ಈ ನಾಲ್ಕು ದೇಶಗಳ ಮಹಿಳೆಯರಿಗೆ ವಿವಾಹ ನಿಷೇಧ

Team Udayavani, Mar 21, 2021, 12:09 AM IST

ಸಾಂದರ್ಭಿಕ ಚಿತ್ರ

ರಿಯಾದ್‌: “ಪಾಕಿಸ್ತಾನ ಸೇರಿದಂತೆ ನಾಲ್ಕು ದೇಶಗಳ ಮಹಿಳೆಯರನ್ನು ಮದುವೆಯಾಗುವುದೇ ಬೇಡ’ ಹೀಗೆಂದು ಪುರುಷರಿಗೆ ಫ‌ರ್ಮಾನು ಹೊರಡಿಸಲಾಗಿದೆ. ಅಂದ ಹಾಗೆ ಇಂಥ ಆದೇಶ ಜಾರಿಯಾಗಿರುವುದು ಸೌದಿ ಅರೇಬಿಯಾದಲ್ಲಿ.  ವಿದೇಶಿ ಮಹಿಳೆಯರನ್ನು ಹೆಚ್ಚಿನ ಸಂಖ್ಯೆಯಲ್ಲಿ ಮದುವೆಯಾಗುವುದನ್ನು ತಪ್ಪಿಸಲು ಇಂಥ ಕ್ರಮ ಕೈಗೊಳ್ಳಲಾಗಿದೆ. ಪಾಕಿಸ್ತಾನ, ಬಾಂಗ್ಲಾದೇಶ, ಛಾಡ್‌ ಮತ್ತು ಮ್ಯಾನ್ಮಾರ್‌ನ ಮಹಿಳೆಯರಿಗೆ ಈ ಆದೇಶ ಅನ್ವಯವಾಗಲಿದೆ. ಈ ನಾಲ್ಕು ದೇಶಗಳ ಸುಮಾರು 5 ಲಕ್ಷ ಮಹಿಳೆಯರು ಸೌದಿಯಲ್ಲಿ ಇದ್ದಾರಂತೆ.

ಬಂದಿವೆ ಕಠಿಣ ನಿಯಮ: ಒಂದು ವೇಳೆ, ಪುರುಷರು ವಿದೇಶಿ ಮಹಿಳೆಯರನ್ನು ಮದುವೆಯಾಗುವುದಿದ್ದರೆ ಕಠಿಣ ನಿಯಮಗಳನ್ನು ಜಾರಿಗೆ ತರಲಾಗಿದೆ. ಮೊದಲನೇಯದಾಗಿ ವಿದೇಶದ ಮಹಿಳೆಯನ್ನು ಮದುವೆಯಾಗುವುದರ ಬಗ್ಗೆ ಅರ್ಜಿ ಬರೆದು ಸರ್ಕಾರದಿಂದ ಅನುಮತಿ ಪಡೆಯಬೇಕಾಗುತ್ತದೆ. ಅರ್ಜಿಯ ಜತೆಯಲ್ಲಿ ಸರ್ಕಾರದ ವತಿಯಿಂದ ನೀಡುವ ಕುಟುಂಬದ ಗುರುತಿನ ಚೀಟಿಯ ಪ್ರತಿ ಮತ್ತು ಇತರ ದಾಖಲೆ, ಅರ್ಜಿಗೆ ಸ್ಥಳೀಯ ಸಂಸ್ಥೆಗಳ ಮುಖ್ಯಸ್ಥ ಸಹಿ ಬೇಕಾಗುತ್ತದೆ ಎಂದು ಮಕ್ಕಾ ಪೊಲೀಸ್‌ ಮಹಾನಿರ್ದೇಶಕ ಅಸಫ್ ಅಲಿ- ಖುರೇಷಿ ಹೇಳಿದ್ದಾರೆ. ಜತೆಗೆ ವಯೋಮಿತಿ 25 ವರ್ಷಕ್ಕಿಂತ ಮೇಲ್ಪಟ್ಟು ಇರಬೇಕು.

6 ತಿಂಗಳು ಇಲ್ಲ: ವಿವಾಹ ವಿಚ್ಛೇದನ ಪಡೆದುಕೊಂಡವರಿಗೆ ಆರು ತಿಂಗಳ ವರೆಗೆ ಮದುವೆಗೆ ಅವಕಾಶ ಇಲ್ಲ. ಈ ಹಿಂದೆಯೇ ಮದುವೆಯಾಗಿದ್ದ ವ್ಯಕ್ತಿಯ ಪತ್ನಿಯ ಜತೆಗೆ ದಾಂಪತ್ಯ ನಡೆಸಲು ವೈದ್ಯಕೀಯವಾಗಿ ಅರ್ಹಳಾಗಿಲ್ಲ, ವಿಶೇಷವಾಗಿ ಆಕೆ ಗಂಭೀರ ಕಾಯಿಲೆಯಿಂದ ಬಳಲುತ್ತಿದ್ದಾಳೆ ಅಥವಾ ಇನ್ನಿತರ ಸಮಸ್ಯೆ ಬಗ್ಗೆ ಆಸ್ಪತ್ರೆಯಿಂದ ವೈದ್ಯಕೀಯ ಪ್ರಮಾಣ ಪತ್ರ ಹಾಜರುಪಡಿಸಬೇಕಾಗುತ್ತದೆ.