ಸೌದಿ ಮಹಿಳೆಯರು ಖುಷ್‌

Team Udayavani, Oct 31, 2017, 6:25 AM IST

ರಿಯಾದ್‌: ಸೌದಿ ಅರೇಬಿಯಾದ ಮಹಿಳೆಯರು ಮುಂದಿನ ವರ್ಷದಿಂದ ಅಲ್ಲಿನ ಪ್ರಮುಖ ಕ್ರೀಡಾಂಗಣಗಳಿಗೆ ಮುಕ್ತವಾಗಿ ತೆರಳುವ ಅವಕಾಶವನ್ನು ಸೌದಿ ಸರಕಾರ ಕಲ್ಪಿಸಿದೆ. 

ಸೌದಿ ಅರೇಬಿಯಾದ ರಾಜಕುಮಾರ ಮೊಹಮ್ಮದ್‌ ಬಿನ್‌ ಸಲ್ಮಾನ್‌, ಸೋಮವಾರ ಈ ಕುರಿತಂತೆ ಆದೇಶ ಹೊರಡಿಸಿದ್ದಾರೆ. ಇದರಿಂದಾಗಿ, ಅಲ್ಲಿನ ಮಹಿಳೆಯರಿಗೆ ರಿಯಾದ್‌, ಜೆಡ್ಡಾ ಹಾಗೂ ದಮ್ಮಾ¾ಮ್‌ ಕ್ರೀಡಾಂಗಣಗಳಲ್ಲಿ ನಡೆಯುವ ಯಾವುದೇ ಕ್ರೀಡೆ, ಕಾರ್ಯಕ್ರಮಗಳನ್ನು ಪುರುಷರಂತೆ ಗ್ಯಾಲರಿಯಲ್ಲಿ ಕೂತು ಸವಿಯುವ ಅವಕಾಶ ಸಿಗಲಿದೆ.

ಯಾವುದೇ ಸಾರ್ವಜನಿಕ ಸಭೆ, ಸಮಾರಂಭಗಳಲ್ಲಿ ಪುರುಷರು, ಸ್ತ್ರೀಯರು ಒಟ್ಟಿಗೆ ಸೇರುವುದಕ್ಕೆ ಅಲ್ಲಿ ನಿರ್ಬಂಧವಿರು ವುದರಿಂದ ಮೊಹಮ್ಮದ್‌ ಅವರ ಈ ಆದೇಶ ಎಲ್ಲರ ಹುಬ್ಬೇರುವಂತೆ ಮಾಡಿದೆ. ಹಾಗಾಗಿ, ಅವರ ಕ್ರಮ ಅಲ್ಲಿನ ಕೆಲ ನಾಗರಿಕರ ಟೀಕೆಗೂ ಕಾರಣವಾಗಿದ್ದು, ಕೆಲವರು, “”ಸ್ತ್ರೀಯರಿಗೆ ಕಾರು ಚಲಾಯಿಸಲು ಅವಕಾಶ ಕಲ್ಪಿಸಲಾಯಿತು. ಇಂದು ಕ್ರೀಡಾಂಗಣಗಳ ಪ್ರವೇಶಕ್ಕೆ ಅವಕಾಶ ನೀಡಲಾಗಿದೆ. ಮುಂದೆ ನೈಟ್‌ ಕ್ಲಬ್‌ಗ ಹೋಗಲು ಅನುಮತಿ ನೀಡಬಹುದು” ಎಂದು ಸಾಮಾಜಿಕ ಜಾಲತಾಣದಲ್ಲಿ ಟೀಕಿಸಿದ್ದಾರೆ.

ಆದರೆ, ಇದಕ್ಕೆ ಮೊಹಮ್ಮದ್‌ ಸೊಪ್ಪು ಹಾಕಿಲ್ಲ. ಕೆಲವು ತಿಂಗಳ ಹಿಂದೆ ಸೌದಿ ಮಹಿಳೆಯರಿಗೆ ಕಾರು ಚಾಲನೆ ಮಾಡುವ ಸ್ವಾತಂತ್ರ್ಯ ನೀಡಿದ್ದ ಮೊಹಮ್ಮದ್‌, ಇತ್ತೀಚೆಗೆ, ಸೌದಿ ಅರೇಬಿಯಾ ದಿನಾಚರಣೆ ಅಂಗವಾಗಿ ರಿಯಾದ್‌ ಕ್ರೀಡಾಂಗಣದಲ್ಲಿ ನಡೆದ ಕಾರ್ಯಕ್ರಮವನ್ನು ಗ್ಯಾಲರಿಗಳಲ್ಲಿ ಕೂತು ನೇರವಾಗಿ ನೋಡುವ ಅವಕಾಶವನ್ನು ಅಲ್ಲಿನ ಮಹಿಳೆಯರಿಗೆ ನೀಡಿದ್ದರು.