ಇಸ್ರೋಗೆ ಸಿಗದ ಚಂದ್ರಯಾನ ನಾಸಾಕ್ಕೆ ಸಿಕ್ಕಿತು

Team Udayavani, Mar 11, 2017, 3:45 AM IST

ವಾಷಿಂಗ್ಟನ್‌: ಏಳು ವರ್ಷಗಳ ಹಿಂದೆ ಭೂಮಿ ಜತೆಗಿನ ಸಂಪರ್ಕ ಕಳೆದುಕೊಂಡು “ಕಣ್ಮರೆ’ಯಾಗಿದ್ದ ಭಾರತದ ಮಹತ್ವಾಕಾಂಕ್ಷಿ ಚಂದ್ರ ಅಧ್ಯಯನ ನೌಕೆ “ಚಂದ್ರಯಾನ 1′ ಇದೀಗ ದಿಢೀರಾಗಿ ನಾಸಾ ವಿಜ್ಞಾನಿಗಳ ಕಣ್ಣಿಗೆ ಬಿದ್ದಿದೆ.

2008ರಲ್ಲಿ ಉಡಾವಣೆಗೊಂಡಿದ್ದ ಚಂದ್ರಯಾನ ಚಂದಿರನ ಅಂಗಳದಲ್ಲಿ ನೀರಿರುವುದನ್ನು ಗುರುತಿಸಿ ಹೆಗ್ಗಳಿಕೆ ಮೆರೆದಿತ್ತು. ಆದರೆ, ಉಡಾವಣೆಯಾಗಿ ವರ್ಷ ಕಳೆಯುವಷ್ಟರಲ್ಲೇ ಅಂದರೆ, 2009ರ ಆ.29ರಂದು ನಿರ್ವಹಣಾ ಘಟಕದ ಸಂಪರ್ಕ ಕಡಿದುಕೊಂಡಿದ್ದ ಈ ನೌಕೆ, ಎಲ್ಲಿದೆ ಎನ್ನುವ ಸುಳಿವೇ ಇರಲಿಲ್ಲ. ಇದಕ್ಕೆ ಆಗ ಪ್ರತಿಕ್ರಿಯಿಸಿದ್ದ ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಕೇಂದ್ರ (ಇಸ್ರೊ) “”ಚಂದ್ರಯಾನ ಯೋಜನೆ ಪರಿಪೂರ್ಣಗೊಂಡಿದೆ” ಎಂದು ಘೋಷಿಸಿತ್ತು. ಇದರೊಂದಿಗೆ ಒಂದೇ ವರ್ಷದ ಅವಧಿಯಲ್ಲಿ ಭಾರತದ ಮಹತ್ವಾಕಾಂಕ್ಷಿ ಯೋಜನೆ ಚಂದ್ರಯಾನ ಅಂತ್ಯಗೊಂಡಿತ್ತು. ಆದರೆ, ಈಗ ನಾಸಾ ವಿಜ್ಞಾನಿಗಳು ಈ ನೌಕೆ ಚಂದ್ರನ ಸುತ್ತ “ಜೀವಂತ’ವಾಗಿ ಸುತ್ತುತ್ತಿರುವುದನ್ನು ಪತ್ತೆಹಚ್ಚಿದ್ದು, ಭಾರತದ ನಿರೀಕ್ಷೆ ಮತ್ತೂಮ್ಮೆ ಗರಿಗೆದರಿದೆ. ಈ ನೌಕೆ ಜತೆ ಮತ್ತೆ ಸಂಪರ್ಕ ಸಾಧಿಸಬಹುದು ಎನ್ನುವ ಅಭಿಪ್ರಾಯ ವಿಜ್ಞಾನಿಗಳಿಂದ ವ್ಯಕ್ತವಾಗಿದೆ.

ಕ್ಯಾಲಿಫೋರ್ನಿಯಾದಲ್ಲಿರುವ ನಾಸಾದ ಜೆಟ್‌ ಪ್ರಾಪಲÒನ್‌ ಲ್ಯಾಬೋರೇಟರಿ (ಜೆಪಿಎಲ್‌), ಚಂದ್ರನ ಮೇಲ್ಮೆ„ನಿಂದ ಸರಿಸುಮಾರು 200 ಕಿಲೋಮೀಟರ್‌ ದೂರದಲ್ಲಿ ಚಂದ್ರನ ಸುತ್ತುತ್ತಿರುವುದಾಗಿ ನಾಸಾ ವಿಜ್ಞಾನಿಗಳ ತಂಡ ಹೇಳಿದೆ. ಆಧುನಿಕ ತಂತ್ರಜ್ಞಾನಗಳನ್ನು ಒಳಗೊಂಡಿರುವ ಭೂಆಧಾರಿತ ರೆಡಾರ್‌ನಿಂದ ಇದು ಸಾಧ್ಯವಾಗಿದೆ ಎಂದಿದ್ದಾರೆ ನಾಸಾ ವಿಜ್ಞಾನಿಗಳು.

ಈ ಕುರಿತು ಮಾಹಿತಿ ನೀಡಿರುವ ಜೆಪಿಎಲ್‌ ಮತ್ತು ಟೆಸ್ಟ್‌ ಪ್ರಾಜಕ್ಟ್‌ನ ರೆಡಾರ್‌ ವಿಜ್ಞಾನಿ ಮರಿನಾ ಬ್ರೋಜೋವಿಕ್‌, ನಾಸಾದ ಚಂದ್ರಾನ್ವೇಷಣೆ ಉಪಗ್ರಹ (ಎಲ್‌ಆರ್‌ಒ) ಮತ್ತು ಭಾರತೀಯ ಬಾಹ್ಯಾಕಾಶ ಅಧ್ಯಯನಾ ಕೇಂದ್ರ (ಇಸ್ರೋ) ಅಭಿವೃದ್ಧಿಪಡಿಸಿದ್ದ ಚಂದ್ರಯಾನ 1 ನೌಕೆಯನ್ನು ಚಂದ್ರ ಮೇಲ್ಮೆ„ ಅಧ್ಯಯನ ಯೋಗ್ಯ ರೆಡಾರ್‌ನಿಂದ ಪತ್ತೆಮಾಡಲಾಗಿದೆ ಎಂದು ತಿಳಿಸಿದೆ.

2003, ಆಗಸ್ಟ್‌ 15ರಂದು ಅಂದಿನ ಪ್ರಧಾನಿ ಅಟಲ್‌ ಬಿಹಾರಿ ವಾಜಪೇಯಿ ಅವರು ತಮ್ಮ ಭಾಷಣದಲ್ಲಿ ಈ ಯೋಜನೆ ಪ್ರಕಟಿಸಿದ್ದರು.

3,80,000 ದೂರದಲ್ಲಿದೆ ನೌಕೆ!
ವಿಜ್ಞಾನಿಗಳು ನೀಡಿರುವ ಮಾಹಿತಿಯ ಪ್ರಕಾರ, ಚಂದ್ರಯಾನ-1 ಭೂಮಿಯಿಂದ ಅಂದಾಜು 3,80,000 ಕಿಲೋಮೀಟರ್‌ ದೂರದಲ್ಲಿರುವುದು ಕಂಡುಬಂದಿದೆ. ಈ ಕಾರ್ಯಾಚರಣೆಗೆ ಜೆಪಿಎಲ್‌ ತಂಡ 70 ಮೀಟರ್‌ ಆ್ಯಂಟೇನಾ ಬಳಸಿಕೊಂಡಿದೆ. ಇದು ಕ್ಯಾಲಿಫೋರ್ನಿಯಾದ ಗೋಲ್ಡ್‌ಸ್ಟೋನ್‌ ದೀಪ್‌ ಸ್ಪೇಸ್‌ ಕಮ್ಯುನಿಕೇಷನ್‌ ಕಾಂಪ್ಲೆಕ್ಸ್‌ನಲ್ಲಿದ್ದು, ಭಾರಿ ಪ್ರಮಾಣದ ಬೆಳಕು ಚೆಲ್ಲುವಂತೆ ಮಾಡಿ  ಪತ್ತೆ ಮಾಡುವಲ್ಲಿ ನಾಸಾ ತಂಡ ಯಶಸ್ವಿಯಾಗಿದೆ.

ಚಂದ್ರಯಾನ 1 ಸಂಕ್ಷಿಪ್ತ ಪರಿಚಯ
* ಉದ್ದಗಲ, ಎತ್ತರ 1.5 ಮೀಟರ್‌
* ಉಡಾವಣೆಯ ವೇಳೆ ಇದ್ದ ತೂಕ 1,380 ಕಿಲೋಗ್ರಾಂ.
* ಶ್ರೀಹರಿಕೋಟಾದ ಸತೀಶ್‌ ಧವನ್‌ ಬಾಹ್ಯಾಕಾಶ ಕೇಂದ್ರದಿಂದ ಉಡಾವಣೆ.
* ಬಳಸಲಾದ ರಾಕೆಟ್‌ ಪಿಎಸ್‌ಎಲ್‌ವಿ-ಎಕ್ಸ್‌ಎಲ್‌ ಸಿ11
* ನೌಕೆ ಅಭಿವೃದ್ಧಿಗೆ ತಗುಲಿದ ವೆಚ್ಚ 379.72 ಕೋಟಿ ರೂ.