ಮುಳುಗಿದ ನ್ಯೂಯಾರ್ಕ್‌; ಇಡಾ ಚಂಡಮಾರುತಕ್ಕೆ ಅಮೆರಿಕ ತತ್ತರ

Team Udayavani, Sep 2, 2021, 10:30 PM IST

ನ್ಯೂಯಾರ್ಕ್‌: ಇಡಾ ಚಂಡಮಾರುತಕ್ಕೆ ತುತ್ತಾಗಿರುವ ಅಮೆರಿಕದ ನ್ಯೂಯಾರ್ಕ್‌, ಇತಿಹಾಸದಲ್ಲಿ ಎಂದೂ ಕಂಡಿರದಂಥ ಅಗಾಧ ಪ್ರವಾಹದ ಸುಳಿಗೆ ಸಿಲುಕಿದೆ.

ನೆರೆ, ಪ್ರವಾಹಕ್ಕೆ ಸಿಕ್ಕು 2 ವರ್ಷದ ಮಗು ಸೇರಿ ಒಟ್ಟು 9 ಮಂದಿ ಅಸುನೀಗಿದ್ದಾರೆ. ಮ್ಯಾನ್‌ಹಟನ್‌, ಬ್ರೂಕ್ಲಿನ್‌ ಹಾಗೂ ನ್ಯೂ ಜೆರ್ಸಿಯಲ್ಲಿ ಸುರಿಯುತ್ತಿರುವ ಮಳೆಗೆ ಆ ನಗರದ ತಗ್ಗು ಪ್ರದೇಶಗಳು, ಸಾರಿಗೆ ಸುರಂಗ ಮಾರ್ಗಗಳು ಮುಂತಾದ ಕಡೆಯಲ್ಲೆಲ್ಲಾ ಪ್ರವಾಹದಂತೆ ನೀರು ನುಗ್ಗಿದೆ. ನ್ಯೂಯಾರ್ಕ್‌ನ ಸೆಂಟ್ರಲ್‌ ಪಾರ್ಕ್‌ನಲ್ಲಿ ಕೇವಲ 1 ಗಂಟೆಯಲ್ಲೇ 3.15 ಇಂಚು ಮಳೆ ಸುರಿದಿದೆ. ಎರಡು ವಾರಗಳ ಅವಧಿಯಲ್ಲಿ 20 ಮಂದಿ ಸಾವಿಗೀಡಾಗಿದ್ದಾರೆ.

ರಸ್ತೆಗಳಲ್ಲಿ ನಿಲ್ಲಿಸಿದ್ದ ಕಾರುಗಳು, ಇತರ ವಾಹನಗಳು ನೀರಿನಲ್ಲಿ ತೇಲುತ್ತಿವೆ. ಜಲಾವೃತಗೊಂಡಿರುವ ಪ್ರದೇಶಗಳಿಂದ ಜನರನ್ನು ತೆರವುಗೊಳಿಸಲಾಗುತ್ತಿದೆ.

ನ್ಯೂಯಾರ್ಕ್‌ ಗವರ್ನರ್‌ ಕ್ಯಾಥಿ ಹೊಚುಲ್‌ ಹಾಗೂ ಮೇಯರ್‌ ಬಿಲ್‌ ಡೆ ಬ್ಲಾಸಿಯೊ, ನ್ಯೂಯಾರ್ಕ್‌ ವ್ಯಾಪ್ತಿಯಲ್ಲಿ ತುರ್ತು ಪರಿಸ್ಥಿತಿ ಘೋಷಿಸಿದ್ದಾರೆ. ಸಾರಿಗೆ ಸುರಂಗ ಮಾರ್ಗಗಳಲ್ಲಿ ನೀರು ನುಗ್ಗಿದ್ದರಿಂದಾಗಿ, ಮೆಟ್ರೋಪಾಲಿಟನ್‌ ಅಥಾರಿಟಿ ಎಲ್ಲಾ ಸಾರಿಗೆ ಸೇವೆಗಳನ್ನು ರದ್ದುಗೊಳಿಸಿದೆ.

ಇದನ್ನೂ ಓದಿ:ಹಿರಿಯ ಪತ್ರಕರ್ತ,ಮಾಜಿ ರಾಜ್ಯಸಭಾ ಸದಸ್ಯ ಚಂದನ್‌ ಮಿತ್ರಾ ನಿಧನ

ಸೆ.4ರಿಂದ ಮಹಾರಾಷ್ಟ್ರಕ್ಕೆ ಮಳೆ
ಮಹಾರಾಷ್ಟ್ರದ ಮರಾಠವಾಡ, ಕೊಂಕಣ, ಗೋವಾ, ಕರಾವಳಿ ಆಂಧ್ರಪ್ರದೇಶ, ತೆಲಂಗಾಣ, ತಮಿಳುನಾಡುಗಳಲ್ಲಿ ಸೆ.4ರಿಂದ ಸೆ.6ರ ವರೆಗೆ ಧಾರಾಕಾರ ಮಳೆಯಾಗುವ ಸಾಧ್ಯತೆ. ಗುಡುಗು, ಸಿಡಿಲು ಸಹಿತ ಧಾರಾಕಾರ ಮಳೆಯಾಗುವ ಸಾಧ್ಯತೆ ಬಗ್ಗೆ ಭಾರತೀಯ ಹವಾಮಾನ ಇಲಾಖೆ ಎಚ್ಚರಿಕೆ ನೀಡಿದೆ.