ಶಾಶ್ವತವಾಗಿ ನಿಂತ ಮೊನಾರ್ಕ್‌ ವಿಮಾನಗಳ ಹಾರಾಟ

Team Udayavani, Oct 3, 2017, 6:30 AM IST

ಲಂಡನ್‌: ಬ್ರಿಟನ್‌ನ ಪ್ರಮುಖ ವಿಮಾನಯಾನ ಸಂಸ್ಥೆ, ಮೊನಾರ್ಕ್‌ ಏರ್‌ಲೈನ್ಸ್‌ ಸೋಮವಾರದಿಂದ ತನ್ನ ಕಾರ್ಯಾ ಚರಣೆ ಸ್ಥಗಿತಗೊಳಿಸಿದೆ. ಈ ಮೂಲಕ ಏರ್‌ಲೈನ್‌ನ ಭವಿಷ್ಯದ ಎಲ್ಲ ವಿಮಾನ ಯಾನಗಳೂ ರದ್ದಾಗಿದ್ದು, 3 ಲಕ್ಷಕ್ಕೂ ಅಧಿಕ ಪ್ರಯಾಣಿಕರು ಆತಂಕಕ್ಕೀಡಾಗಿದ್ದಾರೆ.

ಇದರೊಂದಿಗೆ ರಜೆ ಕಳೆಯಲೆಂದು ವಿವಿಧ ದೇಶಗಳಿಗೆ ತೆರಳಿರುವ 1.10 ಲಕ್ಷ ಪ್ರಯಾಣಿಕರನ್ನು ದೇಶಕ್ಕೆ ಮರಳಿ ಕರೆತರಲು 30 ವಿಮಾನಗಳನ್ನು ನಿಯೋಜಿಸುವಂತೆ ಅಲ್ಲಿನ ನಾಗರಿಕ ವಿಮಾನ ಯಾನ ಪ್ರಾಧಿಕಾರಕ್ಕೆ (ಸಿಎಎ) ಬ್ರಿಟನ್‌ ಸರಕಾರ ಸೂಚಿಸಿದೆ. ಈ ನಿರ್ಧಾರಕ್ಕೆ ಪ್ರಯಾಣಿಕರು ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಕಾರಣ, ಈಗಾಗಲೇ 3 ಲಕ್ಷಕ್ಕೂ ಅಧಿಕ ಪ್ರಯಾಣಿಕರು ಮೊನಾರ್ಕ್‌ ಏರ್‌ಲೈನ್ಸ್‌ ಮೂಲಕ ವಿವಿಧ ದೇಶ, ಪ್ರದೇಶಗಳಿಗೆ ತೆರಳಲು ಮುಂಗಡವಾಗಿ ಟಿಕೆಟ್‌ ಕಾಯ್ದಿರಿಸಿದ್ದರು. ಸಂಸ್ಥೆಯನ್ನು ಮುಚ್ಚುವ ಈ ನಿರ್ಧಾರದಿಂದಾಗಿ ಪ್ರಸ್ತುತ ಈ ಎಲ್ಲ ಪ್ರಯಾಣಿಕರ ಬುಕಿಂಗ್‌ ರದ್ದಾಗಲಿದೆ. 

2,100 ನೌಕರರಿಗೆ ಉದ್ಯೋಗ ನೀಡಿರುವ ಮೊನಾರ್ಕ್‌ ಏರ್‌ಲೈನ್ಸ್‌, ಕೆಲ ವರ್ಷಗಳಿಂದ ಉಂಟಾಗಿರುವ ತೀವ್ರ ಸ್ವರೂಪದ ಸ್ಪರ್ಧೆಯಿಂದಾಗಿ ಕಳೆದ ಆರ್ಥಿಕ ವರ್ಷದಲ್ಲಿ 25 ಸಾವಿರ ಕೋಟಿ ರೂ. ನಷ್ಟ ಅನುಭವಿಸಿತ್ತು ಎನ್ನಲಾಗಿದೆ.