ಮೂರು ದಶಕದಿಂದ ಕಾಶ್ಮೀರದಲ್ಲಿ ಐಸಿಸ್‌ ಮಾದರಿ ಉಗ್ರ ಕೃತ್ಯ

Team Udayavani, Nov 16, 2019, 5:44 AM IST

ಪ್ಯಾರಿಸ್‌/ವಾಷಿಂಗ್ಟನ್‌: “ಮೂವತ್ತು ವರ್ಷಗಳಿಂದ ಜಮ್ಮು ಮತ್ತು ಕಾಶ್ಮೀರದಲ್ಲಿ ಐಸಿಸ್‌ ಉಗ್ರ ಸಂಘಟನೆ ನಡೆಸಿದ ಭಯೋತ್ಪಾದಕ ಕೃತ್ಯಗಳು ನಡೆದಿವೆ. ಅದಕ್ಕೆಲ್ಲ ಪಾಕಿಸ್ಥಾನವೇ ಕಾರಣ’ ಎಂದು ಕಾಶ್ಮೀರ ಪಂಡಿತರ ವಂಶಸ್ಥೆ, ಖ್ಯಾತ ಬರಹಗಾರ್ತಿ ಸುನಂದಾ ವಶಿಷ್ಟ ಆರೋಪಿಸಿದ್ದಾರೆ. ವಾಷಿಂಗ್ಟನ್‌ನಲ್ಲಿ ಟಾಮ್‌ ಲಾಂಟನ್ಸ್‌ ಮಾನವ ಹಕ್ಕುಗಳ ಆಯೋಗ ಅಮೆರಿಕದಲ್ಲಿ ಸಂಸತ್‌ನಲ್ಲಿ ಆಯೋಜಿಸಿದ್ದ ವಿಚಾರಣೆ ವೇಳೆ ಈ ವಿಚಾರ ಪ್ರಸ್ತಾಪ ಮಾಡಿದ್ದಾರೆ.

“ಅಮೆರಿಕದಲ್ಲಿ ಇಂಥ ವಿಚಾರಣೆ ನಡೆಯುತ್ತಿರುವುದಕ್ಕೆ ನನಗೆ ಸಂತೋಷವಿದೆ. ಕಾಶ್ಮೀರಿ ಪಂಡಿತರ ಕುಟುಂಬ ವರ್ಗಕ್ಕೆ ಸೇರಿದವಳಾಗಿರುವ ನಾನು ಮತ್ತು ಇತರರು ಭಯೋತ್ಪಾದಕ ಕೃತ್ಯಗಳಿಂದ ನೊಂದಿದ್ದೇವೆ. ಅದರಿಂದಾಗಿ ನಮ್ಮ ಜೀವನ, ಕುಟುಂಬ ಎಲ್ಲವನ್ನೂ ಕಳೆದುಕೊಂಡಿದ್ದೇವೆ’ ಎಂದು ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಕಣಿವೆ ರಾಜ್ಯದಿಂದ ಸುಮಾರು 40 ಸಾವಿರ ಮಂದಿ ಹಿಂದೂಗಳು ಪರಾರಿಯಾಗಿದ್ದಾರೆ ಎಂದೂ ಅವರು ಹೇಳಿದ್ದಾರೆ.

ಉಗ್ರವಾದವೇ ಡಿಎನ್‌ಎ: ಪ್ಯಾರಿಸ್‌ನಲ್ಲಿ ಆಯೋಜಿಸಲಾಗಿದ್ದ ಯುನೆಸ್ಕೋ ಕಾರ್ಯಕ್ರಮದಲ್ಲಿ ಭಾರತದ ನಿಯೋಗದ ನೇತೃತ್ವ ವಹಿಸಿದ್ದ ಅನನ್ಯಾ ಅಗರ್ವಾಲ್‌, ಪಾಕಿಸ್ಥಾನದ ಡಿಎನ್‌ಎಯಲ್ಲಿ ಭಯೋತ್ಪಾದಕತೆಯೇ ತುಂಬಿದೆ. ಅದು ಜಮ್ಮು ಮತ್ತು ಕಾಶ್ಮೀರದ ವಿರುದ್ಧ ಸುಳ್ಳು ಸುಳ್ಳು ಮಾಹಿತಿಯನ್ನು ಅಂತಾರಾಷ್ಟ್ರೀಯ ವೇದಿಕೆಗಳಲ್ಲಿ ಪ್ರಸ್ತುತಪಡಿಸುತ್ತಿದೆ ಎಂದು ದೂರಿದ್ದಾರೆ. ತನ್ನ ಕೃತ್ಯಗಳಿಂದಲೇ ಆರ್ಥಿಕತೆ ಕುಸಿಯುತ್ತಿದ್ದು, ಪಾಕಿಸ್ಥಾನವು ಒಂದು ವಿಫ‌ಲ ರಾಷ್ಟ್ರವಾಗಿರುವುದು ಸಾಬೀತಾಗಿದೆ ಎಂದು ಟೀಕಿಸಿದ್ದಾರೆ.