5 ಲಕ್ಷ ಕೋಟಿ ಡಾಲರ್‌ ಸಾಲಕ್ಕೆ ಮೊರೆಯಿಟ್ಟ ಇರಾನ್‌

Team Udayavani, Apr 12, 2020, 4:32 PM IST

ಟೆಹ್ರಾನ್‌: ಕೋವಿಡ್‌-19 ಸೋಂಕು ಹೊಡೆತದಿಂದ ತತ್ತರಿಸಿರುವ ಇರಾನ್‌ ಪರಿಹಾರ ಕಾರ್ಯಗಳಿಗಾಗಿ 5 ಲಕ್ಷ ಕೋಟಿ ಡಾಲರ್‌ ಮೊತ್ತವನ್ನು ತುರ್ತು ಸಾಲದ ರೂಪದಲ್ಲಿ ನೀಡುವಂತೆ ಅಂತಾರಾಷ್ಟ್ರೀಯ ಹಣಕಾಸು ಸಂಸ್ಥೆಗೆ (ಐಎಂಎಫ್) ಮೊರೆಯಿಟ್ಟಿದೆ.

ಕೋವಿಡ್‌-19 ಗೆ ಇರಾನ್‌ನಲ್ಲಿ 4,000ಕ್ಕೂ ಹೆಚ್ಚು ಮಂದಿ ಬಲಿಯಾಗಿದ್ದಾರೆ ಹಾಗೂ 65,000 ಮಂದಿ ಸೋಂಕಿತರಿದ್ದಾರೆ. ಅಮೆರಿಕ ವಿಧಿಸಿರುವ ಆರ್ಥಿಕ ನಿರ್ಬಂಧಗಳಿಂದಾಗಿ ಇರಾನ್‌ನ ಪರಿಸ್ಥಿತಿ ಹದಗೆಟ್ಟಿರುವುದರಿಂದ ಸಾಲಕ್ಕೆ ಮೊರೆಯಿಡುವುದರ ವಿನಾ ಬೇರೆ ದಾರಿ ಇಲ್ಲದಂತಾಗಿದೆ.

ಅಧ್ಯಕ್ಷ ಹಸನ್‌ ರೌಹಾನಿ ನೇತೃತ್ವದಲ್ಲಿ ನಡೆದ ಸಂಪುಟ ಸಭೆಯಲ್ಲಿ 5 ಲಕ್ಷ ಕೋಟಿ ಡಾಲರ್‌ ಸಾಲ ಕೇಳುವ ನಿರ್ಧಾರಕ್ಕೆ ಬರಲಾಗಿದೆ.

ಇರಾನ್‌ ಸಾವಿನ ಸಂಖ್ಯೆ 4000 ಎಂದು ಹೇಳುತ್ತಿದ್ದರೂ ಆ ದೇಶದ ಆರೋಗ್ಯ ಕ್ಷೇತ್ರದ ಸ್ಥಿತಿಗತಿಯನ್ನು ಬಲ್ಲವರು ಇದನ್ನು ನಂಬಲು ತಯಾರಿಲ್ಲ. ಕನಿಷ್ಠ 10,000 ಮಂದಿ ಅಸುನೀಗಿರುವ ಸಾಧ್ಯತೆಯಿದೆ. ಆದರೆ ಇರಾನ್‌ ಜಗತ್ತಿನ ಕಣ್ಣಿಗೆ ಸುಳ್ಳು ಅಂಕಿಅಂಶಗಳನ್ನು ತೋರಿಸುತ್ತಿದೆ ಎನ್ನಲಾಗುತ್ತಿದೆ.