7 ಕೋಟಿ ರೂ. ಮೌಲ್ಯದ ಚಿತ್ರಕ್ಕೇ ಕಣ್ಣು ಬರೆದು ಎಡವಟ್ಟು!

Team Udayavani, Feb 12, 2022, 10:30 PM IST

ಮಾಸ್ಕೋ: ಕೆಲಸ ಮಾಡುವಾಗ ಬೋರ್‌ ಆಯಿತೆಂದು ಸೆಕ್ಯುರಿಟಿ ಗಾರ್ಡ್‌ವೊಬ್ಬರು ಮಾಡಿದ ಕೆಲಸ ಇದೀಗ ವಿಶ್ವದಲ್ಲೇ ಸುದ್ದಿಯಲ್ಲಿದೆ.

ಆತ ಮಾಡಿದ್ದು ಬೇರೇನೂ ಅಲ್ಲ, ನಾಲ್ಕು ಕಣ್ಣು ಬರೆದಿದ್ದಷ್ಟೇ! ರಷ್ಯಾದಲ್ಲಿ ಇತ್ತೀಚೆಗೆ ನಡೆದ ಚಿತ್ರಕಲಾ ಪ್ರದರ್ಶನದ ವೇಳೆ 60 ವರ್ಷ ವಯಸ್ಸಿನ ವ್ಯಕ್ತಿ ಸೆಕ್ಯುರಿಟಿ ಗಾರ್ಡ್‌ ಆಗಿ ಕೆಲಸ ಮಾಡುತ್ತಿದ್ದರು. ಅಲ್ಲಿದ್ದ 3 ಮನುಷ್ಯರ ಕಲಾಕೃತಿಯಲ್ಲಿ ಕಣ್ಣು, ಮೂಗು ಏನೂ ಇಲ್ಲದಿರುವುದನ್ನು ಕಂಡು ತಾವೇ ಎರಡು ಮನುಷ್ಯರ ಚಿತ್ರಕ್ಕೆ ಬಾಲ್‌ ಪಾಯಿಂಟ್‌ ಪೆನ್ನಿನಲ್ಲಿ ಕಣ್ಣುಗಳನ್ನು ಬರೆದಿದ್ದರು.

ಇಲ್ಲೇ ಆದದ್ದು ಎಡವಟ್ಟು! ಆ ಕಲಾಕೃತಿಗಳು ಅನ್ನಾ ಲಿಪೊರ್ಸ್ಸ್ಕಾಯ ಬರೆದಿದ್ದ “ತ್ರಿ ಫಿಗರ್‌’ ಥೀಮ್‌ನದ್ದಾಗಿದ್ದು, ಮಾಸ್ಕೋದಿಂದ ಬಾಡಿಗೆಗೆ ತರಲಾಗಿತ್ತು. ಅದರ ಮೌಲ್ಯ ಬರೋಬ್ಬರಿ 7 ಕೋಟಿ ರೂ.!  ಈಗ ಕಲಾಕೃತಿಯನ್ನು ಹಾಳುಮಾಡಿದ ಆರೋಪದಲ್ಲಿ ಆ ಸೆಕ್ಯುರಿಟಿ ಗಾರ್ಡ್‌ ಅನ್ನು ಕೆಲಸದಿಂದ ವಜಾ ಮಾಡಲಾಗಿದೆ.