ಪಿಟಿಪಿ ನಾಯಕ ಮೆಹ್ಸೂದ್‌ ಈಗ ಜಾಗತಿಕ ಉಗ್ರ

Team Udayavani, Jul 18, 2020, 8:48 AM IST

ವಿಶ್ವಸಂಸ್ಥೆ: ಪಾಕಿಸ್ಥಾನದ ತೆಹ್ರಿಕ್‌-ಇ-ತಾಲಿ ಬಾನ್‌(ಟಿಟಿಪಿ) ಉಗ್ರ ಸಂಘಟನೆಯ ನಾಯಕ ನೂರ್‌ ವಾಲಿ ಮೆಹ್ಸೂದ್‌ನನ್ನು ಜಾಗತಿಕ ಭಯೋತ್ಪಾದಕ ಎಂದು ಘೋಷಿಸಿ ವಿಶ್ವಸಂಸ್ಥೆ ಶುಕ್ರವಾರ ಆದೇಶ ಹೊರಡಿಸಿದೆ. ಅಲ್‌ಖೈದಾ ಉಗ್ರ ಸಂಘಟನೆಯ ಪರವಾಗಿ ಕೆಲಸ ಮಾಡುವ ಇತರೆ ಸಂಘಟನೆಗಳಿಗೆ ಹಣಕಾಸು ನೆರವು ಒದಗಿಸಿದ, ವಿಧ್ವಂಸಕ ಕೃತ್ಯಗಳಿಗೆ ಸಂಚು ರೂಪಿಸಿದ ಮತ್ತು ದಾಳಿ ನಡೆಸಲು ನೆರವಾದ ಕಾರಣಕ್ಕಾಗಿ ಈ ಕ್ರಮ ಕೈಗೊಂಡಿರುವುದಾಗಿ ವಿಶ್ವಸಂಸ್ಥೆ ತಿಳಿಸಿದೆ.

ವಿಶ್ವಸಂಸ್ಥೆ ಭದ್ರತಾ ಮಂಡಳಿಯ 1267 ಐಎಸ್‌ಐಎಲ್‌ ಮತ್ತು ಅಲ್‌ಖೈದಾ ನಿರ್ಬಂಧ ಸಮಿತಿಯು 42ವರ್ಷದ ಮೆಹ್ಸೂದ್‌ನನ್ನು ಜಾಗತಿಕ ಉಗ್ರ ಎಂದು ಘೋಷಿಸಿದ್ದು, ಪರಿಣಾಮ ಆತನ ಆಸ್ತಿಪಾಸ್ತಿಗಳು ಜಪ್ತಿಯಾಗ ಲಿದ್ದು, ಪ್ರಯಾಣಕ್ಕೂ ನಿರ್ಬಂಧ ಹೇರಲಾಗು ತ್ತದೆ. 2018ರ ಜೂನ್‌ನಲ್ಲಿ ಮೆಹ್ಸೂದ್‌ನನ್ನು ತೆಹ್ರೀಕ್‌-ಇ-ತಾಲಿಬಾನ್‌ ಪಾಕಿಸ್ತಾನ್‌ನ ನಾಯಕನೆಂದು ಘೋಷಿಸಲಾಗಿತ್ತು. ಟಿಟಿಪಿ ಮಾಜಿ ನಾಯಕ ಮೌಲಾನಾ ಫ‌ಜುಲ್ಲಾ ಸಾವಿನ ನಂತರ ಆತನ ಸ್ಥಾನಕ್ಕೆ ಮೆಹ್ಸೂದ್‌ನನ್ನು ನೇಮಕ ಮಾಡಲಾಗಿತ್ತು. 2011ರ ಜುಲೈ 29ರಂದು ಟಿಟಿಪಿಯನ್ನು ವಿಶ್ವಸಂಸ್ಥೆ ಕಪ್ಪುಪಟ್ಟಿಗೆ ಸೇರಿಸಿತ್ತು.

ನೂರ್‌ ವಾಲಿಯ ನೇತೃತ್ವದಲ್ಲಿ ಟಿಟಿಪಿ ಉಗ್ರ ಸಂಘಟನೆಯು ಪಾಕಿಸ್ಥಾನದಲ್ಲಿ ಅನೇಕ ವಿಧ್ವಂಸಕ ಕೃತ್ಯಗಳಲ್ಲಿ ಭಾಗಿಯಾಗಿದೆ. ಅಲ್ಲದೆ, 2010ರ ಮೇ 1ರಂದು ಟೈಮ್ಸ್‌ ಸ್ಕ್ವೇರ್‌ನಲ್ಲಿ ನಡೆದ ಬಾಂಬ್‌ ದಾಳಿ ಯತ್ನದ ಹಿಂದೆಯೂ ಈ ಸಂಘಟನೆಯ ಕೈವಾಡವಿತ್ತು.