ಭಾರತಕ್ಕೆ ಹರ್ಕ್ಯುಲಸ್‌ ಬಿಡಿಭಾಗಗಳ ಮಾರಾಟಕ್ಕೆ ಪೆಂಟಗಾನ್‌ ಅಸ್ತು

Team Udayavani, Oct 3, 2020, 6:15 AM IST

ವಾಷಿಂಗ್ಟನ್‌: ಭಾರತದ ಬೇಡಿಕೆಯ ಮೇರೆಗೆ ಸೂಪರ್‌ ಹರ್ಕ್ಯುಲಸ್‌ ನೌಕಾಯುದ್ಧ ವಿಮಾನಕ್ಕೆ ಸಂಬಂಧಿಸಿದ ಬಿಡಿಭಾಗಗಳು ಸೇರಿದಂತೆ ಇತರ ಉಪಕರಣಗಳನ್ನು ಮಾರಲು ಅಮೆರಿಕದ ಪೆಂಟಗನ್‌ ಸಮ್ಮತಿಸಿದೆ. ಅಂದಾಜು 660 ಕೋ. ರೂ. ಮೌಲ್ಯದ ಮಾರಾಟ ವ್ಯವಹಾರ ಇದಾಗಿದೆ.

ಅಮೆರಿಕ ರಕ್ಷಣ ಇಲಾಖೆಯ ಡಿಫೆನ್ಸ್‌ ಸೆಕ್ಯುರಿಟಿ ಕಾರ್ಪೊರೇಶನ್‌ ಏಜೆನ್ಸಿ ಸಂಸತ್ತಿಗೆ ನೀಡಿದ ಅಧಿಸೂಚನೆಯಲ್ಲಿ ಈ ಮಾಹಿತಿ ನೀಡಿದೆ. “ಅಮೆರಿಕ- ಭಾರತ ಕಾರ್ಯತಂತ್ರದ ಭಾಗವಾಗಿ ವಿದೇಶಿ ನೀತಿ ಮತ್ತು ರಾಷ್ಟ್ರೀಯ ಭದ್ರತೆ ಬೆಂಬಲಿಸುವ ಉದ್ದೇಶದಿಂದ ಹರ್ಕ್ಯು ಲಸ್‌ ಬಿಡಿಭಾಗಗಳ ಮಾರಾಟ ನಡೆಯಲಿದೆ. ಉಭಯ ದೇಶಗಳ ನಡುವಿನ ರಾಜಕೀಯ ಸ್ಥಿರತೆ, ಶಾಂತಿ, ಆರ್ಥಿಕ ಪ್ರಗತಿಗೆ ಇದು ಸಹಕಾರಿ’ ಎಂದು ಏಜೆನ್ಸಿ ಹೇಳಿದೆ.

ಭಾರತದ ಬೇಡಿಕೆ ಏನು?
ಸಿ-130 ಜೆ ಸೂಪರ್‌ ಹರ್ಕ್ಯುಲಸ್‌ ಕಾರ್ಗೋ ಏರ್‌ಕ್ರಾಫ್ಟ್ಗೆ ಸಂಬಂಧಿಸಿದ ಬಿಡಿಭಾಗಗಳು, ದುರಸ್ತಿ ಉಪಕರಣಗಳು, ಕಾಟ್ರಿಡ್ಜ್ ಆಕ್ಯುಯೆಟೆಡ್‌ ಡಿವೈಸಸ್‌, ಫೈರ್‌ ಎಕ್ಸ್‌ಟಿಂಗ್ವಿಷರ್‌ ಕಾಟ್ರಿಡ್ಜ್ , ಫ್ಲೇರ್‌ ಕಾಟ್ರಿಡ್ಜ್, ಬಿಬಿಯು- 35/ಬಿ ಕಾಟ್ರಿಡ್ಜ್ ಇಂಪಲ್ಸ್‌ ಸ್ಕ್ವಿಬ್ಸ್, ಎಎನ್‌/ ಎಎಲ್‌ಆರ್‌-56 ಎಂ ಸುಧಾರಿತ ರಾಡಾರ್‌ ವಾರ್ನಿಂಗ್‌ ರಿಸೀವರ್‌ ಶಿಪ್‌ಸೆಟ್‌, 10 ಲೈಟ್‌ವೇಟ್‌ ನೈಟ್‌ ವಿಷನ್‌ ಬೈನಾಕ್ಯುಲರ್‌, ನೈಟ್‌ ವಿಷನ್‌ ಗಾಗಲ್‌, ಜಿಪಿಎಸ್‌ ಮತ್ತು ಎಲೆಕ್ಟ್ರಾನಿಕ್‌ ವಾರ್‌ಫೇರ್‌ಗಳ ಖರೀದಿಗೆ ಭಾರತ ಒಲವು ತೋರಿತ್ತು.