಮುಸುಕುಧಾರಿ ವ್ಯಕ್ತಿಯೊಬ್ಬ ಭಾರತೀಯ ಮೂಲದ ಯುವಕನನ್ನು ಗುಂಡಿಕ್ಕಿ ಹತ್ಯೆಗೈದಿರುವ ಘಟನೆ ಲಾಸ್ ಏಂಜಲೀಸ್ ನಲ್ಲಿ ನಸುಕಿನ ವೇಳೆ ನಡೆದಿದೆ ಎಂದು ಪೊಲೀಸ್ ಅಧಿಕಾರಿಗಳು ತಿಳಿಸಿದ್ದಾರೆ.

ಮಣಿಂದರ್ ಸಿಂಗ್  ಸಾಹಿ(31ವರ್ಷ) ವಿವಾಹಿತನಾಗಿದ್ದು, ಇಬ್ಬರು ಮಕ್ಕಳಿದ್ದಾರೆ. ಕ್ಯಾಲಿಫೋರ್ನಿಯಾದ ಲಾಸ್ ಏಂಜಲೀಸ್ ಕೌಂಟಿಯ ವಿಟ್ಟಿಯರ್ ನಗರದಲ್ಲಿನ 7 ಇಲೆವೆನ್ ತರಕಾರಿ ಮಳಿಗೆಯಲ್ಲಿ ಸಿಂಗ್ ಕಾರ್ಯನಿರ್ವಹಿಸುತ್ತಿದ್ದ.

ಸಿಂಗ್ ಮೂಲತಃ ಹರ್ಯಾಣದ ಕರ್ನಾಲ್ ನವನಾಗಿದ್ದು, ರಾಜಕೀಯ ಸಹವಾಸ ಬಿಟ್ಟು ಕಳೆದ ಆರು ತಿಂಗಳ ಹಿಂದಷ್ಟೇ ಸಾಹಿ ಅಮೆರಿಕ ಆಗಮಿಸಿರುವುದಾಗಿ ವರದಿ ತಿಳಿಸಿದೆ.

ಇಡೀ ಕುಟುಂಬಕ್ಕೆ ಜೀವನಾಧಾರವಾಗಿದ್ದ ಏಕೈಕ ವ್ಯಕ್ತಿಯಾಗಿದ್ದ ಸಾಹಿ. ಈತ ಪತ್ನಿ ಮತ್ತು ಮಕ್ಕಳಿಗೆ ಹಣ ಕಳುಹಿಸುತ್ತಿದ್ದ ಎಂದು ಅಮೆರಿಕದಲ್ಲಿರುವ ಸಂಬಂಧಿಕರು ತಿಳಿಸಿರುವುದಾಗಿ ವರದಿ ವಿವರಿಸಿದೆ.