ನ್ಯೂಯಾರ್ಕ್‌ನಲ್ಲಿ ರಸ್ತೆ ಅಪಘಾತ; ಭಾರತೀಯ ಮೂಲದ ಬಾಲಕ ಸಾವು

Team Udayavani, Jan 1, 2023, 6:47 AM IST

ನ್ಯೂಯಾರ್ಕ್‌: ಅಮೆರಿಕದ ನೆವಡಾ ರಾಜ್ಯದಲ್ಲಿ ಕ್ರಿಸ್ಮಸ್‌ ಹಬ್ಬದಂದು ಸಂಭವಿಸಿದ ಭೀಕರ ಅಪಘಾತದಲ್ಲಿ ಮಡಿದ ಬಾಲಕನನ್ನು ಭಾರತೀಯ ಮೂಲದ ಕ್ಯಾಲಿಫೋರ್ನಿಯಾದ ಇರ್ವಿನ್‌ ನಿವಾಸಿ ಆರವ್‌ ಮುತ್ಯಾಲ(2) ಎಂದು ಗುರುತಿಸಲಾಗಿದೆ.

ಸೆವೆನ್‌ ಮ್ಯಾಜಿಕ್‌ ಮೌಂಟೆನ್ಸ್‌ ಸಮೀಪ ಲಾಸ್‌ ವೇಗಸ್‌ ಬೋಲ್‌ವಾರ್ಡ್‌ ದಕ್ಷಿಣದಲ್ಲಿ ರವಿವಾರ ಮಧ್ಯಾಹ್ನ ನಡೆದ ಅಪಘಾತ ದಲ್ಲಿ ತೀವ್ರವಾಗಿ ತಲೆಗೆ ಪೆಟ್ಟು ಬಿದ್ದ ಪರಿಣಾಮ ಎರಡು ವರ್ಷದ ಆರವ್‌ ಮೃತಪಟ್ಟಿದ್ದರು. ಅಪಘಾತದ ಕುರಿತು ತನಿಖೆ ನಡೆಸಲಾಗುತ್ತಿದೆ ಎಂದು ನೆವಡಾ ಪೊಲೀಸರು ತಿಳಿಸಿದ್ದಾರೆ.

ಕ್ರಿಸ್ಮಸ್‌ ಮತ್ತು ಹೊಸವರ್ಷದ ರಜಾ ಸಂಭ್ರಮದಲ್ಲಿರುವ ಜನರು ಹೆಸರಾಂತ ಪ್ರವಾಸಿ ತಾಣವಾಗಿರುವ ಸೆವೆನ್‌ ಮ್ಯಾಜಿಕ್‌ ಮೌಂಟೆನ್ಸ್‌ಗೆ ಭಾರೀ ಸಂಖ್ಯೆಯಲ್ಲಿ ಭೇಟಿ ನೀಡುತ್ತಿರುವ ವೇಳೆ ಈ ದುರಂತ ಸಂಭವಿಸಿದೆ.