ಪಾಕಿಸ್ತಾನ ಪ್ರವಾಹಕ್ಕೆ 1,100ಕ್ಕೂ ಅಧಿಕ ಮಂದಿ ಸಾವು

Team Udayavani, Aug 28, 2022, 10:15 PM IST

ಇಸ್ಲಾಮಾಬಾದ್‌: ಇತಿಹಾಸದಲ್ಲಿಯೇ ಕಂಡು ಕೇಳರಿಯದ ಮಳೆ, ಪ್ರವಾಹದ ಸಮಸ್ಯೆಗೆ ತುತ್ತಾಗಿರುವ ಪಾಕಿಸ್ತಾನದಲ್ಲಿ 1,100ಕ್ಕೂ ಅಧಿಕ ಮಂದಿ ಅಸುನೀಗಿದ್ದಾರೆ.

ಈ ಪೈಕಿ ಶನಿವಾರದಿಂದ ಭಾನುವಾರದ ಅವಧಿಯಲ್ಲಿಯೇ 119 ಮಂದಿ ಮೃತಪಟ್ಟಿದ್ದಾರೆ ಮತ್ತು ಕನಿಷ್ಠ 70 ಮಂದಿ ಗಾಯಗೊಂಡಿದ್ದಾರೆ. ಸಿಂಧ್‌ ಪ್ರಾಂತ್ಯದಲ್ಲಿ 74, ಖೈಬರ್‌-ಪಖ್ತುಂಖ್ವಾದಲ್ಲಿ 31, ಬಾಲ್ಟಿಸ್ತಾನದಲ್ಲಿ 6, ಬಲೂಚಿಸ್ತಾನ ದಲ್ಲಿ ನಾಲ್ವರು, ಪಾಕ್‌ ಆಕ್ರಮಿತ ಕಾಶ್ಮೀರದಲ್ಲಿ ಒಬ್ಬ ಅಸುನೀಗಿದ್ದಾರೆ.

ಜೂ.14ರಿಂದ ಭಾರತದ ನೆರೆಯ ರಾಷ್ಟ್ರದಲ್ಲಿ ಧಾರಾಕಾರ ಮಳೆ, ಪ್ರವಾಹ ಪರಿಸ್ಥಿತಿ ಉಂಟಾಗಿದೆ. ಪ್ರವಾಹ ಪರಿಸ್ಥಿತಿಯಿಂದಾಗಿ ಪಾಕಿಸ್ತಾನದಲ್ಲಿ ಇದುವರೆಗೆ 3,451.5 ಕಿಮೀ ರಸ್ತೆ ಹಾಳಾಗಿದೆ. 147 ಸೇತುವೆಗಳು ಕೊಚ್ಚಿ ಹೋಗಿವೆ. 170 ವಾಣಿಜ್ಯ ಮಳಿಗೆಗಳು ಹಾಳಾಗಿವೆ ಮತ್ತು 9,49,858 ಮನೆಗಳು ಆಂಶಿಕವಾಗಿ ಅಥವಾ ಪೂರ್ಣವಾಗಿ ನಾಶವಾಗಿವೆ.

ವಿಡಿಯೋ ವೈರಲ್‌:
ಇದೇ ವೇಳೆ ಪಾಕಿಸ್ತಾನದ ಕಲಾಂ ಎಂಬಲ್ಲಿ ಇರುವ ಹೋಟೆಲ್‌ ಎಂದು ಮಳೆ ಮತ್ತು ಪ್ರವಾಹದಿಂದಾಗಿ ಕುಸಿದು ಹೋಗಿದೆ. ಆ ಘಟನೆಯನ್ನು ಯಾರೋ ಚಿತ್ರೀಕರಿಸಿ ಜಾಲತಾಣಗಳಲ್ಲಿ ಅಪ್‌ಲೋಡ್‌ ಮಾಡಿದ್ದು ಈಗ ವೈರಲ್‌ ಆಗಿದೆ. ಪಾಕಿಸ್ತಾನದ ಕಲಾಂ ಮತ್ತು ಸುತ್ತಮುತ್ತಲಿನ ವ್ಯಾಪ್ತಿಯ ಪ್ರದೇಶದಲ್ಲಿ ಅದು ದುಬಾರಿ ರೆಸಾರ್ಟ್‌ ಆಗಿತ್ತು.