ತೆರಿಗೆ ವಂಚಕರ ಸ್ವರ್ಗವಾಯಿತೆ ಲಂಡನ್‌ ?

Team Udayavani, Oct 5, 2021, 8:48 PM IST

ಲಂಡನ್‌: ಯುನೈಟೆಡ್‌ ಕಿಂಗ್‌ಡಮ್‌ ರಾಜಧಾನಿ ಲಂಡನ್‌ ತೆರಿಗೆ ತಪ್ಪಿಲು ಉದ್ದೇಶಿಸುವ ವ್ಯಕ್ತಿಗಳ, ಸಂಸ್ಥೆಗಳ ಪ್ರಧಾನ ಕೇಂದ್ರವಾಗುತ್ತಿದೆಯಾ? ಅಂತಾರಾಷ್ಟ್ರೀಯ ತನಿಖಾ ಪತ್ರಕರ್ತರ ಒಕ್ಕೂಟ ಪಂಡೊರಾ ದಾಖಲೆಗಳ ಮೂಲಕ ಬಿಡುಗಡೆ ಮಾಡಿದ ವ್ಯಕ್ತಿಗಳ ಮತ್ತು ಸಂಸ್ಥೆಗಳ ಹೂಡಿಕೆಯ ವಿವರಗಳನ್ನು ಗಮನಿಸಿದರೆ ಈ ಅನುಮಾನ ಮೂಡುತ್ತದೆ.

ಜಗತ್ತಿನ ವಿವಿಧ ರಾಷ್ಟ್ರಗಳ ಪ್ರಮುಖ ಉದ್ಯಮಿಗಳು, ಸರ್ಕಾರಿ ಮುಖ್ಯಸ್ಥರು, ಸೆಲೆಬ್ರಿಟಿಗಳು ತಮ್ಮ “ಸಂಪಾದನೆ’ ಬಹು ಭಾಗವನ್ನು ಲಂಡನ್‌ನಲ್ಲಿಯೇ ಹೂಡಿಕೆ ಮಾಡುತ್ತಿದ್ದಾರೆ. ಹೀಗಾಗಿ, ಯು.ಕೆ.ಯ ರಾಜಧಾನಿ ತೆರಿಗೆ ತಪ್ಪಿಸಿ ಹೂಡಿಕೆ ಮಾಡುವವರಿಗೆ ಆದ್ಯತೆಯ ತಾಣ ಎಂಬ ಭಾವನೆ ವ್ಯಕ್ತವಾಗಲಾರಂಭಿಸಿದೆ.

ಬ್ರಿಟನ್‌ನ ಕಾನೂನು ಪ್ರಕಾರ ಆಸ್ತಿ ಖರೀದಿ ನ್ಯಾಯಯುತವೇ ಆಗಿದೆ. ಆದರೆ, ಕೆಲವು ಶ್ರೀಮಂತರು ತೆರಿಗೆ ತಪ್ಪಿಸುವ ನಿಟ್ಟಿನಲ್ಲಿ ನಿಗೂಢ ಕ್ರಮಗಳನ್ನು ಅನುಸರಿಸುತ್ತಾರೆ. 2019ರಲ್ಲಿ ಗ್ಲೋಬಲ್‌ ವಿಟ್ನೆಸ್‌ ಎಂಬ ಜಾಗತಿಕ ಪಾರದರ್ಶಕ ಸಂಸ್ಥೆ ನಡೆಸಿದ ಅಧ್ಯಯನದ ಪ್ರಕಾರ ಇಂಗ್ಲೆಂಡ್‌ ಮತ್ತು ವೇಲ್ಸ್‌ನಲ್ಲಿ ಇರುವ 87 ಸಾವಿರ ಆಸ್ತಿ ಅನಾಮಧೇಯರದ್ದೇ ಆಗಿದೆ.

ಇದೇ ವೇಳೆ, ಭಾರತದಲ್ಲಿ ಪಂಡೋರಾ ಪ್ರಕರಣ ಸಂಬಂಧದ ತನಿಖೆಯನ್ನು ಬಹು ಸಂಸ್ಥೆಗಳ ಸಮೂಹ (ಸಿಬಿ ಡಿಟಿ, ಇಡಿ, ಆರ್‌ಬಿಐ, ಎಫ್ಐಯು) ನಡೆಸಲಿದೆ ಎಂದು ಕೇಂದ್ರೀಯ ನೇರ ತೆರಿಗೆಗಳ ಮಂಡಳಿ ತಿಳಿ ಸಿದೆ.