Nobel Peace Prize: ಜಪಾನ್‌ನ ಹಿಂಡಾಕ್ಯೋ ಸಂಸ್ಥೆಗೆ ಶಾಂತಿ ನೊಬೆಲ್‌

Team Udayavani, Oct 12, 2024, 10:09 PM IST

ಓಸ್ಲೋ: ಪರಮಾಣು ಶಸ್ತ್ರ ಮುಕ್ತ ವಿಶ್ವದ ನಿರ್ಮಾಣಕ್ಕೆ ಶ್ರಮಿಸುತ್ತಿರುವ ಜಪಾನ್‌ನ “ನಿಹಾನ್‌ ಹಿಂಡಾಕ್ಯೋ’ ಸಂಸ್ಥೆಗೆ ಈ ಬಾರಿ ಶಾಂತಿ ನೊಬೆಲ್‌ ಗೌರವ ಲಭಿಸಿದೆ.

ಈ ಸಂಸ್ಥೆ ಪರಮಾಣು ಬಾಂಬ್‌ ದಾಳಿಯಲ್ಲಿ ಬದುಕುಳಿದವರನ್ನು ಪ್ರತಿನಿಧಿಸುತ್ತಿದ್ದು, ಜಗತ್ತು ಅಣುಬಾಂಬ್‌ ದಾಳಿಗೆ ತುತ್ತಾಗುವ ಭೀತಿಯ ನಡುವೆಯೇ ಪರಮಾಣು ಶಸ್ತ್ರದ ವಿರುದ್ಧ ಹೋರಾಡುತ್ತಿರುವ ಸಂಸ್ಥೆಗೆ ಪ್ರಶಸ್ತಿ ಲಭಿಸಿದೆ.

1956ರಲ್ಲಿ ಸ್ಥಾಪನೆಯಾದ ನಿಹಾನ್‌ ಹಿಂಡಾಕ್ಯೋ ಸಂಸ್ಥೆಯನ್ನು ಹಿಬಾಕುಶಾ (ಹಿರೋಶಿಮಾ ಮತ್ತು ನಾಗಸಾಕಿ ಪರಮಾಣು ಬಾಂಬ್‌ ದಾಳಿಯಿಂದ ಬದುಕುಳಿದವರನ್ನು ಪ್ರತಿನಿಧಿಸುವ ಜಪಾನ್‌ ಸಂಸ್ಥೆ) ಎಂದೂ ಕರೆಯಲಾಗುತ್ತದೆ. ಪರಮಾಣು ಮುಕ್ತ ಜಗತ್ತನ್ನು ನಿರ್ಮಾಣ ಮಾಡಲು ಈ ಸಂಸ್ಥೆ ದಣಿವರಿಯದ ಪ್ರಯತ್ನಗಳನ್ನು ಮಾಡುತ್ತಿದೆ ಎಂದು ನೊಬೆಲ್‌ ಸಮಿತಿ ಹೇಳಿದೆ. ಪ್ರಶಸ್ತಿ ಸಿಕ್ಕಿರುವುದಕ್ಕೆ ಪ್ರತಿಕ್ರಿಯಿಸಿರುವ ಹಿಂಡಾಕ್ಯೋ ಸಹ ಮುಖ್ಯಸ್ಥ ತೋಶಿಯುಕಿ ಮಿಮಾಕಿ, ಪ್ರಶಸ್ತಿ ಸಿಗುತ್ತದೆ ಎಂದು ಯಾವತ್ತೂ ಕನಸೂ ಕಂಡಿರಲಿಲ್ಲ ಎಂದಿದ್ದಾರೆ.

ಹಿರೋಶಿಮಾ ಮತ್ತು ನಾಗಸಾಕಿ ನಗರಗಳ ಮೇಲೆ ನಡೆದ ಅಣ್ವಸ್ತ್ರ ದಾಳಿಯ ಸಂತ್ರಸ್ತರ ಬಗ್ಗೆ ಅನೇಕ ಸಾಕ್ಷ್ಯ ಚಿತ್ರಗಳನ್ನು ಈ ಸಂಸ್ಥೆ ನಿರ್ಮಾಣ ಮಾಡಿದೆ. ಈ ಮೂಲಕ ಸಾರ್ವಜನಿಕರಲ್ಲಿ ಅರಿವು ಮೂಡಿಸುವ ಯತ್ನ ಮಾಡಿರುವುದಲ್ಲದೇ, ಮುಂದಿನ ದಿನಗಳಲ್ಲಿ ಯಾವ ದೇಶವೂ ಪರಮಾಣು ದಾಳಿ ಮಾಡಬಾರದು ಎಂದು ಮನವಿ ಮಾಡಿದೆ.