Maui ಕಾಡ್ಗಿಚ್ಚು: ಮೃತರ ಸಂಖ್ಯೆ 93ಕ್ಕೇರಿಕೆ

Team Udayavani, Aug 14, 2023, 5:11 AM IST

ಲಹೈನಾ: ಅಮೆರಿಕದ ಐತಿಹಾಸಿಕ ಮಾವುಯಿ ಪಟ್ಟಣದಲ್ಲಿ ಕಳೆದ ಬುಧವಾರ ಹಬ್ಬಲಾರಂಭಿಸಿದ ಕಾಡ್ಗಿಚ್ಚು ಈವರೆಗೆ 93 ಮಂದಿಯನ್ನು ಬಲಿಪಡೆದುಕೊಂಡಿದೆ. ಸುಮಾರು 100 ವರ್ಷಗಳ ಬಳಿಕ ಅಮೆರಿಕ ಕಂಡ ಅತ್ಯಂತ ಭೀಕರ ಕಾಡ್ಗಿಚ್ಚು ಇದಾಗಿದೆ.

ಕಾಡ್ಗಿಚ್ಚು ಹಬ್ಬಿರುವ ಪ್ರದೇಶದ ಪೈಕಿ ಶೇ.3ರಷ್ಟು ಪ್ರದೇಶದಲ್ಲಿ ಮಾತ್ರವೇ ಶೋಧ ಕಾರ್ಯ ಪೂರ್ಣಗೊಂಡಿದ್ದು, ಹಲವು ಮೃತದೇಹಗಳು ಪತ್ತೆಯಾಗಿವೆ. ಹೀಗಾಗಿ, ಕಾರ್ಯಾಚರಣೆ ಮುಂದುವರಿದಂತೆ ಸಾವಿನ ಸಂಖ್ಯೆ ಮತ್ತಷ್ಟು ಹೆಚ್ಚಾಗುವ ಭೀತಿಯಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಅಲ್ಲದೇ, ಎಲ್ಲ ಮೃತದೇಹಗಳೂ ಸುಟ್ಟು ಕರಕಲಾಗಿರುವ ಕಾರಣ, ಡಿಎನ್‌ಎ ಪರೀಕ್ಷೆ ನಡೆಸಿಯೇ ಗುರುತು ಪತ್ತೆಹಚ್ಚಬೇಕಿದೆ ಎಂದಿದ್ದಾರೆ.

ಶೋಧ ಕಾರ್ಯ ನಡೆದಿರುವ ಮನೆಗಳ ಮೇಲೆ ಸಿಬ್ಬಂದಿ “ಎಕ್ಸ್‌’ ಎಂದೂ, ಮೃತದೇಹ ಪತ್ತೆಯಾದ ಮನೆಗಳ ಮೇಲೆ “ಎಚ್‌ಆರ್‌’ ಎಂಬ ಗುರುತನ್ನೂ ಹಾಕುತ್ತಿದ್ದಾರೆ. ಕಾಡ್ಗಿಚ್ಚಿನಿಂದಾಗಿ ಕನಿಷ್ಠ 2,200 ಕಟ್ಟಡಗಳು ನಾಶವಾಗಿವೆ. ಒಟ್ಟಾರೆ 6 ಶತಕೋಟಿ ಡಾಲರ್‌ನಷ್ಟು ನಷ್ಟ ಉಂಟಾಗಿದೆ. 4,500ಕ್ಕೂ ಅಧಿಕ ಮಂದಿ ನಿರ್ವಸಿತರಾಗಿದ್ದಾರೆ ಎಂದೂ ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.