‘ಸಾಹಬ್‌’ ಸಯೀದ್‌ ವಿರುದ್ಧ ಕೇಸ್‌ ಇಲ್ಲ : ಪಾಕಿಸ್ಥಾನ ಪ್ರಧಾನಿ

Team Udayavani, Jan 17, 2018, 11:28 AM IST

ಇಸ್ಲಾಮಾಬಾದ್‌ : ಮುಂಬಯಿ ಮೇಲಿನ ಉಗ್ರ ದಾಳಿಯ ಮಾಸ್ಟರ್‌ ಮೈಂಡ್‌ ಹಾಗೂ ಜಮಾತ್‌ ಉದ್‌ ದಾವಾ ನಿಷೇಧಿತ ಉಗ್ರ ಸಂಘಟನೆಯ ಮುಖ್ಯಸ್ಥನಾಗಿರುವ ಹಫೀಜ್‌ ಸಯೀದ್‌ ವಿರುದ್ಧ ದೇಶದಲ್ಲಿ ಯಾವುದೇ ಕೇಸುಗಳಿಲ್ಲ ಎಂದು ಹೇಳುವ ಮೂಲಕ ಪಾಕ್‌ ಪ್ರಧಾನಿ ಶಹೀದ್‌ ಖಕಾನ್‌ ಅಬ್ಟಾಸಿ ಅವರು ವಿವಾದವನ್ನು ಸೃಷ್ಟಿಸಿದ್ದಾರೆ ಮಾತ್ರವಲ್ಲದೆ ಉಗ್ರ ಸಯೀದ್‌ನನ್ನು ಪರೋಕ್ಷವಾಗಿ ಬೆಂಬಲಿಸಿದ್ದಾರೆ.

ಟಿವಿ ಗೆ ನೀಡಿದ ಸಂದರ್ಶನದಲ್ಲಿ ಪಾಕ್‌ ಪ್ರಧಾನಿ ಅಬ್ಟಾಸಿ ಅವರು “ಹಫೀಜ್‌ ಸಯೀದ್‌ ಸಾಹಬ್‌’ ಎಂದು ಸಂಬೋಧಿಸುವ ಮೂಲಕ ಮುಂಬಯಿ ದಾಳಿಯ ಸೂತ್ರಧಾರ ಉಗ್ರನಿಗೆ ಗೌರವ ಸಲ್ಲಿಸಿದ್ದಾರೆ. 

ದೇಶದಲ್ಲಿ ಇಸ್ಲಾಮಿಕ ಕಾನೂನನ್ನು ಜಾರಿಗೆ ತರದಿರುವ ಪಾಕ್‌ ಸರಕಾರದ ವಿರುದ್ದ ಬಹಿರಂಗವಾಗಿ ಹಫೀಜ್‌ ಸಯೀದ್‌ ಟೀಕೆ ಮಾಡಿದ ಒಂದು ದಿನದ ತರುವಾಯ ಪಾಕ್‌ ಪ್ರಧಾನಿ ಅಬ್ಟಾಸಿ ಅವರು “ಹಫೀಜ್‌’ನನ್ನು “ಸಾಹಬ್‌’ ಎಂದು ಗೌರವದಿಂದ ಸಂಬೋಧಿಸಿರುವುದು ಗಮನಾರ್ಹವಾಗಿದೆ. 

ಅಮೆರಿಕ 25.50 ಕೋಟಿ ಡಾಲರ್‌ಗಳ ಮಿಲಿಟರಿ ನೆರವನ್ನು ತಡೆಹಿಡಿದ ತತ್‌ಕ್ಷಣವೇ ಪಾಕ್‌ ಸರಕಾರ ಹಫೀಜ್‌ ಸಯೀದ್‌ನ ಜಮಾತ್‌ ಉದ್‌ ದಾವಾ ಸಂಘಟನೆಯನ್ನು ಕಪ್ಪು ಪಟ್ಟಿಗೆ ಸೇರಿಸಿತ್ತು. ಇದಕ್ಕೆ ಮುನ್ನ ಜೆಯುಡಿ ಲಾಹೋರ್‌ನಲ್ಲಿ ತನ್ನ ಮಿಲಿ ಮುಸ್ಲಿಂ ಲೀಗ್‌ (ಎಂಎಂಎಲ್‌) ರಾಜಕೀಯ ಪಕ್ಷದ ಮೊದಲ ಕಚೇರಿಯನ್ನು ಆರಂಭಿಸಿತ್ತು.