ಅತ್ತ ಸಿಎಂ ಆಗಿ ಪ್ರಮಾಣ, ಇತ್ತ ಪಕ್ಷದಿಂದ ಉಚ್ಛಾಟನೆ!

Team Udayavani, Jul 20, 2017, 6:45 AM IST

ಕೊಹಿಮಾ/ಗುವಾಹಟಿ: ಕ್ಷಿಪ್ರ ರಾಜಕೀಯ ಬೆಳವಣಿಗೆಯಲ್ಲಿ ನಾಗಾಲ್ಯಾಂಡ್‌ ಮುಖ್ಯಮಂತ್ರಿ ಶುರ್‌ಹೋಝೈಲೆ ಲಿಝೈಸ್ಟು ಅವರನ್ನು ವಜಾ ಮಾಡಿರುವ ರಾಜ್ಯಪಾಲ ಪಿ.ಬಿ.ಆಚಾರ್ಯ ಅವರು, ನೂತನ ಸಿಎಂ ಆಗಿ ಟಿ.ಆರ್‌.ಝೆಲಿಯಾಂಗ್‌ ಅವರನ್ನು ನೇಮಿಸಿದ್ದಾರೆ. ನೇಮಕವಾದ ಕೆಲ ಹೊತ್ತಿನಲ್ಲಿ ಅವರ ಪಕ್ಷ ನಾಗಾ ಪೀಪಲ್ಸ್‌ ಫ್ರಂಟ್‌ ಅವರನ್ನು ಪಕ್ಷ ವಿರೋಧಿ ಚಟುವಟಿಕೆ ಆರೋಪ ಹೊರಿಸಿ 6 ವರ್ಷಗಳ ಕಾಲ ಪಕ್ಷದಿಂದ ಉಚ್ಛಾಟಿಸಿದೆ. 

ಬುಧವಾರ ಮಧ್ಯಾಹ್ನ ಝೆಲಿಯಾಂಗ್‌ ಪ್ರಮಾಣವಚನ ಸ್ವೀಕರಿಸಿದ್ದು, ಜು.22ರಂದು ಬಹುಮತ ಸಾಬೀತು ಪಡಿಸುವಂತೆ ಹೇಳಲಾಗಿದೆ. ಆದರೆ ಪಕ್ಷದಿಂದ ಉಚ್ಛಾಟನೆ ಮಾಡಿರುವ ಹಿನ್ನೆಲೆಯಲ್ಲಿ ನಾಗಾಲ್ಯಂಡ್‌ ರಾಜಕೀಯ ಕುತೂಹಲಕರ ತಿರುವು ಪಡೆದುಕೊಂಡಿದೆ.  ಜು.8ರಂದು ಝೆಲಿಯಾಂಗ್‌ ಬಂಡಾಯ ಘೋಷಿಸಿದ್ದು, ಎನ್‌ಪಿಎಫ್ನ ಬಹುತೇಕ ಶಾಸಕರು ತಮಗೆ ಬೆಂಬಲ ನೀಡಿದ್ದಾರೆ. ಮಾಜಿ ಮುಖ್ಯಮಂತ್ರಿ ಲಿಸೈಸ್ಟು ಅವರ ಪರವಾಗಿಲ್ಲ ಎಂದು ಹೇಳಿದ್ದರು. ಈ ಹಿನ್ನೆಲೆಯಲ್ಲಿ ಬಹುಮತ ಸಾಬೀತು ಪಡಿಸಲು ಲಿಝೈಸ್ಟು ಅವರಿಗೆ ರಾಜ್ಯಪಾಲರು ಹೇಳಿದ್ದರು.