ಕ್ರೆಮಿನ್ನಾ ನಗರ ವಶಪಡಿಸಿಕೊಂಡ ರಷ್ಯಾ

Team Udayavani, Apr 21, 2022, 7:25 AM IST

ಕೀವ್‌/ಮಾಸ್ಕೋ: ರಷ್ಯಾ ಉಕ್ರೇನ್‌ನ ಮೇಲೆ ದಾಳಿ ಮುಂದುವರಿಸಿದ್ದು, ಉಕ್ರೇನ್‌ನ ಪೂರ್ವ ಭಾಗದಲ್ಲಿರುವ ಕ್ರೆಮಿನ್ನಾ ನಗರವನ್ನು ವಶಪಡಿಸಿಕೊಂಡಿದೆ.

ನಗರದಲ್ಲಿ 18,000 ಜನರಿರುವುದಾಗಿ ಹೇಳಲಾಗಿದೆ. ದೇಶದಲ್ಲಿ ಯುದ್ಧ ಆರಂಭವಾದಾಗಿನಿಂದ ಒಟ್ಟು 50 ಲಕ್ಷಕ್ಕೂ ಅಧಿಕ ಮಂದಿ ದೇಶ ಬಿಟ್ಟು ತೆರಳಿದ್ದಾರೆ. ಅದರಲ್ಲಿ 2.18 ಲಕ್ಷ ಮಂದಿ ವಿದೇಶಿಗರಿದ್ದಾರೆ ಎಂದು ವಿಶ್ವಸಂಸ್ಥೆ ಮಾನವ ಹಕ್ಕುಗಳ ಆಯೋಗ (ಯುಎನ್‌ಎಚ್‌ಆರ್‌ಸಿ) ಬುಧವಾರ ಮಾಹಿತಿ ಕೊಟ್ಟಿದೆ. ಮರಿಯುಪೋಲ್‌ನ 36ನೇ ಸಪರೇಟ್‌ ಮರೈನ್‌ ಬ್ರಿಗೇಡ್‌ನ‌ ಕಮಾಂಡರ್‌ ಫೇಸ್‌ಬುಕ್‌ ವೀಡಿಯೋ ಮೂಲಕ ವಿಶ್ವದ ನಾಯಕರಲ್ಲಿ ಮನವಿ ಮಾಡಿದ್ದಾರೆ.

500 ಗಾಯಗೊಂಡಿರುವ ಯೋಧರು ಮತ್ತು ನೂರಾರು ನಾಗರಿಕರು ನಗರದಲ್ಲಿ ಸಿಲುಕಿದ್ದೇವೆ. ನಾವು ಕೊನೇ ಕ್ಷಣ ವನ್ನು ಎಣಿಸುತ್ತಿದ್ದೇವೆ. ದಯವಿಟ್ಟು ನಮಗೆ ಸಹಾಯ ಮಾಡಿ ಎಂದು ಅವರು ಕೇಳಿಕೊಂಡಿದ್ದಾರೆ.

ಫ್ರಾನ್ಸ್‌ಗೆ ಸ್ಥಳಾಂತರಗೊಂಡ ತಾಯಿ-ಮಗಳು
ರಷ್ಯಾದ ದಾಳಿಯನ್ನು ಎದುರಿಸುತ್ತಿರುವ ಉಕ್ರೇನ್‌ನ ತಾಯಿಯೊಬ್ಬಳು ತನ್ನ ಪುಟಾಣಿ ಮಗಳ ಬೆನ್ನ ಮೇಲೆ ಆಕೆಯ ವಿವರ ಬರೆದು, ಸಂಪರ್ಕ ಸಂಖ್ಯೆ ಬರೆದಿದ್ದ ಫೋಟೋವೊಂದು ಇತ್ತೀಚೆಗೆ ವೈರಲ್‌ ಆಗಿತ್ತು. ಒಂದು ವೇಳೆ ರಷ್ಯಾ ದಾಳಿಯಲ್ಲಿ ತನ್ನ ಮಗಳು ಕಾಣೆಯಾದರೆ, ಆಕೆಯನ್ನು ಮತ್ತೆ ತನ್ನೊಂದಿಗೆ ಒಂದು ಮಾಡಲು ಸಹಾಯವಾಗಲಿ ಎಂದು ಆ ಮಾಹಿತಿಯನ್ನು ಬರೆದಿದ್ದಾಗಿ ತಾಯಿ ಹೇಳಿಕೊಂಡಿದ್ದಳು. ಇದೀಗ ಆ ತಾಯಿ-ಮಗಳು ಮತ್ತು ಪೂರ್ತಿ ಕುಟುಂಬ ಯುದ್ಧ ಪೀಡಿತ ಉಕ್ರೇನ್‌ನಿಂದ ಹೊರಬಂದಿದ್ದು, ಫ್ರಾನ್ಸ್‌ನ ಸಣ್ಣ ಹಳ್ಳಿಯೊಂದಕ್ಕೆ ಸ್ಥಳಾಂತರಗೊಂಡಿದ್ದಾರೆ.