ಕಾಬೂಲ್‌ನಲ್ಲಿ ಉಗ್ರರ ಅಟ್ಟಹಾಸ: ಬಾಂಬ್‌ ದಾಳಿಗೆ 40 ಬಲಿ 

Team Udayavani, Jan 27, 2018, 5:09 PM IST

ಕಾಬೂಲ್‌: ಅಫ್ಘಾನ್‌ ರಾಜಧಾನಿಯಲ್ಲಿ ಉಗ್ರರು ಶನಿವಾರ ಪ್ರಬಲ ಬಾಂಬ್‌ ದಾಳಿ ನಡೆಸಿ ಅಟ್ಟಹಾಸ ಮೆರೆದಿದ್ದಾರೆ. ಭೀಕರ ದಾಳಿಯಲ್ಲಿ ಕನಿಷ್ಠ 40 ಮಂದಿ ಸಾವನ್ನಪ್ಪಿದ್ದು, 140 ಕ್ಕೂ ಹೆಚ್ಚು ಮಂದಿ ಗಂಭೀರವಾಗಿ ಗಾಯಗೊಂಡಿದ್ದಾರೆ. 

ಆಂತರಿಕ ಸಚಿವಾಲಯದ ಕಚೇರಿಯ ಸಮೀಪದಲ್ಲೇ ಬಾಂಬ್‌ ಸ್ಫೋಟಗೊಂಡಿದೆ. ಮಧ್ಯಾಹ್ನ 12.45 ರ ವೇಳೆಗೆ ಬಾಂಬ್‌ ಸ್ಫೋಟಗೊಂಡು ಸುತ್ತಮುತ್ತಲೂ ದಟ್ಟ ಹೊಗೆ ಆವರಿಸಿದೆ ಎಂದು ವರದಿಯಾಗಿದೆ. 

ಯುರೋಪಿಯನ್‌ ಯೂನಿಯನ್‌ ಮತ್ತು ಶಾಂತಿ ಸಮಿತಿಯ ಕಚೇರಿಗಳನ್ನು ಗುರಿಯಾಗಿರಿಸಿಕೊಂಡು ದಾಳಿ ನಡೆಸಲಾಗಿದೆ. 

ಗಾಯಾಳುಗಳ ಪೈಕಿ ಹಲವರ ಸ್ಥಿತಿ ಚಿಂತಾಜನಕವಾಗಿದ್ದು ಆಸ್ಪತ್ರೆಗೆ ದಾಖಲಿಸಲಾಗಿದೆ. ಸಾವಿನ ಸಂಖ್ಯೆ ಹೆಚ್ಚುವ ಎಲ್ಲಾ ಲಕ್ಷಣಗಳಿವೆ. 

ಅಂಬುಲೆನ್ಸ್‌ನಲ್ಲಿ ಬಂದ ಉಗ್ರ ದಾಳಿ ನಡೆಸಿದ್ದಾನೆ ಎಂದು ಹೇಳಲಾಗಿದೆ. 

ತಾಲಿಬಾನ್‌ ಉಗ್ರ ಸಂಘಟನೆಯ ವಕ್ತಾರ ಝಬಿವುಲ್ಲಾ  ದಾಳಿಯ ಹೊಣೆ ಹೊತ್ತಿದ್ದಾನೆ. 

ವಾರದ ಹಿಂದೆ ಕಾಬೂಲ್‌ ನ ಐಷಾರಾಮಿ ಹೊಟೇಲ್‌ ಮೇಲೆ ನಡೆದ ಉಗ್ರ ದಾಳಿಯಲ್ಲಿ 22 ಮಂದಿ ದಾರುಣವಾಗಿ ಸಾವನ್ನಪ್ಪಿದ್ದರು.