ಇಸ್ರೇಲ್‌ ಪ್ರಧಾನಿಗೆ ನಿಜದ ಸವಾಲು:ಸಂಪ್ರದಾಯವಾದಿಗಳು ಏರಿಗೆಳೆದರೆ ಸರಕಾರ ನೀರಿಗೆ

Team Udayavani, Apr 1, 2020, 6:10 PM IST

ಇಸ್ರೇಲ್‌: ಸರಕಾರ ಮತ್ತು ಪ್ರಜೆಗಳ ನಡುವೆ ಹೊಂದಾಣಿಕೆ ಇಲ್ಲದೇ ಇದ್ದರೆ ಸಂಕಷ್ಟದ ಸಮಯದಲ್ಲಿ ಅಪಾಯ ಕಾದದ್ದೇ.

ಸರಕಾರ ನಿಯಮಗಳನ್ನು ರೂಪಿಸುತ್ತದೆ, ಆದರೆ ಪಾಲಿಸುವ ಪ್ರಜೆಗಳಿಲ್ಲ ಎಂದ ಮೇಲೆ ಅದು ನೀರ ಮೇಲಿನ ಹೋಮ. ಈಗ ಅಂತಹದ್ದೇ ಸನ್ನಿವೇಶ ಇಸ್ರೇಲ್‌ ನದ್ದು.

ಕೋವಿಡ್ 19 ವೈರಸ್‌ ಇಸ್ರೇಲ್‌ನಲ್ಲೂ ತನ್ನ ಬಾಹುವನ್ನು ವಿಸ್ತರಿಸುತ್ತಿದೆ. ಆದರೆ ಸರಕಾರದ ಸೂಚನೆಗಳನ್ನು ಅಲ್ಲಿನ ಕಟ್ಟಾ ಸಂಪ್ರದಾಯವಾದಿಗಳು ಪಾಲಿಸುತ್ತಿಲ್ಲ. ಇದು ಕೋವಿಡ್ 19 ರೋಗ ವ್ಯಾಪಕವಾಗಿ ಹರಡುವ ಸಾಧ್ಯತೆಯನ್ನು ಹೆಚ್ಚಿಸುತ್ತಿದೆ. ಹಾಗೆಂದು ಇಸ್ರೇಲ್‌ ಸರಕಾರ ಕೈ ಕಟ್ಟಿ ಕುಳಿತಿಲ್ಲ. ಕೋವಿಡ್ 19 ನಿಯಂತ್ರಿಸಲು ಪಣ ತೊಟ್ಟು ನಿಂತಿದೆ. ಅದರೆ ಸರಕಾರದ ಪ್ರಯತ್ನ ಹಾಗೂ ಪರಿಶ್ರಮವನ್ನು ಸಂಪ್ರದಾಯ ವಾದಿಗಳು ಅರ್ಥ ಮಾಡಿಕೊಳ್ಳುತ್ತಿಲ್ಲ. ಹಾಗಾಗಿ ನಿಯಮ ಪಾಲಿಸದಿರುವುದರಿಂದ ಪ್ರಯತ್ನವೆಲ್ಲವೂ ವಿಫ‌ಲ ವಾಗುತ್ತಿದೆ ಎಂದು ಅಭಿಪ್ರಾಯ ಪಟ್ಟಿದೆ ನ್ಯೂಯಾರ್ಕ್‌ ಟೈಮ್ಸ್‌ ವರದಿ.

ನಾಲ್ಕು ಪಟ್ಟು ವೇಗ
ಈ ಸಂಪ್ರದಾಯವಾದಿ ಸಮುದಾಯಗಳಲ್ಲಿ ಈ ವೈರಸ್‌ ಇಸ್ರೇಲ್‌ನ ಬೇರೆಡೆಗಳಿಗಿಂತ ನಾಲ್ಕರಿಂದ ಎಂಟು ಪಟ್ಟು ವೇಗವಾಗಿ ಹರಡುತ್ತಿದೆಯಂತೆ. ಆತಂಕದ ಸಂಗತಿಯೆಂದರೆ ಇಸ್ರೇಲ್‌ನ ರಾಜಧಾನಿ ಟೆಲ್‌ ಅವೀವ್‌ ನಗರದಲ್ಲಿನ ಒಟ್ಟು ಜನಸಂಖ್ಯೆಯಲ್ಲಿ ಶೇ. 95ರಷ್ಟು ಮಂದಿ ಈ ಕಟ್ಟಾ ಸಂಪ್ರದಾಯವಾದಿಗಳು. ಅಲ್ಲಿಗೆ ಅಪಾಯದ ತೀವ್ರತೆಯನ್ನು ಅರ್ಥ ಮಾಡಿಕೊಳ್ಳಿ. ಕಳೆದ ಮೂರು ದಿನಗಳಲ್ಲಿ ದೃಢಪಟ್ಟ ಪ್ರಕರಣಗಳ ಸಂಖ್ಯೆ ದ್ವಿಗುಣಗೊಂಡಿದೆ. ಶುಕ್ರವಾರ 267 ಪ್ರಕರಣಗಳಿದ್ದರೆ, ಸೋಮವಾರ
508ಕ್ಕೆ ಏರಿದೆ.

ಶೇ. 12ರಷ್ಟು ಕಟ್ಟಾ ಸಂಪ್ರದಾಯವಾದಿಗಳು
ಇಸ್ರೇಲ್‌ನ ಜನಸಂಖ್ಯೆಯಲ್ಲಿ ಈ ಸಂಪ್ರದಾಯವಾದಿಗಳ ಪಾಲು
ಶೇ. 12. ಆದರೆ ಅಲ್ಲಿನ 4 ಪ್ರಮುಖ ಆಸ್ಪತ್ರೆಗಳಲ್ಲಿರುವ ಕೋವಿಡ್ 19 ಸೋಂಕಿತರಲ್ಲಿ ಶೇ. 40ರಿಂದ ಶೇ. 60ರಷ್ಟು ಮಂದಿ ಈ ಸಂಪ್ರದಾ ಯವಾದಿಗಳೇ.

ಇಸ್ರೇಲ್‌ನಲ್ಲಿ ಈಗಾಗಲೇ ಸಾಮಾಜಿಕ ಅಂತರವನ್ನು ಕಾಯ್ದುಕೊಳ್ಳಲಾಗುತ್ತಿದೆ. ಅಗತ್ಯ ಸೇವೆಗಳ ಹೊರತಾಗಿ ಜನರು ಮನೆಯಲ್ಲೇ ಇರಬೇಕಿದೆ. ಪ್ರಾರ್ಥನೆ ಸೇರಿದಂತೆ ಗುಂಪು ಸೇರುವುದು, ಸಭೆ ಮಾಡುವುದನ್ನು ನಿಷೇಧಿಸಲಾಗಿದೆ.
ಆದರೆ ಈ ಸಂಪ್ರದಾಯವಾದಿಗಳು, ಪ್ರಾರ್ಥನೆ ಮಾಡುವುದು, ಅಂತ್ಯಕ್ರಿಯೆಗಳು, ವಿವಾಹಗಳಂತಹ ಸಂಪ್ರದಾಯವನ್ನು ಯಾವುದೇ ನಿರ್ಬಂಧವನ್ನು ಲೆಕ್ಕಿಸದೇ ಅನುಸರಿಸುತ್ತಿದ್ದಾರೆ. ಇತ್ತೀಚೆಗಷ್ಟೇ ನಡೆದ ಇಂಥದೊಂದು ಅಂತ್ಯಕ್ರಿಯೆಯಲ್ಲಿ ನೂರಾರು ಜನ ಭಾಗವಹಿಸಿದ್ದು ಸ್ಥಳೀಯರ ಟೀಕೆಗೆ ಗುರಿಯಾಗಿತ್ತು.

ನಗರದ ಏಕೈಕ ಆಸ್ಪತ್ರೆಯ ಮಹಾನಿರ್ದೇಶಕ ಡಾ| ಮೋತಿ ರಾವಿಡ್‌ ಅವರು ನಿವಾಸಿಗಳನ್ನು ಸಮುದಾಯದಿಂದ ಕನಿಷ್ಠ ಒಂದು ವಾರದವರೆಗೆ ಹೊರಹೋಗದಂತೆ ಮನವಿ ಮಾಡಿದ್ದಾರೆ.

ಇಂತಹ ಪ್ರಸಂಗಳು ಎದುರಾದರೆ ತಡೆಯುವಂತೆ ಅಧಿಕಾರಿಗಳಿಗೂ ಮನವಿ ಮಾಡಿದ್ದಾರೆ.

ಈ ಕಟ್ಟಾ ಸಂಪ್ರದಾಯವಾದಿಗಳು ನೆಲೆಸಿರುವ ಪ್ರದೇಶದಲ್ಲಿ ಮಕ್ಕಳೇ ಹೆಚ್ಚು. ಬಳಿಕ ವೃದ್ಧರು. ಯುವಜನರ ಸಂಖ್ಯೆ ಕಡಿಮೆ. ಸೋಂಕು ಒಂದುವೇಳೆ ಕಾಳಿYಚ್ಚಿನಂತೆ ಹರಡಿಕೊಂಡರೆ ವೃದ್ಧರು ಸೇರಿದಂತೆ ಹಲವರು ಸಾಯಬಹುದು. ಈ ಆತಂಕ ಎಲ್ಲರನ್ನೂ ಕಾಡುತ್ತಿದೆ.

ಒಟ್ಟಾರೆಯಾಗಿ ಇಸ್ರೇಲ್‌ ನಲ್ಲಿ ಕೋವಿಡ್ 19 ಮಣಿಸಲು ಕಟ್ಟಾ ಸಂಪ್ರದಾಯವಾದಿಗಳನ್ನು ಒಪ್ಪಿಸಲೇಬೇಕಾದ ಸಂದರ್ಭ ಸೃಷ್ಟಿಯಾಗಿದೆ.

ಈ ಒಪ್ಪಿಸುವುದರೊಳಗೆ ಅಪಾಯ ಒಳಗೆ ಬಂದು ಕುಳಿತುಕೊಳ್ಳುತ್ತದೋ ಎಂಬ ಆತಂಕ ಪ್ರಧಾನಿಯದ್ದಾಗಿದೆ ಎಂದು ವರದಿಯಲ್ಲಿ ಅಭಿಪ್ರಾಯಿಸಲಾಗಿದೆ.