ಪಾಕ್‌ ಐಎಸ್‌ಐಗೆ ಉಗ್ರ ನಂಟು, ಸ್ವಂತ ವಿದೇಶ ನೀತಿ: ಅಮೆರಿಕ

Team Udayavani, Oct 4, 2017, 11:56 AM IST

ವಾಷಿಂಗ್ಟನ್‌ : “”ಪಾಕ್‌ ಗುಪ್ತಚರ ಸಂಸ್ಥೆ ಐಎಸ್‌ಎಸ್‌ ಗೆ ಹಲವು ಭದ್ರತಾ ಸಮೂಹಗಳೊಂದಿಗೆ ನಂಟಿದೆ ಮತ್ತು ಅದು ತನ್ನದೇ ಆದ ವಿದೇಶ ನೀತಿಯನ್ನು ಅನುಸರಿಸುತ್ತಿದೆ” ಎಂದು ಅಮೆರಿಕದ ಉನ್ನತ ಸೇನಾ ಜನರಲ್‌ ಹೇಳಿದ್ದಾರೆ.

ಆದರೆ ಪಾಕಿಸ್ಥಾನ ಅಮೆರಿಕದ ಈ ಆರೋಪಗಳನ್ನು ಸಾರಾಸಗಟು ಅಲ್ಲಗಳೆದಿದೆ ಮತ್ತು ಆ ಮೂಲಕ ಪಾಕ್‌ ಐಎಸ್‌ಐ ಗುಪ್ತಚರ ಸಂಸ್ಥೆ ಹಲವಾರು ಉಗ್ರ ಸಮೂಹಗಳಿಗೆ ನಾನಾ ರೀತಿಯ ನೆರವು, ಬೆಂಬಲ, ಪ್ರೋತ್ಸಾಹ ಇತ್ಯಾದಿಗಳನ್ನು ನೀಡುತ್ತಿರುವುದನ್ನು ಅದು ಪರೋಕ್ಷವಾಗಿ ಒಪ್ಪಿಕೊಂಡಂತಾಗಿದೆ ಎಂದು ಉನ್ನತ ಅಮೆರಿಕನ್‌ ಸೇನಾ ಜನರಲ್‌ ಹೇಳಿದ್ದಾರೆ. 

ಅಮೆರಿಕ ಮಾತ್ರವಲ್ಲದೆ ಭಾರತ ಮತ್ತು ಅಫ್ಘಾನಿಸ್ಥಾನ ಕೂಡ ಈ ಹಿಂದೆ ಹಲವು ಬಾರಿ ಈ ರೀತಿಯ ಆರೋಪಗಳನ್ನು ಮಾಡಿದೆ.

ಅಮೆರಿಕನ್‌ ಸೇನೆಯ ಜಂಟಿ ಮುಖ್ಯಸ್ಥರಾಗಿರುವ ಜೋಸೆಫ್ ಡನ್‌ಫ‌ರ್ಡ್‌ ಅವರು ವಿದೇಶ ಬಾಂಧ್ಯವಗಳ ಪ್ರಬಲ ಸೆನೆಟ್‌ ಸಭೆಯಲ್ಲಿ ಮಾತನಾಡುತ್ತಾ, “ಪಾಕ್‌ ಗುಪ್ತಚರ ಸಂಸ್ಥೆ ಐಎಸ್‌ಐಗೆ ಹಲವು ಭಯೋತ್ಪಾದಕ ಸಮೂಹಗಳೊಂದಿಗೆ ನಂಟಿದೆ ಮಾತ್ರವಲ್ಲ ಅದು ಈ ಸಮೂಹಗಳಿಗೆ ಹಲವು ರೀತಿಯಲ್ಲಿ ನೆರವು, ಬೆಂಬಲ, ಪ್ರೋತ್ಸಾಹ, ತರಬೇತಿ, ಮೂಲ ಸೌಕರ್ಯ ಇತ್ಯಾದಿಗಳನ್ನು ಒದಗುತ್ತಾ ಬಂದಿದೆ ಎಂಬುದು ನನಗೆ ಅತ್ಯಂತ ಸ್ಪಷ್ಟವಿದೆ’ ಎಂದು ಹೇಳಿದರು. 

ಜನರಲ್‌ ಡನ್‌ಫ‌ರ್ಡ್‌ ಅವರು ಸೆನೆಟರ್‌ ಜೋ ಡೊನೇಲಿ ಅವರ ಪ್ರಶ್ನೆಗೆ ಉತ್ತರವಾಗಿ ಈ ಮಾಹಿತಿಯನ್ನು ಸೆನೆಟ ಸಭೆಗೆ ನೀಡಿದರು. 

ಐಎಸ್‌ಐ ಈಗಲೂ ತಾಲಿಬಾನ್‌ಗೆ ನೆರವಾಗುತ್ತಿದೆಯೇ ಎಂದು ಡೊನೇಲಿ ಕೇಳಿದ ಪ್ರಶ್ನೆಗೆ ಡನ್‌ಫ‌ರ್ಡ್‌, ಪಾಕ್‌ ಗುಪ್ತಚರ ಸಂಸ್ಥೆ ತಾಲಿಬಾನ್‌ ಮಾತ್ರವಲ್ಲದೆ ಹಲವು ಉಗ್ರ ಸಮೂಹಗಳಿಗೆ ಸಕಲ ರೀತಿಯಲ್ಲಿ ನೆರವಾಗುತ್ತಿರುವುದು ಖಚಿತವಿದೆ’ ಎಂದು ಉತ್ತರಿಸಿದರು.