ಇಸ್ರೇಲ್‌ ಕಾರ್ಯಾಚರಣೆ: ಕ್ಷಿಪಣಿ ಹಾರಿಸಿ ಉಗ್ರ ಕಮಾಂಡರ್‌ ಹತ್ಯೆ

Team Udayavani, Aug 7, 2022, 10:10 PM IST

ಗಾಜಾ ಸಿಟಿ: ಗಾಜಾ ಪಟ್ಟಿಯಲ್ಲಿ ಇಸ್ರೇಲ್‌ ಸೇನೆ ನಡೆಸಿದ ಕಾರ್ಯಾಚರಣೆಯಲ್ಲಿ ಇರಾನ್‌ ಬೆಂಬಲಿತ ಪ್ಯಾಲೆಸ್ತೀನಿಯನ್‌ ಇಸ್ಲಾಮಿಕ್‌ ಜೆಹಾದ್‌ ಸಂಘಟನೆಯ ಹಿರಿಯ ಕಮಾಂಡರ್‌ ಖಾಲೀದ್‌ ಮನ್ಸೋರ್‌ನನ್ನು ಕೊಲ್ಲಲಾಗಿದೆ. ಇದರಿಂದಾಗಿ ಗಾಜಾ ಪಟ್ಟಿಯಲ್ಲಿ ಮತ್ತೊಮ್ಮೆ ಹಿಂಸಾತ್ಮಕ ಸಂಘರ್ಷಗಳು ಉಂಟಾಗಲಿದೆ ಎಂದು ಭೀತಿಪಡಲಾಗಿದೆ.

ಶುಕ್ರವಾರ ಪ್ಯಾಲೆಸ್ತೀನ್‌ನ ರಫಾದ ಅಪಾರ್ಟ್‌ಮೆಂಟ್‌ನಲ್ಲಿ ಖಾಲಿದ್‌ ಇದ್ದ ಬಗ್ಗೆ ಇಸ್ರೇಲ್‌ ಸೇನೆಗೆ ಖಚಿತ ಸುಳಿವು ಸಿಕ್ಕಿದ್ದ ಹಿನ್ನೆಲೆಯಲ್ಲಿ ಕ್ಷಿಪಣಿ ಹಾರಿಸಿ ಕೊಲ್ಲಲಾಯಿತು. ಅದಕ್ಕೆ ಪ್ರತೀಕಾರವಾಗಿ ಉಗ್ರ ಸಂಘಟನೆ ಇಸ್ರೇಲ್‌ನತ್ತ ಹಲವಾರು ಕ್ಷಿಪಣಿಗಳನ್ನು ಹಾರಿ ಬಿಟ್ಟಿದೆ. ಪ್ಯಾಲೆಸ್ತೀನ್‌ ಸರ್ಕಾರ ನೀಡಿದ ಮಾಹಿತಿ ಪ್ರಕಾರ ಆರು ಮಂದಿ, ನಾಲ್ವರು ಮಹಿಳೆಯರು ಸೇರಿದಂತೆ 31 ಮಂದಿ ಅಸುನೀಗಿದ್ದರು. 250ಕ್ಕೂ ಅಧಿಕ ಮಂದಿ ಗಾಯಗೊಂಡಿದ್ದಾರೆ.

ಇಸ್ರೇಲ್‌ ಯುದ್ಧಾಪರಾಧ ನಡೆಸಿದೆ ಎಂದು ಯು.ಕೆ.ಯಲ್ಲಿ ಪ್ಯಾಲೆಸ್ತೀನ್‌ ರಾಯಭಾರಿ ಹುಸಮ್‌ ಝಮ್‌ಲೊಟ್‌ ಆರೋಪಿಸಿದ್ದಾರೆ. ಅಮೆರಿಕ, ಯು.ಕೆ. ಸರ್ಕಾರಗಳು ಇಸ್ರೇಲ್‌ ನೀತಿಯ ಪರವಾಗಿಯೇ ವಾದಿಸುತ್ತಿವೆ ಎಂದು ದೂರಿದ್ದಾರೆ.