ಮೋದಿಗೆ ನೀರು ಶುದ್ಧೀಕರಣ ಜೀಪ್‌ ಗಿಫ್ಟ್

Team Udayavani, Jan 5, 2018, 7:00 AM IST

ಜೆರುಸಲೇಂ: ಇಸ್ರೇಲ್‌ ಪ್ರಧಾನಿ ಬೆಂಜಮಿನ್‌ ನೆತನ್ಯಾಹು 14ರಂದು ಭಾರತಕ್ಕೆ ಆಗಮಿಸಲಿದ್ದು, ನೀರು ಶುದ್ಧೀಕರಣ ವಾಹನವನ್ನು ಪ್ರಧಾನಿ ಮೋದಿಗೆ ಉಡುಗೊರೆ ನೀಡಲು ನಿರ್ಧರಿಸಿದ್ದಾರೆ ಎನ್ನಲಾಗಿದೆ. ಕಳೆದ ವರ್ಷ ಜುಲೈನಲ್ಲಿ ಪ್ರಧಾನಿ ಮೋದಿ ಇಸ್ರೇಲ್‌ಗೆ ಪ್ರಯಾಣಿಸಿದ್ದಾಗ ನೆತನ್ಯಾಹು ಜತೆಗೆ ಇದೇ ಜೀಪ್‌ನಲ್ಲಿ ಮೆಡಿಟರೇನಿಯನ್‌ ಸಮುದ್ರದಲ್ಲಿ ಪ್ರಯಾಣಿಸಿದ್ದರು. ನೇತನ್ಯಾಹು 4 ದಿನಗಳ ಭಾರತ ಭೇಟಿಗೆ ಆಗಮಿಸಲಿದ್ದು, ಈಗಾಗಲೇ ಈ ಜೀಪ್‌ ಭಾರತಕ್ಕೆ ಹೊರಟಿದೆ. ಅವರು ಆಗಮಿಸುವ ವೇಳೆಗೆ ಇದು ಭಾರತಕ್ಕೆ ತಲುಪಿರಲಿದೆ. ಈ ಜೀಪ್‌ನ ಮಾರುಕಟ್ಟೆ ಬೆಲೆ ಸುಮಾರು 70 ಲಕ್ಷ ರೂ. ಆಗಿರಲಿದೆ. ಗಾಲ್‌ ಮೊಬೈಲ್‌ ಜೀಪ್‌ ಒಂದು ಸ್ವತಂತ್ರ, ಸಮಗ್ರ ನೀರು ಶುದ್ಧೀಕರಣ ವಾಹನವಾಗಿದೆ. ಇದು ಉತ್ತಮ ಗುಣಮಟ್ಟದ ನೀರನ್ನು ಶುದ್ಧೀಕರಿಸಬಲ್ಲದು. ನೈಸರ್ಗಿಕ ವಿಪತ್ತಿನ ವೇಳೆ ಇದು ಅತ್ಯಂತ ಉಪಯುಕ್ತ. ಪ್ರವಾಹ, ಭೂಕಂಪವಾದಾಗ ಕುಡಿಯುವ ನೀರಿನ ಕೊರತೆ ಎದುರಾದಾಗ ಈ ಜೀಪ್‌ನಿಂದ ನೀರು ಒದಗಿಸಬಹುದಾಗಿದೆ. ಅಷ್ಟೇ ಅಲ್ಲ, ಇದು ಸೇನೆಯ ಬಳಕೆಗೂ ಅನುಕೂಲವಾಗಿದೆ. ಒಂದು ದಿನಕ್ಕೆ ಇದು 20 ಸಾವಿರ ಲೀ. ಸಮುದ್ರ ನೀರನ್ನು ಶುದ್ಧೀಕರಿಸಬಲ್ಲದು.