‘ಪಾಕಿಸ್ಥಾನಕ್ಕೆ ಚಾಲೆಂಜ್ ಮಾಡಿದ್ರೆ ನಿಮ್ಗೆ ಇದೇ ಗತಿ’

Team Udayavani, Feb 28, 2019, 9:51 AM IST

ಬುಧವಾರ ಭಾರತೀಯ ವಾಯುಸೀಮೆಯನ್ನು ಪ್ರವೇಶಿಸಿದ ಪಾಕಿಸ್ಥಾನದ ಫೈಟರ್ ಜೆಟ್ ಅನ್ನು ಹೊಡೆದುರುಳಿಸುವ ಭರದಲ್ಲಿ ಗಡಿನಿಯಂತ್ರಣ ರೇಖೆಯ ಬಳಿ ಪಾಕ್ ನೆಲದಲ್ಲಿ ಪತನಗೊಂಡ ಭಾರತದ ಮಿಗ್ 21 ವಿಮಾನದ ಅವಶೇಷಗಳ ಫೊಟೋ ಒಂದನ್ನು ಟ್ವೀಟ್ ಮಾಡಿ ತನ್ನ ಪರಾಕ್ರಮದ ಬಗ್ಗೆ ಪಾಕ್ ಬಡಾಯಿ ಕೊಚ್ಚಿಕೊಂಡಿದೆ.

ಆ ಚಿತ್ರದಲ್ಲಿ ಇಬ್ಬರು ಪಾಕ್ ಸೈನಿಕರಿದ್ದು ಅವರ ಮುಖಭಾಗ ಮತ್ತು ಸಮವಸ್ತ್ರದಲ್ಲಿ ಹೆಸರಿರುವ ಭಾಗವನ್ನು ಮರೆಮಾಚಲಾಗಿದೆ. ಅವರಲ್ಲಿ ಒಬ್ಬ ಯೋಧ ಪತನಗೊಂಡ ವಿಮಾನದ ಅವಶೇಷವೊಂದರ ಮೇಲೆ ನಿಂತು ‘ಚಿಯರ್ ಅಪ್’ ಸಿಂಬಲ್ ಅನ್ನು ತೋರಿಸುತ್ತಿದ್ದಾನೆ. ಈ ಫೊಟೋವನ್ನು ‘ಪಾಕಿಸ್ಥಾನ್ ಡಿಫೆನ್ಸ್’ ತನ್ನ ಅಧಿಕೃತ ಟ್ವಿಟ್ಟರ್ ಅಕೌಂಟ್ ನಲ್ಲಿ ಬುಧವಾರದಂದು ಪ್ರಕಟಿಸಿದೆ. ‘ಶಕ್ತಿಶಾಲಿ ಅಲ್ಲಾಹುವಿನ ಕೃಪೆ ದೊಡ್ಡದು. ಭಾರತದ ಯುದ್ಧ ವಿಮಾನಗಳು ಪಾಕಿಸ್ಥಾನದ ವಾಯುಪ್ರದೇಶದೊಳಗೆ 21 ನಿಮಿಷ ಹಾರಲಿ,​​​​​ ಆಮೇಲಿನದ್ದನ್ನು ನಾವು ನೋಡಿಕೊಳ್ಳುತ್ತೇವೆ​​​​​​​’ ಎಂದು ಈ ಟ್ವೀಟ್ ನಲ್ಲಿ ಬರೆದುಕೊಳ್ಳಲಾಗಿದೆ.’

​​​​​​​
ಮೊನ್ನೆಯಿಂದೀಚೆಗೆ ಹಳೆಯ ಫೊಟೋ, ತಿರುಚಿದ ಫೊಟೋಗಳನ್ನೇ ಹಾಕಿ ನಗೆಪಾಟಲಿಗೆ ಗುರಿಯಾಗುತ್ತಿರುವ ಪಾಕ್ ಈ ಬಾರಿಯೂ ಯಾವುದಾದರೂ ಹಳೇ ಫೊಟೋವನ್ನು ಪೋಸ್ಟ್ ಮಾಡಿ  ಉತ್ತರನ ಪೌರುಷ ತೋರಿಸುತ್ತಿದೆಯೇ ಎಂಬ ಸಂದೇಹವೂ ವ್ಯಕ್ತವಾಗುತ್ತಿದೆ.