ಎಚ್‌-1ಬಿ ವೀಸಾ ಗ್ರೇಸ್‌ ಅವಧಿ ಹೆಚ್ಚಳಕ್ಕೆ ಮನವಿ

Team Udayavani, Feb 9, 2023, 8:00 PM IST

ವಾಷಿಂಗ್ಟನ್‌: ಅಮೆರಿಕದ ತಂತ್ರಜ್ಞಾನ ಕ್ಷೇತ್ರಗಳಲ್ಲಿ ಭಾರೀ ಪ್ರಮಾಣದ ಉದ್ಯೋಗ ಕಡಿತದಿಂದಾಗಿ ಭಾರತೀಯ ವೃತ್ತಿಪರರು ಕೆಲಸ ಕಳೆದುಕೊಳ್ಳುತ್ತಿರುವ ನಡುವೆಯೇ, ಎಚ್‌-1ಬಿ ವೀಸಾ ಹೊಂದಿರುವವರಿಗೆ ನೀಡಲಾಗುವ ಗ್ರೇಸ್‌ ಅವಧಿಯನ್ನು ಈಗಿರುವ 2 ತಿಂಗಳಿಂದ 1 ವರ್ಷಕ್ಕೆ ಏರಿಸಬೇಕೆಂಬ ಆಗ್ರಹ ಕೇಳಿಬಂದಿದೆ.

ಎರಡು ಭಾರತೀಯ-ಅಮೆರಿಕನ್‌ ಸಂಸ್ಥೆಗಳು ಇದಕ್ಕೆ ಸಂಬಂಧಿಸಿದ ಆನ್‌ಲೈನ್‌ ಅರ್ಜಿಯೊಂದನ್ನು ರೂಪಿಸಿದ್ದು, ಅಮೆರಿಕ ಅಧ್ಯಕ್ಷ ಜೋ ಬೈಡೆನ್‌ ಅವರಿಗೆ ಕೋರಿಕೆ ಸಲ್ಲಿಸಲು ಮುಂದಾಗಿವೆ. ಈ ಕೋರಿಕೆಯನ್ನು ಬೈಡೆನ್‌ ಅವರೇನಾದರೂ ಒಪ್ಪಿದರೆ, ಕೆಲಸ ಕಳೆದುಕೊಂಡು ನಿರುದ್ಯೋಗಿಗಳಾಗಿರುವ ಭಾರತೀಯರಿಗೆ (ಎಚ್‌1ಬಿ ವೀಸಾ ಹೊಂದಿರುವವರು) ಹೊಸ ಉದ್ಯೋಗ ಹುಡುಕಲು 1 ವರ್ಷ ಕಾಲಾವಕಾಶ ಸಿಗಲಿದೆ. ಪ್ರಸ್ತುತ ಇರುವ ನಿಯಮದಂತೆ, ಒಮ್ಮೆ ಕೆಲಸ ಹೋದರೆ ಅವರ ವೀಸಾದ ಅವಧಿ 60 ದಿನಗಳಲ್ಲಿ ಮುಗಿಯುವ ಕಾರಣ, ಅಂಥವರು ದೇಶ ಬಿಟ್ಟು ಹೋಗಬೇಕಾಗುತ್ತದೆ. 2023 ಜನವರಿ ವರೆಗೆ 91 ಸಾವಿರ ಮಂದಿ ಕೆಲಸ ಕಳೆದುಕೊಂಡಿದ್ದಾರೆ ಎಂದು ಲೇಆಫ್ ಟ್ರ್ಯಾಕರ್‌ ಡಾಟ್‌ ಕಾಮ್‌ ವರದಿ ಮಾಡಿದೆ.

ವಲಸಿಗರ ಪರವಾಗಿ (ಭಾರತ, ಚೀನಾ ಸೇರಿದಂತೆ) ನಾವು ಈ ಅರ್ಜಿ ಸಲ್ಲಿಸಿದ್ದು, ಗ್ರೇಸ್‌ ಅವಧಿಯನ್ನು 1 ವರ್ಷಕ್ಕೆ ಹೆಚ್ಚಿಸುವಂತೆ ಈ ಅರ್ಜಿ ಸಲ್ಲಿಸುತ್ತಿದ್ದೇವೆ ಎಂದು  ಫೌಂಡೇಷನ್‌ ಫಾರ್‌ ಇಂಡಿಯಾ ಮತ್ತು ಇಂಡಿಯನ್‌ ಡಯಾನ್ಪೋರಾ ಸ್ಟಡೀಸ್‌ ಆ್ಯಂಡ್‌ ಗ್ಲೋಬಲ್‌ ಟೆಕ್ನಾಲಜಿ ಪ್ರೊಫೆಷನಲ್ಸ್‌ ಅಸೋಸಿಯೇಷನ್‌ ಹೇಳಿದೆ.