Nepal; ದಟ್ಟಾರಣ್ಯದಲ್ಲಿ ನಾಪತ್ತೆಯಾಗಿದ್ದ ಮೂವರು ಭಾರತೀಯರು ಕೊನೆಗೂ ಪತ್ತೆ

Team Udayavani, Aug 19, 2024, 8:21 AM IST

ಕಾಠ್ಮಂಡು: ನೇಪಾಳದ ನಾಗರಕೋಟ್‌ ಅರಣ್ಯದಲ್ಲಿ ನಾಪತ್ತೆಯಾಗಿದ್ದ ಮೂರು ಭಾರತೀಯ ಪ್ರವಾಸಿಗರು ಮತ್ತು ಓರ್ವ ನೇಪಾಳಿ ಗೈಡ್‌ ನನ್ನು ಹತ್ತು ಗಂಟೆಗಳ ಬಳಿಕ ಪತ್ತೆ ಮಾಡಲಾಗಿದೆ.

ಟೂರಿಸ್ಟ್‌ ಗಳನ್ನು ನಿತಿನ್‌ ತಿವಾರಿ, ರಶ್ಮಿ ತಿವಾರಿ ಮತ್ತು ತನಿಶ್‌ ತಿವಾರಿ ಮತ್ತು ಅವರ ನೇಪಾಳಿ ಗೈಡ್‌ ಹರಿಪ್ರಸಾದ್‌ ಖರೆಲ್‌ ಅವರು‌ ಭಕ್ತಪುರ ಜಿಲ್ಲೆಯ ನಾಗರಕೊಟ್‌ ಅರಣ್ಯದ ಮುಹಾನ್‌ ಪೊಖಾರಿ ರಾನಿ ಝುಲಾ ಪ್ರದೇಶದಲ್ಲಿ ನಾಪತ್ತೆಯಾಗಿದ್ದರು. ಈ ಪ್ರದೇಶವು ಕಾಠ್ಮಂಡುವಿನಿಂದ 30 ಕಿ.ಮೀ ಪೂರ್ವದಲ್ಲಿದೆ.

ಭಾರತೀಯ ಪ್ರವಾಸಿಗರು 30ರಿಂದ 40 ವರ್ಷದ ಪ್ರಾಯದವರು ಎಂದು ಪೊಲೀಸರು ತಿಳಿಸಿದ್ದಾರೆ.

ಶನಿವಾರ ಮೂರು ಗಂಟೆಯ ಸುಮಾರಿಗೆ ಪ್ರವಾಸಿಗರು ದಾರಿ ತಪ್ಪಿದ್ದರು. ಅಂದು ಮಧ್ಯರಾತ್ರಿ ರಕ್ಷಣಾ ತಂಡಗಳು ಪ್ರದೇಶಕ್ಕೆ ತಲುಪಿದವು ಎಂದು ಅಧಿಕಾರಿಯೊಬ್ಬರು ಮಾಹಿತಿ ನೀಡಿದ್ದಾರೆ.

ರಾಣಿ ಜುಲಾ ಪ್ರದೇಶಕ್ಕೆ ಹೋಗುವ ದಾರಿಯನ್ನು ಪತ್ತೆ ಮಾಡಲಾಗದೆ ಅವರು ನಾಪತ್ತೆಯಾಗಿದ್ದಾರೆ. ಹೀಗಾಗಿ ದಾರಿ ತಪ್ಪಿ ಸಮೀಪದ ಅರಣ್ಯ ಪ್ರದೇಶಕ್ಕೆ ತೆರಳಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಅವರು ಹಾಲ್‌ಹಲೆ ಖೌಪಾ ಪ್ರದೇಶದಲ್ಲಿ ಪತ್ತೆಯಾಗಿದ್ದು, ಜಿಗಣೆ ಕಡಿತದಿಂದ ಬಳಲುತ್ತಿದ್ದರು ಎಂದು ಚಾಂಗುನಾರಾಯಣ ಮೇಯರ್ ಜೀವನ್ ಖಾತ್ರಿ ತಿಳಿಸಿದ್ದಾರೆ.