ಇಸ್ರೇಲ್ ಪ್ರವಾಸದ ವೇಳೆ ಮೋದಿ, ಮೋಶೆ ಭೇಟಿ; ಯಾರೀತ ಗೊತ್ತಾ?

Team Udayavani, Jun 29, 2017, 5:08 PM IST

ನವದೆಹಲಿ:ಜುಲೈ 4ರಿಂದ ನಾಲ್ಕು ದಿನಗಳ ಕಾಲ ಪ್ರಧಾನಿ ನರೇಂದ್ರ ಮೋದಿ ಅವರು ಇಸ್ರೇಲ್ ಪ್ರವಾಸ ಕೈಗೊಳ್ಳಲಿದ್ದು, ಈ ಸಂದರ್ಭದಲ್ಲಿ ಅವರು 2008ರ ಮುಂಬೈ ದಾಳಿಯಲ್ಲಿ ಬದುಕಿ ಉಳಿದಿದ್ದ ಸಂತ್ರಸ್ತ “ಬೇಬಿ ಮೋಶೆ’ಯನ್ನು ಭೇಟಿಯಾಗುವ ಸಾಧ್ಯತೆ ಇದ್ದಿರುವುದಾಗಿ ಮಾಧ್ಯಮದ ವರದಿ ತಿಳಿಸಿದೆ.

2008ರಂದು ಮಂಬೈನಲ್ಲಿ ಸಂಭವಿಸಿದ್ದ ಭಯೋತ್ಪಾದನಾ ದಾಳಿಯಲ್ಲಿ ಇಸ್ರೇಲ್ ನ ರಿವ್ಕಾ ಮತ್ತು ಗಾವ್ರಿಯೆಲ್ ಹೋಟ್ಜ್ ಬರ್ಗ್ ದಂಪತಿ ಸಾವನ್ನಪ್ಪಿದ್ದರು. ಅದೃಷ್ಟವಶಾತ್ ಎಂಬಂತೆ ದಂಪತಿಯ 2 ವರ್ಷದ ಪುತ್ರ ಮೋಶೆ ಬದುಕುಳಿದಿದ್ದ.

ಪಾಕಿಸ್ತಾನ ಮೂಲದ ಲಷ್ಕರ್ ಎ ತೊಯ್ಬಾ ಉಗ್ರಗಾಮಿ ಸಂಘಟನೆಯ ಭಯೋತ್ಪಾದಕರು ನಾರಿಮನ್ ಹೌಸ್ ಸೇರಿದಂತೆ ಐದು ಸ್ಥಳಗಳನ್ನು ಗುರಿಯಾಗಿರಿಸಿ ದಾಳಿ ನಡೆಸಿದ್ದರು. ಅಂದು ಉಗ್ರರ ದಾಳಿಯಲ್ಲಿ ಬಚಾವಾಗಿದ್ದ ಮೋಶೆಗೆ ಈಗ 10ರ ಹರೆಯ.

ನಾರಿಮನ್ ಹೌಸ್ ನೊಳಗೆ ಉಗ್ರರು ನಡೆಸಿದ ದಾಳಿಯಲ್ಲಿ ಮೋಶೆ ಪೋಷಕರು ಬಲಿಯಾಗಿದ್ದರು. ಅಂದು ಮೋಶೆಯನ್ನು ಭಾರತೀಯ ದಾದಿ ರಕ್ಷಿಸಿದ್ದರು. ಬಳಿಕ ಇಬ್ಬರನ್ನೂ ಇಸ್ರೇಲ್ ಗೆ ಕರೆತರಲಾಗಿತ್ತು. ಮೋಶೆ ಈಗ ಅಜ್ಜ, ಅಜ್ಜಿ ಜೊತೆ ವಾಸಿಸುತ್ತಿದ್ದಾನೆ.