ಮೂರು ಕ್ಷಿಪಣಿ ಉಡಾಯಿಸಿ ಹುಚ್ಚಾಟ ಮೆರೆದ ಉತ್ತರ ಕೊರಿಯ

Team Udayavani, Aug 26, 2017, 11:50 AM IST

ವಾಷಿಂಗ್ಟನ್‌ : ಉತ್ತರ ಕೊರಿಯ ತನ್ನ ಪರ್ಯಾಯ ದ್ವೀಪದ ಪೂರ್ವ ಸಮುದ್ರದಲ್ಲಿ ಮೂರು ಖಂಡಾಂತರ ಅಣು ಕ್ಷಿಪಣಿಗಳನ್ನು ಉಡಾಯಿಸಿದೆ ಎಂದು ಅಮೆರಿಕದ ಮಿಲಿಟರಿ ಅಧಿಕಾರಿ ತಿಳಿಸಿದ್ದಾರೆ. 

ಅತ್ಯಂತ ಕ್ಷಿಪ್ರಗತಿಯಲ್ಲಿ ತನ್ನ ಪರಮಾಣು ಶಸ್ತ್ರಾಸ್ತ್ರ ಸಂಖ್ಯೆಯನ್ನು ಹೆಚ್ಚಿಸಿಕೊಳ್ಳುತ್ತಿರುವ ಪ್ಯಾಂಗ್ಯಾಂಗ್‌ನ ಈ ಹುಚ್ಚಾಟವನ್ನು  ನಿಗ್ರಹಿಸುವ ನಿಟ್ಟಿನಲ್ಲಿ ಅಮೆರಿಕ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಅವರು ಈಚೆಗೆ ವಹಿವಾಟೊಂದನ್ನು  ಕುದಿರಿಸಿದ್ದು  ಅದೀಗ ಉತ್ತರ ಕೊರಿಯದ ಈ 3 ಕ್ಷಿಪಣಿ ಉಡಾವಣೆಯಿಂದ ಹುಸಿಯಾಗಿದೆ. 

ಉತ್ತರ ಕೊರಿಯ ಉಡಾಯಿಸಿರುವ ಮೂರು ಖಂಡಾಂತರ ಕ್ಷಿಪಣಿಗಳು ಕಿರು ವ್ಯಾಪ್ತಿಯದ್ದಾಗಿದೆ. ಮೂರರಲ್ಲಿ ಮೊದಲೆರಡು ಕ್ಷಿಪಣಿಗಳು ಗಗನಕ್ಕೆ ನೆಗೆಯುವಲ್ಲಿ ವಿಫ‌ಲವಾಗಿವೆ. ಮೂರನೇ ಕ್ಷಿಪಣಿ ಉಡಾವಣೆಯೊಂದಿಗೆ ಸ್ಫೋಟಗೊಂಡಿದೆ ಎಂದು ಅಮೆರಿಕದ ಮಿಲಿಟರಿ ಅಧಿಕಾರಿ ತಿಳಿಸಿದ್ದಾರೆ. 

ಉತ್ತರ ಕೊರಿಯದ ಈ ಕ್ಷಿಪಣಿ ಉಡಾವಣೆ ದುಸ್ಸಾಹಸದಿಂದ ಅಮೆರಿಕದ ಗುವಾಂ ದ್ವೀಪಕ್ಕೆ ಯಾವುದೇ ಬೆದರಿಕೆ ಉಂಟಾಗಿಲ್ಲ  ಎಂದು ಅಮೆರಿಕ ಹೇಳಿದೆ. ಈ ಮೊದಲಿನ ಹೇಳಿಕೆಯಲ್ಲಿ ಉತ್ತರ ಕೊರಿಯಾ ಅಮೆರಿಕದ ಗುವಾಂ ದ್ವೀಪವನ್ನು ನಾಶ ಮಾಡುವ ಬೆದರಿಕೆಯನ್ನು  ಒಡ್ಡಿತ್ತು.