ಅಫ್ಘಾನಿಸ್ಥಾನದಲ್ಲಿ ವಿಮಾನ ಪತನ ; 83 ಜನ ಸಾವು

Team Udayavani, Jan 27, 2020, 6:21 PM IST

ಕಾಬೂಲ್: ಇಲ್ಲಿನ ಘಜ್ನಿ ಪ್ರಾಂತ್ಯದ ದೆಹ್ ಯಾಕ್ ಜಿಲ್ಲೆಯಲ್ಲಿ 83 ಜನರನ್ನು ಹೊತ್ತೊಯ್ಯುತ್ತಿದ್ದ ಪ್ರಯಾಣಿಕರ ವಿಮಾನ ಒಂದು ಇಂದು ಅಪಘಾತಕ್ಕೀಡಾಗಿದೆ. ತಾಲೀಬಾನ್ ಪ್ರಾಬಲ್ಯವಿರುವ ಪ್ರಾಂತ್ಯದಲ್ಲಿ ಈ ವಿಮಾನ ಪತನಗೊಂಡಿರುವ ಸುದ್ದಿಯನ್ನು ಇಲ್ಲಿನ ಸ್ಥಳೀಯ ಅಧಿಕಾರಿ ಖಲೀಕ್ ದಾದ್ ಅಕ್ಬಾರಿ ಅವರು ಖಚಿತಪಡಿಸಿದ್ದಾರೆ. ಮತ್ತು ಘಟನಾ ಸ್ಥಳಕ್ಕೆ ವಿಶೇಷ ಪಡೆಗಳನ್ನು ರವಾನಿಸುವಂತೆ ಅವರು ಅಫ್ಘಾನ್ ಸರಕಾರಕ್ಕೆ ಮನವಿ ಮಾಡಿಕೊಂಡಿದ್ದಾರೆ.

ಪ್ರಾರಂಭದಲ್ಲಿ ಈ ವಿಮಾನ ಏರಿಯಾನ ಅಫ್ಘಾನ್ ಏರ್ ಲೈನ್ಸ್ ಮೂಲಕ ಕಾರ್ಯಾಚರಿಸುತ್ತಿರುವ ಬೋಯಿಂಗ್ 737-400 ವಿಮಾನ ಎಂದು ಹೇಳಲಾಗಿತ್ತಾದರೂ ಬಳಿಕ ಸರಕಾರೀ ಒಡೆತನದ ಈ ಸಂಸ್ಥೆ ತನ್ನ ಒಡೆತನಕ್ಕೆ ಸೇರಿದ ವಿಮಾನ ಅಪಘಾತಕ್ಕೀಡಾಗಿರುವ ಸುದ್ದಿಯನ್ನು ನಿರಾಕರಿಸಿದೆ.

ಹಾಗಾಗಿ ಇದು ವಿದೇಶಿ ವಿಮಾನವಾಗಿರಬಹುದು ಎಂಬ ಸಂಶಯ ಇದೀಗ ವ್ಯಕ್ತವಾಗಿದೆ. ಆದರೆ ಈ ವಿಮಾನ ಎಲ್ಲಿಂದ ಹೊರಟು ಎಲ್ಲಿಗೆ ಸಾಗುತ್ತಿತ್ತು ಎಂಬ ಮಾಹಿತಿ ಇನ್ನಷ್ಟೇ ಲಭಿಸಬೇಕಿದೆ. ಘಟನೆಯಲ್ಲಿ ವಿಮಾನದಲ್ಲಿದ್ದ ಎಲ್ಲರೂ ಮೃತರಾಗಿದ್ದಾರೆ ಮತ್ತು ಇಬ್ಬರು ಪೈಲಟ್ ಗಳ ಸುಟ್ಟು ಕರಕಲಾದ ಮೃತದೇಹಗಳನ್ನು ಹೊರತೆಗೆಯುವಲ್ಲಿ ಸ್ಥಳೀಯರು ಯಶಸ್ವಿಯಾಗಿದ್ದಾರೆ.