ಅಫ್ಘಾನಿಸ್ಥಾನ: ಚೀನಿಯರ ಅತಿಥಿ ಗೃಹದ ಬಳಿ ಉಗ್ರರ ಅಟ್ಟಹಾಸ; ಕನಿಷ್ಠ ನಾಲ್ವರು ಸಾವು

Team Udayavani, Dec 12, 2022, 5:39 PM IST

ಕಾಬೂಲ್ : ಅಫ್ಘಾನ್ ರಾಜಧಾನಿಯಲ್ಲಿ ಚೀನದ ವ್ಯಾಪಾರ ಸಂದರ್ಶಕರ ಜನಪ್ರಿಯವಾಗಿರುವ ಅತಿಥಿ ಗೃಹವನ್ನು ಗುರಿಯಾಗಿಸಿ ಉಗ್ರರು ಸೋಮವಾರ ಬಾಂಬ್ ಸ್ಫೋಟ ಮತ್ತು ಗುಂಡಿನ ದಾಳಿಯನ್ನು ನಡೆಸಿದ್ದಾರೆ ಎಂದು ವರದಿಯಾಗಿದೆ. ಮಾಧ್ಯಮಗಳ ವರದಿ ಪ್ರಕಾರ ದಾಳಿಯಲ್ಲಿ ಕನಿಷ್ಠ 4 ಜನರು ಸಾವನ್ನಪ್ಪಿದ್ದು, 20 ಮಂದಿ ಗಾಯಗೊಂಡಿದ್ದಾರೆ.

ಶಹರ್-ಎ-ನಾವ್ ಪ್ರದೇಶದ ಅತಿಥಿ ಗೃಹದ ಬಳಿ ಕಾಬೂಲ್ ನಿವಾಸಿಗಳಿಗೆ ದೊಡ್ಡ ಸ್ಫೋಟ ಮತ್ತು ಗುಂಡಿನ ದಾಳಿ ನಡೆದಿರುವುದು ಕಂಡು ಬಂದಿದೆ ಎಂದು ಸುದ್ದಿ ಮಾಧ್ಯಮಗಳು ವರದಿ ಮಾಡಿವೆ. ಭದ್ರತಾ ಅಧಿಕಾರಿಗಳು ಇನ್ನಷ್ಟೇ ಪ್ರತಿಕ್ರಿಯಿಸಬೇಕಿದೆ.

ಅಫ್ಘಾನ್-ಪಾಕಿಸ್ಥಾನ ಗಡಿಯಲ್ಲಿ ಅಫ್ಘಾನ್ ತಾಲಿಬಾನ್ ಮತ್ತು ಪಾಕಿಸ್ಥಾನಿ ಮಿಲಿಟರಿ ನಡುವೆ ನಡೆಯುತ್ತಿರುವ ಘರ್ಷಣೆಗಳ ವರದಿಗಳ ನಡುವೆ ಈ ಘಟನೆ ಸಂಭವಿಸಿದೆ.