ಎಷ್ಟು ಸುಳ್ಳು ಹೇಳ್ತೀರಿ… ಪಾಕ್ ಗೆ ಬಿಗ್ ಶಾಕ್ ಕೊಟ್ಟ ಟ್ರಂಪ್!

Team Udayavani, Jan 1, 2018, 6:21 PM IST

ವಾಷಿಂಗ್ಟನ್: ಉಗ್ರರನ್ನು ಮಟ್ಟಹಾಕಲು ನಾವು (ಅಮೆರಿಕ) ಕಳೆದ 15 ವರ್ಷಗಳಲ್ಲಿ ಪಾಕಿಸ್ತಾನಕ್ಕೆ ಬರೋಬ್ಬರಿ 33 ಬಿಲಿಯನ್ ಡಾಲರ್ ಆರ್ಥಿಕ ನೆರವು ನೀಡಿದ್ದೇವು. ಆದರೆ ಪಾಕಿಸ್ತಾನದಿಂದ ನಮಗೇನೂ ಫಲಿತಾಂಶ ಸಿಕ್ಕಿಲ್ಲ, ಪಾಕ್ ಬರೇ ಸುಳ್ಳು ಮತ್ತು ಕುತಂತ್ರವನ್ನೇ ಚಾಳಿಯನ್ನಾಗಿ ಮಾಡಿಕೊಂಡಿದೆ. ಬಹುಶಃ ಅಮೆರಿಕದ ನಾಯಕರು ಮೂರ್ಖರು ಎಂದು ತಿಳಿದುಕೊಂಡಿರಬೇಕು ಎಂದು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಸೋಮವಾರ ಟ್ವೀಟ್ ಮಾಡುವ ಮೂಲಕ ಆಕ್ರೋಶ ಹೊರಹಾಕಿದ್ದಾರೆ.

ಅಫ್ಘಾನಿಸ್ತಾನದಲ್ಲಿ ಭಯೋತ್ಪಾದಕರನ್ನು ಮಟ್ಟಹಾಕಿ ಎಂದು ಆರ್ಥಿಕ ನೆರವು ನೀಡುತ್ತಿದ್ದೇವು, ಆದರೆ ಪಾಕ್ ಉಗ್ರರಿಗೆ ಸ್ವರ್ಗವಾಗಿ ಬಿಟ್ಟಿದೆ. ಇನ್ಮುಂದೆ ಪಾಕಿಸ್ತಾನಕ್ಕೆ ಹೆಚ್ಚಿನ ಆರ್ಥಿಕ ಅನುದಾನ ನೀಡೋದನ್ನು ನಿಲ್ಲಿಸುತ್ತೇವೆ ಎಂದು ಎಚ್ಚರಿಕೆಯ ಸಂದೇಶ ರವಾನಿಸುವ ಮೂಲಕ ಖಡಕ್ ನಿರ್ಧಾರ ತೆಗೆದುಕೊಂಡಿರುವುದಾಗಿ ವರದಿ ತಿಳಿಸಿದೆ.

ಅಫ್ಘಾನಿಸ್ತಾನದ ಭಯೋತ್ಪಾದಕ ಸಂಘಟನೆಗಳಿಗೆ ತನ್ನ ನೆಲದಲ್ಲಿ ಆಶ್ರಯ ನೀಡಿದರೆ ಪಾಕಿಸ್ತಾನಕ್ಕೆ ನೀಡುವ ಆರ್ಥಿಕ ನೆರವು ಸ್ಥಗಿತಗೊಳಿಸುವುದಾಗಿ ಕಳೆದ ಆಗಸ್ಟ್ ನಲ್ಲಿ ಅಮೆರಿಕ ಎಚ್ಚರಿಕೆ ನೀಡಿತ್ತು. ಪಾಕಿಸ್ತಾನ ಅಫ್ಘಾನ್ ತಾಲಿಬಾನ್ ಹಾಗೂ ಹಕ್ಕಾನಿ ಭಯೋತ್ಪಾದಕರನ್ನು ಬೆಂಬಲಿಸಿದರೆ ಹುಷಾರ್ ಎಂದು ಟ್ರಂಪ್ ಸೂಚಿಸಿದ್ದರು.