ರಾಜೀನಾಮೆ ನೀಡಿ, ಇಲ್ಲವೇ ಅವಿಶ್ವಾಸ ಎದುರಿಸಿ: ಇಮ್ರಾನ್‌ಗೆ ಬಿಲಾವಲ್‌ ಎಚ್ಚರಿಕೆ

Team Udayavani, Mar 4, 2022, 9:45 PM IST

ಲಾಹೋರ್‌: ಪಾಕಿಸ್ಥಾನದ ಪ್ರಧಾನಿ ಇಮ್ರಾನ್‌ಖಾನ್‌ ಅವರು 5 ದಿನಗಳೊಳಗೆ ರಾಜೀನಾಮೆ ನೀಡಬೇಕು ಇಲ್ಲವೇ ಅವಿಶ್ವಾಸ ಮಂಡನೆಯನ್ನು ಎದುರಿಸಲು ಸಿದ್ಧರಿರಬೇಕು ಎಂದು ಪಾಕಿಸ್ಥಾನ ಪೀಪಲ್ಸ್‌ ಪಾರ್ಟಿ (ಪಿಪಿಪಿ) ಅಧ್ಯಕ್ಷ ಬಿಲಾವಲ್‌ ಭುಟ್ಟೋ ಜರ್ದಾರಿ ಎಚ್ಚರಿಸಿದ್ದಾರೆ.

ದೇಶದಲ್ಲಿ ಕೂಡಲೇ ಮುಕ್ತ ಹಾಗೂ ನ್ಯಾಯಸಮ್ಮತ ಚುನಾವಣೆ ನಡೆಯಬೇಕು. ಪ್ರಧಾನಿ ಇಮ್ರಾನ್‌ ಖಾನ್‌ ಮುಂದೆ ಈಗ ಎರಡೇ ಆಯ್ಕೆಗಳು ಉಳಿದಿವೆ. ಒಂದೋ ಅವರು ರಾಜೀನಾಮೆ ನೀಡಬೇಕು, ಇಲ್ಲವೇ ಅವಿಶ್ವಾಸ ಮಂಡನೆಯನ್ನು ಎದುರಿಸಬೇಕು.

ಎಲ್ಲ ಪ್ರಮುಖ ಪಕ್ಷಗಳು ಅವಿಶ್ವಾಸ ಮಂಡನೆ ವಿಷಯದಲ್ಲಿ ಒಗ್ಗಟ್ಟಿನಿಂದಿವೆ. ಇದು ಪಿಪಿಪಿ ನಿಲುವಿಗೆ ಸಿಕ್ಕಿರುವ ಜಯ ಎಂದು ನಾವು ಭಾವಿಸಿದ್ದೇವೆ ಎಂದು ಅವರು ಲೋಧ್ರನ್‌ನ ರ್‍ಯಾಲಿಯೊಂದರಲ್ಲಿ ಮಾತನಾಡುತ್ತಾ ಹೇಳಿದ್ದಾರೆ.

ಇಮ್ರಾನ್‌ ಖಾನ್‌ ಅವರು ಅಕ್ರಮವಾಗಿ ಆಯ್ಕೆಯಾಗಿರುವ ಪ್ರಧಾನಿಯಾಗಿದ್ದು, ಅವರು ತನ್ನ ಅಧಿಕಾರಾವಧಿಯ ಕೊನೆಯ ದಿನಗಳನ್ನು ಎಣಿಸುತ್ತಿದ್ದಾರೆ ಎಂದರು.