ನಿಧಿ ಹಕ್ಕು 8ನೇ ನಿಜಾಮರಿಗೆ: ತೀರ್ಪು

Team Udayavani, Jul 24, 2020, 6:15 AM IST

ಸಾಂದರ್ಭಿಕ ಚಿತ್ರವನ್ನು ಬಳಸಲಾಗಿದೆ – Representative Image Used

ಲಂಡನ್‌: ಬ್ರಿಟನ್‌ನ ನ್ಯಾಟ್‌ವೆಸ್ಟ್‌ ಬ್ಯಾಂಕ್‌ನ ಖಾತೆಯಲ್ಲಿರುವ ಹೈದರಾಬಾದ್‌ನ 7ನೇ ನಿಜಾಮನಿಗೆ ಸೇರಿದ 35 ಮಿಲಿಯನ್‌ ಫೌಂಡ್‌ಗಳ ಮೇಲಿನ ಹಕ್ಕು ಭಾರತದಲ್ಲಿ ನೆಲೆಸಿರುವ 8ನೇ ನಿಜಾಮ, ಅವರ ಸಹೋದರನಿಗೆ ಸೇರಿದ್ದು ಎಂದು ಬ್ರಿಟನ್‌ ಹೈ ಕೋರ್ಟ್‌ ತೀರ್ಪು ನೀಡಿದೆ.

ಈ ಹಣ ತಮಗೆ ಸೇರಬೇಕು ಎಂದು ಪಾಕಿಸ್ಥಾನದಲ್ಲಿರುವ 7ನೇ ನಿಜಾಮನ 116 ವಂಶಸ್ಥರ ಪರವಾಗಿ ನಜಾಫ್ ಅಲಿಖಾನ್‌ ಮಂಡಿಸಿದ ವಾದವನ್ನು ನ್ಯಾಯಾಲಯ ತಳ್ಳಿ ಹಾಕಿದೆ.

1948ರಲ್ಲಿ ಅಂದಿನ ಹೈದರಾಬಾದ್‌ನ 7ನೇ ನಿಜಾಮ, ಅಸಫ್ ಜಾ, ಒಂದು ಮಿಲಿಯನ್‌ ಪೌಂಡ್‌ ಹಾಗೂ ಒಂದು ಗಿನ್ನಿಯನ್ನು ಲಂಡನ್‌ನಲ್ಲಿರುವ ಪಾಕಿಸ್ಥಾನದ ಹೈ ಕಮಿಷನರ್‌ಗೆ ನೀಡಿದ್ದ.

ಅದನ್ನು ಬ್ರಿಟನ್‌ನ ಬ್ಯಾಂಕ್‌ ಖಾತೆಯಲ್ಲಿ ಇಡಲಾಗಿದೆ. ಈ ಮಧ್ಯೆ, 2018 ರಲ್ಲಿ ಭಾರತ ಸರಕಾರ ಹಾಗೂ 8ನೇ ನಿಜಾಮರ ನಡುವೆ ಒಪ್ಪಂದವಾಗಿದ್ದು, 8ನೇ ನಿಜಾಮರ ಹಕ್ಕಿನ ಪ್ರತಿಪಾದನೆಯನ್ನು ಸರಕಾರ ಬೆಂಬಲಿಸಿದೆ.

ಈ ಮಧ್ಯೆ, 2019ರ ಅಕ್ಟೋಬರ್‌ನಲ್ಲಿ ಪ್ರಕರಣದ ವಿಚಾರಣೆ ನಡೆಸಿದ್ದ ಲಂಡನ್‌ ಹೈಕೋರ್ಟ್‌ನ ನ್ಯಾಯ ಮೂರ್ತಿ ಮಾರ್ಕಸ್‌ ಸ್ಮಿತ್‌, ಭಾರತದ ಪರವಾಗಿ ತೀರ್ಪು ನೀಡಿದ್ದರು. ಈ ತೀರ್ಪು ಪ್ರಶ್ನಿಸಿ, ಪಾಕಿಸ್ಥಾನದಲ್ಲಿರುವ 7ನೇ ನಿಜಾಮನ 116 ವಂಶಸ್ಥರ ಪರವಾಗಿ ನಜಾಫ್ ಅಲಿಖಾನ್‌ ಅವರು ಹೈಕೋರ್ಟ್‌ ಮೆಟ್ಟಿಲೇರಿದ್ದರು.